સત્ય. સાહસ. સંકલ્પ.

IPL 2027: શમી રાજસ્થાનમાં, હર્ષલ પટેલ ગુજરાત ટાઇટન્સમાં જોડાશે

IPL 2027: શમી રાજસ્થાનમાં, હર્ષલ પટેલ ગુજરાત ટાઇટન્સમાં જોડાશે

IPL 2027 સીઝન પહેલા રાજસ્થાન રોયલ્સ અને લખનઉ સુપર જાયન્ટ્સ વચ્ચે ત્રણ ખેલાડીઓની અદલાબદલી થઈ છે. ભારતીય ઝડપી બોલર મોહમ્મદ શમી રાજસ્થાન રોયલ્સમાં જોડાશે, જ્યારે ઇંગ્લેન્ડના ઓલરાઉન્ડર સેમ કરન લખનઉ સુપર જાયન્ટ્સમાં જશે. લખનઉના ડાબોડી સ્પિનર એમ. સિદ્ધાર્થ પણ રાજસ્થાન રોયલ્સ સાથે જોડાશે.

આ ઉપરાંત સનરાઇઝર્સ હૈદરાબાદના ઝડપી બોલર હર્ષલ પટેલ ગુજરાત ટાઇટન્સમાં જોડાશે. ESPNના અહેવાલ મુજબ, ગુજરાત ટાઇટન્સે આ ઓલ-કેશ ટ્રેડ માટે 4 કરોડ રૂપિયા ચૂકવવા સંમતિ આપી છે.

રાજસ્થાન રોયલ્સે ગયા સીઝનમાં પ્લેઓફમાં સ્થાન મેળવ્યું હોવા છતાં પાવરપ્લેમાં બોલિંગની નબળાઈનો સામનો કરવો પડ્યો હતો. ટીમે શરૂઆતની 6 ઓવરમાં પ્રતિ ઓવર 10.14 રન આપ્યા હતા. આ સ્થિતિમાં મોહમ્મદ શમીને ટીમમાં સામેલ કરવાનું પગલું પાવરપ્લે બોલિંગ મજબૂત કરવાની કોશિશ માનવામાં આવી રહી છે. તેમની જોડી જોફ્રા આર્ચર સાથે બની શકે છે.

36 વર્ષીય શમીએ IPL 2026માં લખનઉ સુપર જાયન્ટ્સ માટે 13 મેચમાં 12 વિકેટ ઝડપી હતી અને તેમનો ઇકોનોમી રેટ 9.00 રહ્યો હતો. 2024થી અત્યાર સુધી તેમણે પાવરપ્લેમાં 14 વિકેટ ઝડપી છે અને 8.76ની ઇકોનોમીથી રન આપ્યા છે. બીજી તરફ, IPL 2026માં લખનઉની પાવરપ્લે બોલિંગનો ઇકોનોમી રેટ 8.71 રહ્યો હતો અને ટીમે શરૂઆતની 6 ઓવરમાં 23 વિકેટ ઝડપી હતી, જેમાં શમીની મહત્વની ભૂમિકા રહી હતી.

લખનઉને સેમ કરનના રૂપમાં એવો ઓલરાઉન્ડર મળશે જે બેટિંગમાં અલગ-અલગ નંબરે ઉતરી શકે છે અને બોલિંગમાં પણ યોગદાન આપી શકે છે. કરન પંજાબ કિંગ્સ અને ચેન્નાઈ સુપર કિંગ્સ માટે રમી ચૂક્યા છે. લખનઉ તેમની ત્રીજી IPL ફ્રેન્ચાઇઝી હશે. ઈજાના કારણે તેઓ IPL 2026માં રમી શક્યા નહોતા. ઇંગ્લેન્ડના આ ઓલરાઉન્ડરે 2022માં ટીમને T-20 વર્લ્ડ કપ જીતાડવામાં મહત્વની ભૂમિકા ભજવી હતી અને તેમને ટુર્નામેન્ટના પ્લેયર ઓફ ધ ટુર્નામેન્ટ તથા ફાઇનલમાં પ્લેયર ઓફ ધ મેચ તરીકે પસંદ કરવામાં આવ્યા હતા.

કરણ લખનઉની આગેવાનીના દાવેદાર પણ બની શકે છે. ઋષભ પંત દિલ્હી કેપિટલ્સમાં પરત ફર્યા બાદ ટીમને નવા કેપ્ટનની જરૂર છે. જોકે, આગેવાનીની દોડમાં એડન માર્કરમ, નિકોલસ પૂરણ, મિચેલ માર્શ અને જોશ ઇંગ્લિસના નામ પણ સામેલ છે. સેમ કરને IPL 2024માં શિખર ધવન ઈજાગ્રસ્ત થયા બાદ પંજાબ કિંગ્સની કેપ્ટનશીપ કરી હતી.

લખનઉના ડાબોડી સ્પિનર એમ. સિદ્ધાર્થ પણ રાજસ્થાન રોયલ્સનો ભાગ બનશે. તમિલનાડુના 28 વર્ષીય સિદ્ધાર્થે IPLમાં અત્યાર સુધી 9 મેચ રમી છે અને તેમના નામે 9 વિકેટ છે. 2024ની સીઝનમાં તેમણે વિરાટ કોહલીની વિકેટ પણ ઝડપી હતી. IPL 2024માં 3 એપ્રિલે લખનઉ સુપર જાયન્ટ્સના ડાબોડી સ્પિનર એમ. સિદ્ધાર્થે વિરાટ કોહલીને આઉટ કરીને પોતાની પ્રથમ IPL વિકેટ મેળવી હતી.

સનરાઇઝર્સ હૈદરાબાદના ઝડપી બોલર હર્ષલ પટેલ IPL 2027માં ગુજરાત ટાઇટન્સ માટે રમશે. બંને ફ્રેન્ચાઇઝી વચ્ચે 4 કરોડ રૂપિયાની ઓલ-કેશ ડીલ પર સંમતિ થઈ છે, જેનો અર્થ એ છે કે ગુજરાતના ઓક્શન પર્સમાંથી 4 કરોડ રૂપિયા ઘટશે. હૈદરાબાદે હર્ષલને 2025ની મેગા ઓક્શનમાં 8 કરોડ રૂપિયામાં ખરીદ્યો હતો.

હર્ષલે IPL 2025માં 13 મેચમાં 16 વિકેટ લીધી હતી અને તેમનો ઇકોનોમી રેટ 9.80 રહ્યો હતો. પરંતુ IPL 2026માં તેમને માત્ર 5 મેચ રમવાની તક મળી અને તેઓ એક પણ વિકેટ લઈ શક્યા નહોતા. હર્ષલ બે વખત IPLમાં પર્પલ કેપ જીતી ચૂક્યા છે. 2021માં તેમણે રોયલ ચેલેન્જર્સ બેંગલુરુ માટે 32 વિકેટ લીધી હતી, જ્યારે 2024માં પંજાબ કિંગ્સ માટે 24 વિકેટ લઈને તેઓ સૌથી વધુ વિકેટ લેનારા બોલર બન્યા હતા. તેઓ અત્યાર સુધી RCB, દિલ્હી કેપિટલ્સ, પંજાબ કિંગ્સ અને SRH માટે રમી ચૂક્યા છે. ગુજરાત તેમની પાંચમી IPL ફ્રેન્ચાઇઝી હશે. હર્ષલ પટેલ IPLની 124 મેચોમાં 151 વિકેટ લઈ ચૂક્યા છે.

IPL 2027 માટે તમામ 10 ટીમે 17 નવેમ્બર સુધી પોતાના રિટેન અને રિલીઝ કરાયેલા ખેલાડીઓની યાદી જમા કરાવવાની છે. BCCIએ અગાઉ આ તારીખ 15 નવેમ્બર નક્કી કરી હતી, પરંતુ ભારત-ન્યૂઝીલેન્ડ વચ્ચેની પાંચમી વન-ડે સાથે તારીખ અથડાતી હોવાથી તેને બે દિવસ આગળ વધારી દેવામાં આવી છે.

આ વખતે મિની ઓક્શનમાં ખેલાડીઓને રિટેન કરવાની કોઈ નિશ્ચિત મર્યાદા નથી. એક ટીમમાં વધુમાં વધુ 25 ખેલાડીઓ હોઈ શકે છે, જેમાં 8થી વધુ વિદેશી ખેલાડીઓને સામેલ કરી શકાશે નહીં. દરેક ટીમનું કુલ સેલરી કેપ 157 કરોડ રૂપિયા છે. રિટેન અને ટ્રેડ દ્વારા આવેલા ખેલાડીઓની ફી પણ આ જ બજેટમાં ગણવામાં આવશે.