પૂર્વ ઉપરાષ્ટ્રપતિ જગદીપ ધનખડની તબિયત બુધવારે સવારે અચાનક લથડી ગઈ હતી. તેઓ મોર્નિંગ વૉક દરમિયાન બેભાન થઈને ઢળી પડ્યા હતા. ઘટનાને પગલે તેમને તાત્કાલિક નવી દિલ્હી સ્થિત AIIMSના કાર્ડિયો-ન્યુરો સેન્ટરમાં દાખલ કરાયા છે.
75 વર્ષીય ધનખડની પ્રાથમિક સારવાર ઘરે જ કરાઈ હતી, પરંતુ ચિંતા વધતાં તેમને AIIMS ખસેડાયા. હાલ તેમની સઘન સારવાર ચાલી રહી છે, જોકે સત્તાવાર મેડિકલ બુલેટિનની રાહ જોવાઈ રહી છે.
પ્રાપ્ત વિગતો અનુસાર, બુધવારે સવારે જ્યારે ધનખડ મોર્નિંગ વૉક કરી રહ્યા હતા ત્યારે અચાનક તેમની તબિયત બગડી હતી અને તેઓ બેભાન થઈને નીચે પડી ગયા હતા. તેઓ થોડી મિનિટો સુધી બેભાન અવસ્થામાં જ રહ્યા હતા. આ અણધારી સ્થિતિ સર્જાતાં તેમની સાથે તૈનાત સુરક્ષાકર્મીઓ તાત્કાલિક હરકતમાં આવી ગયા હતા અને તેમને સુરક્ષિત રીતે પોલીસ કંટ્રોલ રૂમ વાન મારફતે ઘરે પહોંચાડ્યા હતા.
ઘરે પહોંચ્યા બાદ તરત જ ઇન્સ્ટિટ્યૂટ ઑફ લિવર ઍન્ડ બિલિયરી સાયન્સિસની મેડિકલ ટીમ તેમજ દિલ્હી AIIMSના જાણીતા તબીબ ડૉ. સંદીપ સેઠને બોલાવવામાં આવ્યા હતા. તબીબોની વિશેષ ટીમે તેમનું પ્રાથમિક ચેકઅપ કર્યું હતું અને જરૂરી તબીબી સહાય પૂરી પાડી હતી.
ઘરે પ્રાથમિક તબીબી સહાય આપ્યા છતાં તેમના સ્વાસ્થ્યને લઈને સતત ચિંતા જળવાઈ રહી હતી. શરીરના મહત્ત્વપૂર્ણ પેરામીટર્સ અને વયને ધ્યાનમાં રાખીને કોઈપણ પ્રકારનું જોખમ ન લેવા માટે તેમને તાત્કાલિક સ્પેશિયલ એમ્બ્યુલન્સ મારફતે દિલ્હી AIIMS ખસેડવાનો નિર્ણય લેવાયો હતો. સૂત્રોના જણાવ્યા મુજબ, તેમને હૉસ્પિટલના અદ્યતન 'કાર્ડિયો-ન્યુરો સેન્ટર'માં દાખલ કરવામાં આવ્યા છે, જ્યાં કાર્ડિયોલોજી વિભાગના વરિષ્ઠ તબીબોની દેખરેખ હેઠળ તેમની સઘન તપાસ અને સારવાર શરૂ કરવામાં આવી છે.
પૂર્વ ઉપરાષ્ટ્રપતિની વર્તમાન સ્થિતિ અંગે હાલમાં કોઈ વિસ્તૃત મેડિકલ માહિતી સામે આવી નથી. AIIMS કે પરિવાર તરફથી પણ તેમના સ્વાસ્થ્યને લઈને હજુ સુધી કોઈ સત્તાવાર હેલ્થ બુલેટિન કે નિવેદન જાહેર કરવામાં આવ્યું નથી. તબીબો હાલમાં તેમના હૃદય અને ન્યુરોલોજીકલ સંબંધિત રિપોર્ટ્સનું ઝીણવટભર્યું મૂલ્યાંકન કરી રહ્યા છે.