દિલ્હીના જંતર-મંતર પર 3 ઓક્ટોબરે મુખ્ય ચૂંટણી કમિશનર જ્ઞાનેશ કુમાર વિરુદ્ધ યોજાયેલા વિરોધ પ્રદર્શન દરમિયાન ત્રણ મહિલા પત્રકારોએ પોલીસકર્મીઓ પર જાતીય સતામણીનો આરોપ લગાવ્યો છે. આ ગંભીર ફરિયાદો મળ્યા બાદ દિલ્હી પોલીસે મામલાની નિષ્પક્ષ તપાસ માટે કેસ ક્રાઈમ બ્રાન્ચને સોંપી દીધો છે. રવિવારે એક પોલીસ અધિકારીએ આ માહિતી આપી હતી.
શનિવારે એક મહિલા પત્રકારે મીડિયા સાથે વાત કરતાં આરોપ લગાવ્યો હતો કે દિલ્હી પોલીસના આસિસ્ટન્ટ કમિશનર ઓફ પોલીસ (ACP) વિવેક ભગતે તેની જાતીય સતામણી કરી છે. પોલીસ અધિકારીએ જણાવ્યું કે પ્રદર્શન દરમિયાન કાયદો અને વ્યવસ્થા જાળવવા પોલીસ તૈનાત હતી, અને આ દરમિયાન બનેલી ઘટનાઓ અંગે નવી દિલ્હી જિલ્લા પોલીસને ફરિયાદો મળી છે. ન્યાયિક અને નિષ્પક્ષ તપાસ માટે જિલ્લા પોલીસે આ મામલો ક્રાઈમ બ્રાન્ચને ટ્રાન્સફર કર્યો છે, જ્યાં હવે ફરિયાદ કરનાર મહિલા પત્રકારો અને અન્ય સંબંધિત લોકોના નિવેદનો નોંધવામાં આવશે.
મહિલા પત્રકારની આપવીતી
ઘટના અંગે વાત કરતાં એક મહિલા પત્રકારે જણાવ્યું, 'હું જંતર-મંતર પર ચાલી રહેલા પ્રદર્શનને કવર કરી રહી હતી. તે સમયે ACP દ્વારા મારી જાતીય સતામણી કરવામાં આવી. જ્યારે પોલીસકર્મીઓ પ્રદર્શનકારીઓને કસ્ટડીમાં લઈ રહ્યા હતા ત્યારે સ્થળ પર કોઈ મહિલા પોલીસકર્મી હાજર ન હતી. મેં ACP વિવેક ભગતને પૂછ્યું કે મહિલા પોલીસકર્મીઓ કેમ હાજર નથી, ત્યારે તેમણે યૌન ઉત્પીડન કરીને મને પાછળ ધકેલી દીધી. આ ઘટના બાદ હું અન્ય લોકો સાથે FIR નોંધાવવા પોલીસ સ્ટેશન ગઈ હતી, પરંતુ અત્યાર સુધી કોઈ કાર્યવાહી થઈ નથી.'
પ્રેસ કાઉન્સિલ અને પ્રેસ ક્લબની નારાજગી
પ્રેસ કાઉન્સિલ ઓફ ઈન્ડિયા (PCI)એ પ્રદર્શન કવર કરી રહેલી મહિલા પત્રકારો સાથેના પોલીસના કથિત વર્તન સામે નારાજગી વ્યક્ત કરી છે. PCIએ દિલ્હી પોલીસ પાસે મહિલા પત્રકારની ફરિયાદ પર તાત્કાલિક કાર્યવાહીની માંગ કરી છે. કાઉન્સિલે જણાવ્યું કે લોકશાહીમાં આ પ્રકારનું વર્તન સ્વીકાર્ય નથી અને પત્રકારોને ડર વગર સ્વતંત્ર રીતે કામ કરવાની તથા ઘટનાઓ નોંધવાની આઝાદી મળવી જોઈએ. જો દેશની રાજધાનીના કેન્દ્રમાં પણ મીડિયાકર્મીઓ સુરક્ષિત ન હોય, તો તે દેશમાં મીડિયાની સ્વતંત્રતા માટે સારો સંકેત નથી.
આ ઉપરાંત, પ્રેસ ક્લબ ઓફ ઈન્ડિયાએ પણ સખત નિવેદન જાહેર કરીને શુક્રવાર અને શનિવારના પ્રદર્શન દરમિયાન પત્રકારો સાથે થયેલા કથિત દુર્વ્યવહાર સામે નારાજગી દર્શાવી છે. પ્રેસ ક્લબે જંતર-મંતર અને તેની આસપાસના વિસ્તારમાં ઇન્ટરનેટ સેવાઓ બંધ કરવાના પગલા પર ગંભીર સવાલો ઉઠાવ્યા છે અને દિલ્હી પોલીસને તાત્કાલિક કડક પગલાં લેવા અપીલ કરી છે.