અમેરિકા અને ઈરાન વચ્ચે છેલ્લા પાંચ મહિનાથી ચાલી રહેલો સંઘર્ષ દિન-પ્રતિદિન વધુ ગંભીર બનતો જઈ રહ્યો છે. આ સંઘર્ષ વચ્ચે એક મહત્વપૂર્ણ સમાચાર સામે આવ્યા છે, જેમાં ઈરાની હુમલાઓને કારણે બહેરીનમાં આવેલા અમેરિકન નૌસેનાના મુખ્ય મિલિટરી બેઝને ભારે નુકસાન પહોંચ્યું હોવાનું જણાવવામાં આવ્યું છે.
મીડિયા રિપોર્ટ મુજબ, ઈરાની હુમલાની તીવ્રતાને સ્વીકારતા વરિષ્ઠ અમેરિકન અધિકારીએ જણાવ્યું છે કે, 'ઈરાને બહેરીનમાં ભારે તબાહી મચાવી છે. આ હુમલો 'નેવલ સપોર્ટ એક્ટિવિટી બહેરીન' (NASB) બેઝ પર થયો હતો, જે અમેરિકન નૌસેનાની સેન્ટ્રલ કમાન્ડ અને યુએસ ફિફ્થ ફ્લિટનું મુખ્ય મુખ્યાલય છે. ઉલ્લેખનીય છે કે, ફેબ્રુઆરીના અંતથી અમેરિકા અને ઈઝરાયલ દ્વારા ઈરાન પર કરવામાં આવેલા હવાઈ હુમલાઓ બાદથી જ આ બેઝ સતત ઈરાનના નિશાના પર રહ્યો છે.'
આ ભારે તબાહી બાદ સવાલ એ ઊભો થઈ રહ્યો છે કે અમેરિકન સૈનિકો આ બેઝ પર ક્યારે પાછા ફરશે. ગત મહિનાની 31 તારીખે એક ટાઉન હૉલ દરમિયાન ચીફ ઓફ નવલ ઓપરેશન્સ એડમિરલ ડેરિલ કૉડલે સ્પષ્ટ કર્યું હતું કે, 'સૈનિકો હાલ ત્યાં પાછા નહીં ફરે અને તેઓ પોતાનો અંગત સામાન કાઢવા માટે પણ હમણાં ત્યાં જઈ શકે તેમ નથી. નૌસેના હાલ એ વાતની તપાસ કરી રહી છે કે શું આ બેઝનું રિપેરિંગ કરવું જોઈએ કે નહીં.'
આ સંઘર્ષ માત્ર બહેરીન પૂરતો સીમિત નથી, પરંતુ સમગ્ર વિસ્તારમાં અમેરિકન સૈન્ય ઠેકાણાં તેની ચપેટમાં આવી ગયા છે. મીડિયા રિપોર્ટ્સ મુજબ, ઈરાન દ્વારા જોર્ડનના મુવફ્ફક સાલ્ટી એર બેઝ પર કરવામાં આવેલા બેલિસ્ટિક મિસાઈલ હુમલામાં અમેરિકાના અનેક વિમાનોને નુકસાન થયું છે. આ દરમિયાન અમેરિકન સેનાએ 30થી વધુ પેટ્રિયટ મિસાઈલો દાગી હતી.
જેવી રીતે આ સંઘર્ષ વધી રહ્યો છે, તેમ ઈરાની દળોએ અમેરિકન નૌસેનાની સંપત્તિઓ અને શિપિંગ હિતોને પણ નિશાન બનાવવાનું શરૂ કરી દીધું છે. તાજેતરનો તણાવ ત્યારે વધુ વધ્યો જ્યારે અમેરિકાએ ઈરાનના પાંચ ઓઇલ ટેન્કરો પર હુમલા કર્યા અને અમેરિકન પ્રમુખ ડોનાલ્ડ ટ્રમ્પે વોશિંગ્ટનની ભૂમિકાની પુષ્ટિ કરતાં ભવિષ્યમાં પણ આવા હુમલા ચાલુ રહેવાની ચેતવણી આપી છે.