અમેરિકાએ ઈરાનના પ્રમુખ મસૂદ પેઝેશકિયાન અને વિદેશ મંત્રી અબ્બાસ અરાગચી સહિતના પ્રતિનિધિમંડળને આગામી અઠવાડિયે ન્યૂયોર્કમાં યોજાનારી સંયુક્ત રાષ્ટ્ર મહાસભામાં ભાગ લેવાની મંજૂરી આપી છે. અમેરિકા અને ઈઝરાયલ સાથે ચાલી રહેલા તણાવ વચ્ચે આ નિર્ણય લેવામાં આવ્યો છે.
અમેરિકન વિદેશ વિભાગે જણાવ્યું છે કે સંયુક્ત રાષ્ટ્રના યજમાન દેશ તરીકે પોતાની જવાબદારીઓ નિભાવતા ઈરાની પ્રતિનિધિમંડળને આ બેઠકમાં ભાગ લેવા દેવામાં આવશે. પ્રાપ્ત માહિતી અનુસાર, વીઝા મેળવનારાઓમાં ઈરાનના પ્રમુખ મસૂદ પેઝેશકિયાન અને વિદેશ મંત્રી અબ્બાસ અરાગચી પણ સામેલ છે.
ઉલ્લેખનીય છે કે ગત 28 ફેબ્રુઆરીથી ઈઝરાયલ અને અમેરિકાના હુમલા બાદ આ સંઘર્ષ શરૂ થયો હતો, જેના જવાબમાં તેહરાને પણ હુમલા કર્યા હતા. આ પહેલીવાર છે જ્યારે યુદ્ધ શરૂ થયા બાદ ઈરાનના બે ટોચના નેતાઓ અમેરિકા જવાના છે.
અમેરિકન વિદેશ વિભાગના પ્રવક્તાએ સ્પષ્ટ કર્યું છે કે ભલે પ્રતિનિધિમંડળને મંજૂરી મળી હોય, પરંતુ તેમના પર મુસાફરીના કડક પ્રતિબંધો લાગુ રહેશે. આ ઉપરાંત, વર્તમાન અમેરિકન નીતિ હેઠળ લક્ઝરી અને અન્ય સામાન ખરીદવા પર પણ રોક ચાલુ જ રહેશે.
સુરક્ષા અને વિદેશ નીતિ જેવા મુદ્દાઓને ધ્યાનમાં રાખીને અગાઉની જેમ જ ઈરાની અધિકારીઓની અવરજવર માત્ર સંયુક્ત રાષ્ટ્ર મુખ્યાલય, ઈરાની મિશન અને ત્યાંના એરપોર્ટ પૂરતી જ મર્યાદિત રાખવામાં આવશે.