દુબઈથી ઇઝરાયલ જઈ રહેલી ફ્લાઇટમાં 180 લોકોના જીવ બચાવનાર ભારતીય પાઇલટ કેપ્ટન સ્મિત મચ્છરની વિશ્વભરમાં પ્રશંસા થઈ રહી છે. હવે ઇઝરાયલી મૂળના ગાયક ઇતાય બેન ડેવિડે તેમને સમર્પિત એક હિન્દી ગીત ગાયું છે. આ ગીત સોશિયલ મીડિયા પર ઝડપથી વાઇરલ થઈ રહ્યું છે.
ઇતાય બેન ડેવિડે સોશિયલ મીડિયા પર શેર કરેલા વીડિયોમાં જણાવ્યું કે તેઓ હિન્દી બોલી શકતા નથી, પરંતુ બહાદુર પાઇલટ કેપ્ટન સ્મિત મચ્છર માટે તેઓ આ ગીત સમર્પિત કરી રહ્યા છે. તેમણે 2008માં આવેલી ફિલ્મ 'રબ ને બના દી જોડી'નું ગીત 'તુ હી તો જન્નત મેરી, તુ હી મેરા જુનૂન' ગાયું છે. આ ગીત ઇન્સ્ટાગ્રામ, ફેસબુક અને X પર લોકપ્રિય બની રહ્યું છે.
ઉલ્લેખનીય છે કે 30 સપ્ટેમ્બરે ફ્લાયદુબઈની ફ્લાઇટ FZ1073 દુબઈથી તેલ અવીવ જઈ રહી હતી. આ દરમિયાન ઓમાની કો-પાઇલટ હમામ અલ-હમામીએ ભારતીય કેપ્ટન સ્મિત મચ્છર પર કુહાડી વડે કોકપિટમાં હુમલો કર્યો હતો અને વિમાનને પોતાના કબજામાં લઈને તેને ક્રેશ કરવાનો પ્રયાસ કર્યો હતો. ભારતીય કેપ્ટન ઘાયલ હોવા છતાં કોકપિટનો દરવાજો ખોલવામાં સફળ રહ્યા હતા. ફ્લાઇટરડાર 24 મુજબ, હુમલા દરમિયાન વિમાન લગભગ એક મિનિટમાં 33 હજાર ફૂટથી 17 હજાર ફૂટ સુધી નીચે આવી ગયું હતું.
બાદમાં ક્રૂના સભ્યો અને કેટલાક મુસાફરો અંદર પહોંચ્યા. બધાએ મળીને હુમલાખોરને કાબૂમાં લીધો અને વિમાનનું નિયંત્રણ ફરીથી સ્થાપિત કર્યું. ત્યારબાદ વિમાનનું સાઉદી અરેબિયાના તબુકમાં ઇમરજન્સી લેન્ડિંગ કરવામાં આવ્યું અને વિમાનમાં સવાર તમામ 180 મુસાફરો સુરક્ષિત બચી ગયા. કેપ્ટન સ્મિતને હોસ્પિટલમાં દાખલ કરવામાં આવ્યા છે, જ્યાં તેમની સારવાર ચાલી રહી છે.
UAE સરકારે શનિવારે જણાવ્યું કે ઓમાનના કો-પાઇલટ હમામ અલ-હમામીએ ભારતીય પાઇલટ પર કુહાડીથી હુમલો કર્યો હતો. આ પહેલા વિમાનમાં હાજર મુસાફરોની પ્રાથમિક માહિતીમાં છરીથી હુમલો કરવામાં આવ્યો હોવાની વાત સામે આવી હતી. વિમાનમાં ઇમરજન્સી માટે એક ખાસ કુહાડી રાખવામાં આવે છે, જેને 'ક્રેશ એક્સ' કહેવામાં આવે છે. તેનો ઉપયોગ જરૂર પડવા પર કોઈ પેનલને કાપવા, આગ સુધી પહોંચવા અથવા ફસાયેલા લોકોને બહાર કાઢવાનો રસ્તો બનાવવા માટે થાય છે. સોશિયલ મીડિયા પર દાવો કરવામાં આવી રહ્યો છે કે આ જ ક્રેશ એક્સથી ભારતીય પાઇલટ પર હુમલો થયો.
હમામ અલ-હમામી ઓમાનનો રહેવાસી છે. અલ અરેબિયા ઇંગ્લિશ અનુસાર, તે લાંબા સમય સુધી સીરિયામાં રહ્યો હતો, જ્યાં તેના કટ્ટરપંથી વિચારોથી પ્રભાવિત થવાની વાત સામે આવી છે. ઇઝરાયલના ચેનલ 12ના રિપોર્ટમાં તેના અલ-કાયદાની વિચારધારાથી પ્રભાવિત હોવાનો દાવો કરવામાં આવ્યો છે. 2024માં તેને ઓમાનની નેશનલ એરલાઇનમાં પાઇલટ ટ્રેનિંગમાંથી હટાવી દેવામાં આવ્યો હતો. ફોક્સ ન્યૂઝ અનુસાર, એક સૂત્રએ દાવો કર્યો કે તે કટ્ટરપંથી ઇસ્લામિક વેબસાઇટ્સ જોતો હતો. પાછળથી તેને એરલાઇનમાં બીજી જવાબદારી આપવામાં આવી. તે પહેલા રોયલ એર મેરોક સાથે પણ કામ કરી ચૂક્યો હતો અને લગભગ 8 મહિના પહેલા ફ્લાયદુબઈ સાથે જોડાયો હતો.
આ સમાચાર વચ્ચે, વડાપ્રધાન નરેન્દ્ર મોદીએ ભારતના બહાદુર પાયલટ કેપ્ટન સ્મિત મચ્છર સાથે વાત કરી હતી. કેપ્ટન સ્મિતે પીએમ મોદીને ઘટનાની માહિતી આપતાં જણાવ્યું કે તેમને હિંમત કેવી રીતે મળી. પીએમએ તેમની બહાદુરીની પ્રશંસા કરી અને વહેલા સ્વસ્થ થવાની કામના કરી.