ઈટાલીના મિલાનમાં હિંસક અથડામણો અને રમખાણો વચ્ચે ભારતે સોમવારે (19 ઓક્ટોબર, 2026) ઈટાલીમાં રહેતા તેના નાગરિકો માટે એડવાઈઝરી જાહેર કરી છે. ઈટાલીમાં ભારતીય દૂતાવાસે તેના નાગરિકોને રમખાણો અને હિંસક અથડામણો દરમિયાન સાવધાની રાખવા અને ભીડ તથા વિરોધથી પ્રભાવિત વિસ્તારોથી દૂર રહેવાની સલાહ આપી છે.
ભારતીય દૂતાવાસે સોશિયલ મીડિયા પ્લેટફોર્મ X પર આ સંદર્ભમાં એક પોસ્ટ શેર કરી હતી. પોસ્ટમાં દૂતાવાસે લખ્યું હતું કે, "ગયા અઠવાડિયે ઈટાલીના કેટલાક શહેરોમાં થયેલા વિરોધ અને રેલીઓને ધ્યાનમાં રાખીને ભારતીય દૂતાવાસે ભારતીય નાગરિકો માટે એડવાઈઝરી જાહેર કરી છે. અમે ભારતીય નાગરિકોને સતર્ક રહેવા અને ભીડવાળા વિસ્તારો તથા વિરોધ સ્થળોથી દૂર રહેવાની સલાહ આપીએ છીએ."
દૂતાવાસે જણાવ્યું કે, ઈટાલીમાં ભારતીય નાગરિકો કોઈપણ કટોકટીના સંજોગોમાં નીચેની કચેરીઓનો સંપર્ક કરી શકે છે:
- ભારતીય દૂતાવાસ, રોમ: +39 331 614 2085
- ભારતીય કોન્સ્યુલેટ જનરલ, મિલાન: +39 3881647527
ઉલ્લેખનીય છે કે, ઈટાલીમાં થયેલા વિરોધ પ્રદર્શનો પાછળના કારણો અંગે દૂતાવાસે કોઈ માહિતી આપી નથી. ભારતીય નાગરિકોએ સ્થાનિક સમાચારો પર નજર રાખવી અને સત્તાવાર સૂચનાઓનું પાલન કરવું જોઈએ.