ભારતીય રેલવેની ઓનલાઈન ટિકિટ બુકિંગ સિસ્ટમ IRCTC પર ફરી એક વાર ટેક્નિકલ સમસ્યા સર્જાઈ છે. યુઝર્સને વેબસાઇટ અને એપ પર ટિકિટ બુક કરતી વખતે હાઈ લોડનો મેસેજ દેખાઈ રહ્યો છે, જેના કારણે ટિકિટ બુકિંગની પ્રક્રિયા અટકી પડી છે. રેલવે તરફથી હજુ સુધી આ સમસ્યા અંગે કોઈ સત્તાવાર નિવેદન આવ્યું નથી.
યુઝર્સની ફરિયાદ મુજબ, સૌથી વધુ મુશ્કેલી તત્કાલ ટિકિટ બુકિંગ દરમિયાન આવી રહી છે. વેબસાઇટનું પેજ ખુલતું જ નથી અથવા ખૂબ લાંબા સમય સુધી લોડ થતું રહે છે. યુઝર આઈડી અને પાસવર્ડ દાખલ કરતાં લૉગિન એરર આવી રહી છે. ટ્રેન પસંદ કરીને પેસેન્જરની વિગતો ભર્યા પછી પ્રક્રિયા આગળ વધતી નથી. ઘણા લોકોના ખાતામાંથી પૈસા કપાઈ ગયા છે, પરંતુ ટિકિટ કન્ફર્મ થવાનો મેસેજ તરત દેખાયો નથી.
IRCTCની વેબસાઇટ ડાઉન હોય ત્યારે યુઝર્સ કસ્ટમર કેર નંબર 14646, 08044647999 અને 08035734999 પર કૉલ કરી શકે છે. ઈમેલ etickets@irctc.co.in દ્વારા પણ પોતાની સમસ્યા જણાવી શકે છે. જો તાત્કાલિક જરૂરિયાત હોય તો કાઉન્ટર પર જઈને ટિકિટ બુક કરાવી શકે છે.
જો ખાતામાંથી પૈસા કપાઈ ગયા હોય અને ટિકિટ બની ન હોય, તો તુરંત ફરીથી ટિકિટ બુક ન કરો. પહેલાં 'My Transactions' અથવા 'Booked Ticket History' માં જઈને સ્ટેટસ જુઓ. જો ગૂગલ ક્રોમમાં તકલીફ આવી રહી હોય તો મોઝિલા અથવા ઇન્કૉગ્નિટો મોડ (પ્રાઇવેટ વિન્ડો)માં ટિકિટ બુક કરવાનો પ્રયાસ કરો. IRCTCના નિયમ મુજબ, જો પૈસા કપાઈ ગયા બાદ પણ ટિકિટ ન બની હોય, તો આ પૈસા 3થી 5 કામકાજના દિવસોમાં આપમેળે એ જ બેંક ખાતામાં પરત આવી જાય છે.
IRCTC એટલે કે ઇન્ડિયન રેલવે કેટરિંગ એન્ડ ટૂરિઝમ કોર્પોરેશન, રેલવે મંત્રાલય હેઠળની સરકારી કંપની છે, જે દેશમાં ઓનલાઈન ટિકિટ, કેટરિંગ અને ટૂરિઝમનું સંચાલન કરે છે. દરરોજ કરોડો લોકો તેના પર નિર્ભર રહે છે. જ્યારે પણ તત્કાલ બુકિંગ વિન્ડો સવારે 10 વાગ્યે અને 11 વાગ્યે ખુલે છે અથવા તહેવારોની સિઝન હોય છે, ત્યારે સર્વર પર અચાનક ભારે ટ્રાફિક આવી જાય છે. તેનાથી સિસ્ટમ પર ભાર વધે છે અને સાઇટ ધીમી પડી જાય છે અથવા લૉગિન એરર દેખાવા લાગે છે.