ન્યૂયોર્કમાં યુએનજીએ (સંયુક્ત રાષ્ટ્ર મહાસભા)ના ઉચ્ચ સ્તરીય સપ્તાહ દરમિયાન વિદેશ મંત્રી ડૉ. એસ. જયશંકરે અમેરિકી વિદેશ મંત્રી માર્કો રુબિયો સાથે મુલાકાત કરી હતી. આ બેઠકમાં ભારતે અમેરિકાના નવા કાયદા હેઠળ ભારતીય તેલ આયાત પર લાદવામાં આવી શકે તેવા 100% ટેરિફ અંગે ગંભીર ચિંતા વ્યક્ત કરી હતી.
અમેરિકી પ્રમુખ ડોનાલ્ડ ટ્રમ્પે ગયા અઠવાડિયે 'લિન્ડસે ઓ. ગ્રેહામ સેંક્શનિંગ રશિયા એન્ડ ઈરાન એક્ટ ઓફ 2026' (SRIA) પર હસ્તાક્ષર કર્યા છે. આ કાયદા હેઠળ અમેરિકાને રશિયા પાસેથી તેલ અને ગેસ ખરીદતા દેશો, ખાસ કરીને ભારત અને ચીન પર 100 ટકા સુધીનો ટેરિફ લાદવાનો અધિકાર મળ્યો છે.
બેઠક બાદ જયશંકરે સોશિયલ મીડિયા પ્લેટફોર્મ X પર લખ્યું, 'સંયુક્ત રાષ્ટ્રના ઉચ્ચ સ્તરીય સપ્તાહ દરમિયાન અમેરિકાના વિદેશ મંત્રી માર્કો રુબિયોને મળીને આનંદ થયો. SRIA (રશિયા અને ઈરાન પર પ્રતિબંધ અધિનિયમ)ના સંબંધમાં ભારતના હિતો અને ચિંતાઓને પુનરાવર્તિત કરી. આ સિવાય અખાતી દેશો અને યુક્રેનની સ્થિતિ પર પણ ચર્ચા થઈ.'
એ પહેલાં ભારત સરકારે સ્પષ્ટ વલણ અપનાવતા કહ્યું હતું કે, દેશ પોતાની આર્થિક સુરક્ષા અને 140 કરોડ નાગરિકોની ઊર્જા સુરક્ષા સુનિશ્ચિત કરવા માટે તમામ જરૂરી પગલાં ભરશે.
બીજી તરફ, અમેરિકી વિદેશ મંત્રી માર્કો રુબિયોએ પણ X પર પોસ્ટ કરતાં લખ્યું, 'આજે ન્યૂયોર્કમાં ભારતીય વિદેશ મંત્રી ડૉ. એસ. જયશંકરને મળીને ખૂબ સારું લાગ્યું. આપણે ભારત-અમેરિકા વ્યૂહાત્મક ભાગીદારીને મજબૂત કરી રહ્યા છીએ અને પ્રાદેશિક પ્રાથમિકતાઓ તથા આગામી બહુપક્ષીય પ્રયાસો પર સમન્વય બનાવી રહ્યા છીએ.'
ઉલ્લેખનીય છે કે, આ પહેલાં બંને નેતાઓની મુલાકાત આ જ વર્ષે જુલાઈમાં મનીલામાં થઈ હતી, જ્યાં વેપાર, ટેરિફ, ઊર્જા, સંરક્ષણ, મહત્વપૂર્ણ ખનિજો અને આર્ટિફિશિયલ ઈન્ટેલિજન્સ જેવા ક્ષેત્રો પર ચર્ચા થઈ હતી. બંને દેશો વચગાળાના ભારત-અમેરિકા વેપાર કરારને આખરી ઓપ આપવા પર પણ સહમત થયા હતા.
મનીલા બેઠક બાદ અમેરિકી વિદેશ વિભાગે કહ્યું હતું કે, બંને પક્ષોએ ભારત-અમેરિકા વચગાળાના વેપાર કરારને આખરી ઓપ આપવાના મહત્વ પર સહમતી દર્શાવી હતી. હવે ન્યૂયોર્કમાં થયેલી બેઠકમાં રશિયા અને ઈરાન સાથે જોડાયેલા અમેરિકી પ્રતિબંધ કાયદા સાથે અખાતી દેશો અને યુક્રેનની સ્થિતિ પર ચર્ચાને પણ મહત્વપૂર્ણ માનવામાં આવી રહી છે. જયશંકરની આ મુલાકાત સંયુક્ત રાષ્ટ્ર મહાસભાના ઉચ્ચ સ્તરીય સપ્તાહ દરમિયાન ભારત-અમેરિકા સંબંધો સાથે જોડાયેલા અનેક મહત્વના મુદ્દાઓ પર ચાલી રહેલા સંવાદનો એક ભાગ છે.