IPLની 2027 સીઝન માટે ખેલાડીઓનું ઓક્શન (હરાજી) 16 ડિસેમ્બરે ગોવામાં યોજાશે. તે પહેલાં તમામ 10 ટીમોએ 15 નવેમ્બર સુધીમાં જણાવવું પડશે કે તેઓ પોતાના વર્તમાન ખેલાડીઓમાંથી કોને રિટેઇન કરવા માગે છે.
16 ડિસેમ્બરે જ ભારત અને શ્રીલંકા વચ્ચેની બીજી વનડે બેંગલુરુમાં રમાવાની છે. શ્રીલંકાની ટીમ 13 ડિસેમ્બરથી ભારતના પ્રવાસે રહેશે. આ પ્રવાસમાં 3 વનડે અને 3 T-20 મેચ રમાશે.
ત્રણ વર્ષ બાદ ભારતમાં શા માટે થઈ રહી છે હરાજી?
અગાઉની ત્રણ હરાજી ભારતની બહાર યોજાઈ હતી. 2024માં દુબઈ, 2025 માટે સાઉદી અરેબિયાના જેદ્દાહ અને 2026માં અબુ ધાબીમાં ઓક્શન યોજાયું હતું.
હરાજીમાં દરેક ટીમના માલિકો અને અધિકારીઓ ઉપરાંત કોચિંગ સ્ટાફ પણ સામેલ હોય છે. આટલા બધા લોકો માટે વિદેશ પ્રવાસ, હોટેલ, પરિવહન અને અન્ય વ્યવસ્થાઓ કરવી ખર્ચાળ હોવાની સાથે-સાથે જટિલ પણ હોય છે. આ જ કારણે આ વખતની હરાજી ભારતમાં યોજાઈ રહી છે.
15 નવેમ્બરની સમયમર્યાદા પછી શું થશે?
ખેલાડીઓને જાળવી રાખવાની સમયમર્યાદા પૂરી થયા બાદ IPL તમામ ફ્રેન્ચાઇઝીઓને ઓક્શનમાં ઉપલબ્ધ ખેલાડીઓની યાદી મોકલશે. ટીમો આ યાદીમાંથી એવા ખેલાડીઓને પસંદ કરશે, જેમના પર તેઓ બોલી લગાવવા માગે છે. ત્યારબાદ અંતિમ યાદી તૈયાર થશે અને ઓક્શન પહેલાં ખેલાડીઓના અલગ-અલગ સેટમાં આવવાનો ક્રમ પણ જણાવવામાં આવશે.
આ પ્રક્રિયાનો અર્થ એ છે કે ઓક્શનના દિવસે જ ટીમો પહેલીવાર ખેલાડીઓનાં નામ નહીં જુએ. તેઓ પહેલેથી જ પોતાની જરૂરિયાતોનું મૂલ્યાંકન કરશે. જેમ કે કોઈ ટીમને ઝડપી બોલર જોઈએ, કોઈને મિડલ ઓવરોમાં વિકેટ લેનારો સ્પિનર અને કોઈને દબાણમાં ઝડપથી રન બનાવનારો બેટર. ત્યારબાદ નક્કી કરાયેલા બજેટ અનુસાર ખેલાડીઓ પર બોલી લગાવવામાં આવશે.
આથી BCCIએ ઓક્શન અને રિટેન્શન વચ્ચે એક મહિનાનું અંતર રાખ્યું છે.
મિની ઓક્શન અને મેગા ઓક્શનમાં શું તફાવત છે?
IPLમાં ખેલાડીઓની હરાજી બે રીતે થાય છે. મિની ઓક્શનમાં ટીમો પોતાના વર્તમાન ખેલાડીઓના મોટા હિસ્સાને જાળવી રાખી શકે છે અને ખાલી જગ્યાઓ ભરવા માટે નવા ખેલાડીઓને ખરીદે છે. મેગા ઓક્શનમાં ટીમોને મોટા પાયે ફેરફાર કરવાની તક મળે છે અને ફ્રેન્ચાઇઝીઓને પોતાની ટીમ ફરીથી તૈયાર કરવી પડી શકે છે. IPL 2027માં મિની ઓક્શન યોજાશે.
મિની ઓક્શનમાં કયા ખેલાડીઓ પર લાગી શકે છે મોટી બોલી?
1. કેમરન ગ્રીન- ₹25.20 કરોડ
કોલકાતા નાઇટ રાઇડર્સે 2026ની હરાજીમાં ઓસ્ટ્રેલિયાના ઑલરાઉન્ડર કેમરન ગ્રીન પર ₹25.20 કરોડ ખર્ચ્યા હતા. તેમની પાસેથી બેટિંગની સાથે બોલિંગમાં પણ યોગદાનની અપેક્ષા હતી.
2026ની સિઝનમાં તેમણે 14 મેચમાં 322 રન બનાવ્યા અને 7 વિકેટ લીધી. તેમનું પ્રદર્શન ઉપયોગી રહ્યું, પરંતુ આટલા મોટા રોકાણને ધ્યાનમાં રાખીને ટીમ મૂલ્યાંકન કરી શકે છે કે તેમને જાળવી રાખવું કેટલું ફાયદાકારક રહેશે.
2. મથીશ પથિરાના- ₹18 કરોડ
શ્રીલંકાના ફાસ્ટ બોલર મથીશા પથિરાનાને કોલકાતાએ ₹18 કરોડમાં ખરીદ્યા હતા. જોકે ઈજાને કારણે તેઓ આખી સિઝન રમી શક્યા નહોતા. આવી સ્થિતિમાં KKR તેમને રિલીઝ કરી શકે છે.
3. પ્રશાંત વીર- ₹14.20 કરોડ
ચેન્નઈ સુપર કિંગ્સે અનકેપ્ડ ઑલરાઉન્ડર પ્રશાંત વીર પર 2026ની હરાજીમાં ₹14.20 કરોડ ખર્ચ્યા હતા. અનકેપ્ડનો અર્થ એવા ખેલાડીથી છે, જેણે હજુ ઈન્ટરનેશનલ ક્રિકેટ રમી ન હોય.
વીરે IPL 2026માં 6 મેચ રમી અને 90 રન બનાવ્યા. આટલી મોટી રકમ ખર્ચ્યા બાદ ટીમ તેમના યોગદાનની સમીક્ષા કરી શકે છે.
ટ્રેડ વિન્ડોમાં અત્યાર સુધી માત્ર બે સોદા
હરાજી પહેલાં ખેલાડીઓની અદલાબદલી માટે ટ્રેડ વિન્ડો પણ ખુલ્લી રહે છે. આ દરમિયાન બે ફ્રેન્ચાઇઝી પરસ્પર સંમતિથી પોતાના ખેલાડીઓનું ટ્રાન્સફર કરી શકે છે.
2026 સીઝન પૂરી થયા બાદ અત્યાર સુધીમાં બે ટ્રેડ સામે આવ્યા છે. જૂનમાં લખનૌ સુપર જાયન્ટ્સે પોતાના કેપ્ટન રિષભ પંતને દિલ્હી કેપિટલ્સ સાથે ટ્રેડ કર્યો અને બદલામાં સ્પિનર કુલદીપ યાદવને લીધો.
આ પછી દિલ્હી કેપિટલ્સે ઝડપી બોલર ટી. નટરાજનને સનરાઇઝર્સ હૈદરાબાદને મોકલ્યા અને બદલામાં લેગ સ્પિનર ઝીશાન અન્સારીને લીધો.
IPLના નિયમો મુજબ ટ્રેડ વિન્ડો એક સીઝન પૂરી થયાના એક મહિના બાદ ખુલે છે. તે હરાજીના એક અઠવાડિયા પહેલાં સુધી ચાલુ રહે છે અને ત્યાર બાદ આગામી સીઝનની શરૂઆતના એક મહિના પહેલાં સુધી ફરીથી ચાલુ રહી શકે છે.
IPL 2027 ક્યારે શરૂ થશે?
BCCIએ IPL 2027 સીઝનની તારીખોને હજી અંતિમ સ્વરૂપ આપ્યું નથી. 2024માં બોર્ડે આગામી ત્રણ સીઝન માટે 14 માર્ચથી 30 મે સુધીનો સંભવિત આયોજન સમય નક્કી કર્યો હતો. જોકે, સપ્ટેમ્બર 2026માં BCCIના સચિવ દેવજીત સૈકિયાએ સંકેત આપ્યો હતો કે આગામી સીઝન માર્ચના અંતમાં શરૂ થઈ શકે છે.