જાપાન ક્રિકેટ એસોસિયેશન (JCA) એ એશિયન ગેમ્સમાં ક્રિકેટરોને રોકાવા અંગે ઉભા થયેલા વિવાદ પર સ્પષ્ટતા કરી છે. JCAના CEO નાઓકી એલેક્સ મિયાજીએ જણાવ્યું છે કે જો ટીમ ઇચ્છે તો પોતાના રોકાણ માટે પોતે જ હોટલની વ્યવસ્થા કરી શકે છે.
એશિયન ગેમ્સમાં ભાગ લેનારી ઘણી ટીમોના બોર્ડે હોટલની સુવિધાઓ પર સવાલ ઉઠાવ્યા હતા, જેમાં ભારતીય ક્રિકેટ કંટ્રોલ બોર્ડ (BCCI) અને પાકિસ્તાન ક્રિકેટ બોર્ડ (PCB)નો સમાવેશ થાય છે.
એશિયન ગેમ્સનું આયોજન 19 સપ્ટેમ્બરથી 4 ઓક્ટોબર દરમિયાન જાપાનના આઈચી અને નાગોયા શહેરમાં થવાનું છે. મહિલા ક્રિકેટની મેચ 17 સપ્ટેમ્બરથી શરૂ થશે, જ્યારે પુરુષોની ટીમ 28 સપ્ટેમ્બરે સીધા ક્વાર્ટરફાઇનલમાં પોતાની પ્રથમ મેચ રમશે.
મિયાજીએ જણાવ્યું કે એશિયન ક્રિકેટ કાઉન્સિલ (ACC) અને આયોજન સમિતિ (AINAGOC) આ મુદ્દે વાતચીત કરી રહ્યા છે. તેમણે કહ્યું, "અમે ક્રિકેટ ટીમને હોટલનો વિકલ્પ આપ્યો છે. જ્યારે અન્ય ઘણી રમતોના ખેલાડીઓ માટે ક્રુઝ શિપ અથવા કન્ટેનર હોટલ જેવી મર્યાદિત સુવિધાઓ છે."
મિયાજીએ વધુમાં કહ્યું કે ખેલાડીઓના વિસ્તારમાં શૌચાલયની સુવિધા ઉપલબ્ધ રહેશે. મેદાન પર બનેલા ડ્રેસિંગ રૂમ ભલે અસ્થાયી હોય, પરંતુ તેમને એવી રીતે તૈયાર કરવામાં આવ્યા છે કે ખેલાડીઓ અને અધિકારીઓને સંપૂર્ણ આરામ મળે.
પીચ અને આઉટફિલ્ડ ઓછા સમયમાં મર્યાદિત સંસાધનો વચ્ચે તૈયાર કરવામાં આવી છે. આ એશિયન ગેમ્સના ઇતિહાસમાં ક્રિકેટની સૌથી શ્રેષ્ઠ પ્લેઇંગ સરફેસ હશે. શ્રીલંકાના ક્યુરેટર્સની મદદથી અહીં ટર્ફ અને હાઇબ્રિડ પીચ તૈયાર કરવામાં આવી રહી છે.
BCCI એ ચાર મુખ્ય કારણોસર નારાજગી વ્યક્ત કરી હતી. પ્રથમ, હોટલના રૂમ ખૂબ જ નાના હોવાનું જણાવાયું છે. બોર્ડના એક અધિકારીએ જણાવ્યું કે રૂમ એટલા સાંકડા છે કે જો બે ખેલાડીઓ તેમની ભારે કીટ બેગ ખોલે તો ચાલવા કે ઊભા રહેવા માટે પણ જગ્યા રહેતી નથી.
બીજું, સ્ટેડિયમ નજીકની ફાઇવ સ્ટાર હોટલો પહેલેથી જ બુક હોવાને કારણે ક્રિકેટરોને 20 કિલોમીટર દૂર રોકવામાં આવી રહ્યા છે. આનાથી મુસાફરીનો સમય અને થાકની સમસ્યા છે. આ વખતે એશિયન ગેમ્સમાં ખેલાડીઓ માટે કોઈ અલગ સ્પોર્ટ્સ વિલેજ બનાવવામાં આવ્યું નથી.
ત્રીજું, મેચો માટે 'કોરોગી સ્પોર્ટ્સ પાર્ક'ની પસંદગી કરવામાં આવી છે, જે અગાઉ બેઝબોલ સ્ટેડિયમ હતું. તેને તાજેતરમાં ક્રિકેટ સ્ટેડિયમમાં રૂપાંતરિત કરવામાં આવ્યું છે. પીચ અને આઉટફિલ્ડ હજુ સુધી આંતરરાષ્ટ્રીય સ્તરે યોગ્ય રીતે ચકાસવામાં આવી નથી.
ચોથું, ડ્રેસિંગ રૂમ પાકા મકાન ને બદલે તંબુમાં બનાવવામાં આવ્યા છે. અહીંથી વોશરૂમ 500 મીટર દૂર છે, જેના કારણે ખેલાડીઓને અસુવિધા થઈ રહી છે.