શ્રીલંકાના પૂર્વ કેપ્ટન સનથ જયસૂર્યાએ રવિવારે જણાવ્યું હતું કે યુવા બેટ્સમેન વૈભવ સૂર્યવંશી ભારતીય ક્રિકેટનું ભવિષ્ય છે. તેમણે એમ પણ કહ્યું કે સૂર્યવંશીને પ્લેઇંગ ઇલેવનમાં સામેલ કરવાની ઉતાવળ કરવી જોઈએ નહીં, કારણ કે તેની પાસે પોતાની પ્રતિભા દર્શાવવા માટે પૂરતો સમય છે.
જયસૂર્યાએ કહ્યું, “તેઓ અલગ પ્રકારની પ્રતિભા ધરાવે છે. તેમને સારું પ્રદર્શન કરવાની તક આપો. તેઓ ચોક્કસ સારું પ્રદર્શન કરશે.”
તેમણે ઉમેર્યું, “તકો આવશે. તેઓ કયા નંબર પર રમશે તે હું અત્યારે કહી શકતો નથી. તે પરિસ્થિતિ પર નિર્ભર રહેશે. પરંતુ જ્યારે તક આવશે, ત્યારે તે તેનો લાભ ઉઠાવશે. તેથી રાહ જોવી જોઈએ.”
વૈભવ સૂર્યવંશીએ આ વર્ષે જુલાઈમાં ઇંગ્લેન્ડ સામે ભારત માટે ડેબ્યૂ કર્યું હતું. અફઘાનિસ્તાન સામેની ત્રણ મેચની T-20 સિરીઝમાં તે ભારતીય ટીમનો ભાગ હતો, પરંતુ તેને એક પણ મેચ રમવાની તક મળી નહોતી. અફઘાનિસ્તાન સિરીઝ બાદ ઝિમ્બાબ્વે સામેની T-20 સિરીઝમાં તેને રમવાની તક મળી, જ્યાં તેણે ત્રણ મેચમાં 151 રન બનાવ્યા અને સિરીઝના ટોપ સ્કોરર રહ્યો. તેને પ્લેયર ઑફ ધ સિરીઝ પસંદ કરવામાં આવ્યો. આ સિરીઝમાં તેણે બે અડધી સદી ફટકારી હતી. એશિયન ગેમ્સ માટે પણ તેને ટીમમાં સામેલ કરવામાં આવ્યો છે.
જયસૂર્યાએ ભારતીય ક્રિકેટની પ્રશંસા કરતાં કહ્યું કે અભિષેક શર્મા અને સંજુ સેમસન જેવા ખેલાડીઓએ સતત પ્રદર્શન કરતું રહેવું પડશે. તેમણે કહ્યું, “દરેક ક્રિકેટરમાં પોતાની પ્રતિભા હોય છે. ખેલાડીઓ અભ્યાસ અને તાલીમમાં સખત મહેનત કરે છે.”
તેમણે વધુમાં જણાવ્યું, “ભારતમાં હંમેશાં એવા ખેલાડીઓ તૈયાર રહે છે, જે કોઈનું સ્થાન લઈને પ્રદર્શન કરી શકે છે. અહીં સ્પર્ધા ઘણી વધારે છે. ક્રિકેટનું સ્તર પણ ઘણું ઊંચું છે. ખેલાડીઓ તમામ ફોર્મેટ રમે છે.”
જયસૂર્યાએ રમતમાં કોર્પોરેટ ક્ષેત્રની વધતી ભૂમિકા અને કોર્પોરેટ ક્રિકેટ વર્લ્ડ કપની જરૂરિયાત વિશે પણ વાત કરી. તેમણે કહ્યું, “જ્યારે તમે ભારતનાં તમામ શહેરોમાં રમો છો, ત્યારે કોર્પોરેટ ખેલાડીઓ પણ સામે આવે છે. તેમને સારું પ્રદર્શન કરવાની તક મળે છે. એવા ઘણા ખેલાડીઓ છે, જેમને IPLમાં તક મળી નથી. અહીં તેમને તક મળે છે.”