બિહારમાં નીતિશ કુમારની પાર્ટી જનતા દળ યુનાઇટેડ (જેડીયુ)એ મોકામાના ધારાસભ્ય અનંત સિંહ અને તેમના પત્ની નીલમ દેવીને 6 વર્ષ માટે પાર્ટીમાંથી હકાલપટ્ટી કરી છે. બંનેનું પ્રાથમિક સભ્યપદ પણ તાત્કાલિક અસરથી રદ કરવામાં આવ્યું છે. પક્ષવિરોધી પ્રવૃત્તિઓ અને પક્ષના નિર્દેશોનું ઉલ્લંઘન કરવાનો આરોપ તેમના પર મુકવામાં આવ્યો છે.
આ કાર્યવાહી પાછળનું મુખ્ય કારણ બિહાર વિધાન પરિષદ (એમએલસી) ચૂંટણી દરમિયાન પટના ગ્રેજ્યુએટ બેઠક પર જેડીયુ ઉમેદવાર નીરજ કુમાર સામે વિરોધ કરવો હતો. અનંત સિંહે પક્ષના ઉમેદવારનો ખુલ્લેઆમ વિરોધ કરીને ‘જન સુરાજ’ના ઉમેદવાર અનુજ કુમાર સિંહને સમર્થન આપ્યું હતું અને તેમના પ્રચારમાં પણ જોડાયા હતા. જેડીયુના પ્રદેશ અધ્યક્ષ ઉમેશ કુશવાહાના જણાવ્યા અનુસાર, અનંત સિંહ સતત પક્ષના આદેશોની અવગણના કરતા હતા અને પક્ષના ટોચના નેતૃત્વ સામે અભદ્ર ભાષાનો ઉપયોગ કરતા હતા. મતદાન પૂર્ણ થયાના બીજા જ દિવસે પાર્ટીએ આ કડક નિર્ણય લીધો છે.
આ સાથે જ અનંત સિંહની ધારાસભ્ય તરીકેની ખુરશી પર પણ ખતરો મંડરાઈ રહ્યો છે. જેડીયુ પ્રદેશ અધ્યક્ષે બિહાર વિધાનસભાના સ્પીકર પ્રેમ કુમારને પત્ર લખીને ભારતીય બંધારણની 10મી અનુસૂચિ (પક્ષપલટા વિરોધી કાયદો) હેઠળ અનંત સિંહનું વિધાનસભા સભ્યપદ તાત્કાલિક રદ કરવા ભલામણ કરી છે. જોકે, ધારાસભ્ય પદ રદ કરવાનો આખરી નિર્ણય નિયમો અનુસાર વિધાનસભા અધ્યક્ષે કરવાનો રહેશે.
અનંત સિંહની સાથે તેમના પત્ની અને પૂર્વ ધારાસભ્ય નીલમ દેવી સામે પણ શિસ્તભંગની કાર્યવાહી કરવામાં આવી છે. અનંત સિંહ જેલમાં હતા તે સમયગાળા દરમિયાન નીલમ દેવી મોકામાથી ધારાસભ્ય બન્યા હતા. તેમના પર પણ પક્ષવિરોધી પ્રવૃત્તિઓમાં સામેલ રહેવાનો આરોપ મુકીને 6 વર્ષ માટે પાર્ટીમાંથી સસ્પેન્ડ કરવામાં આવ્યા છે.
પટના જિલ્લાની મોકામા બેઠક પરથી 6 વખત ધારાસભ્ય રહી ચૂકેલા અનંત સિંહ વિરુદ્ધ લેવાયેલા આ કડક પગલાથી બિહારના રાજકારણમાં ભારે ચર્ચા જાગી છે. આ ચૂંટણીનું પરિણામ 27 ઑક્ટોબરના રોજ જાહેર થશે.