ઇંગ્લેન્ડના દિગ્ગજ ઝડપી બોલર જેમ્સ એન્ડરસન હવે કાઉન્ટી ટીમ લેન્કશાયર માટે રમશે નહીં. લેન્કશાયરે 2027 સીઝન માટે તેમનો કરાર લંબાવવાનો નિર્ણય લીધો નથી. આ સાથે ક્લબ સાથેનો તેમનો 25 વર્ષનો સંબંધ પૂરો થશે.
આ નિર્ણય બાદ એન્ડરસને ઇન્સ્ટાગ્રામ પર લખ્યું કે તેઓ બાળપણથી લેન્કશાયરને સમર્થન આપતા આવ્યા છે. તેમણે જણાવ્યું- ‘જો આ નિર્ણય મારા હાથમાં હોત, તો તેનો અંત આ રીતે ન આવ્યો હોત. તેમ છતાં હું ખેલાડીઓ અને પ્રશંસકોને ભવિષ્ય માટે શુભેચ્છા પાઠવું છું.’
કાઉન્ટી ક્રિકેટમાંથી નિવૃત્તિ અંગે તેમણે કહ્યું કે તેની હજુ જાહેરાત કરવામાં આવી નથી. એન્ડરસન આંતરરાષ્ટ્રીય ક્રિકેટમાંથી નિવૃત્તિ લઈ ચૂક્યા છે, પરંતુ ફર્સ્ટ ક્લાસ ક્રિકેટ રમે છે. જુલાઈ 2024માં તેમણે વેસ્ટ ઇન્ડીઝ સામે પોતાની છેલ્લી આંતરરાષ્ટ્રીય ટેસ્ટ મેચ રમી હતી.
લેન્કશાયરે નિવેદન બહાર પાડીને જણાવ્યું કે એન્ડરસનને 19 ઓક્ટોબરે ઓલ્ડ ટ્રેફર્ડ ખાતે યોજાયેલી બેઠકમાં આ નિર્ણયની જાણ કરવામાં આવી હતી. બેઠકમાં ક્લબના આગામી ક્રિકેટ ડિરેક્ટર પૉલ ફારબ્રેસ અને ચીફ એક્ઝિક્યુટિવ રિચર્ડ કેન્યન હાજર હતા.
ફારબ્રેસે જણાવ્યું કે ક્લબ એવી ટીમ તૈયાર કરવા માગે છે, જે કાઉન્ટી ચેમ્પિયનશિપના ડિવિઝન-2માંથી પ્રમોશન મેળવી શકે અને આગામી 3થી 4 વર્ષમાં ડિવિઝન-1નું ટાઇટલ જીતવાનો પડકાર રજૂ કરી શકે. આ જ યોજનાના ભાગરૂપે એન્ડરસનનો કરાર આગળ ન વધારવાનો મુશ્કેલ નિર્ણય લેવામાં આવ્યો. ફારબ્રેસે એન્ડરસનને લેન્કશાયર અને ઇંગ્લેન્ડનો અત્યાર સુધીનો સૌથી મહાન બોલર પણ ગણાવ્યો.
એન્ડરસને 2001માં લેન્કશાયર માટે ડેબ્યૂ કર્યું હતું. ક્લબ તરફથી તેમણે 112 ફર્સ્ટ ક્લાસ મેચમાં 443 વિકેટ લીધી છે. તેઓ 2011માં કાઉન્ટી ચેમ્પિયનશિપ જીતનારી ટીમનો પણ ભાગ હતા. 2026 સીઝનમાં તેમને પ્રથમ વખત ટીમની રેડ-બોલ કેપ્ટનશિપ સોંપવામાં આવી હતી.
બર્નલીમાં જન્મેલા એન્ડરસને લેન્કશાયર માટે 61 લિસ્ટ-A મેચોમાં 83 અને 40 T20 મેચોમાં 50 વિકેટ પણ ઝડપી છે. 2019માં તેમણે ઓલ્ડ ટ્રેફર્ડ ખાતે કેન્ટ સામેની મેચમાં પોતાની ફર્સ્ટ ક્લાસ કારકિર્દીની 1,000 વિકેટ પૂરી કરી હતી. તેના બે વર્ષ પહેલાં સ્ટેડિયમના પેવેલિયન એન્ડનું નામ તેમના સન્માનમાં બદલવામાં આવ્યું હતું.