દિલ્હીથી ચેન્નઈ જતી ઇન્ડિગોની ફ્લાઇટને હૈદરાબાદમાં ઇમરજન્સી લેન્ડિંગ કરવું પડ્યું છે. કારણ કે, વિમાનમાં એક મુસાફરનો પાવરબેંક અચાનક ફાટી નીકળ્યો હતો, જેના કારણે ઓવરહેડ બિનમાં આગ લાગી ગઈ હતી.
ઘટના કેવી રીતે બની?
દિલ્હીથી ચેન્નઈ જઈ રહેલી ઇન્ડિગોની ફ્લાઇટમાં મુસાફરોની બેઠકોની ઉપર બનેલા ઓવરહેડ બિનમાં એક પેસેન્જરના પાવર બેંકમાં બ્લાસ્ટ થયો હતો, જેના કારણે ત્યાં રાખેલી બેગમાં આગ લાગી ગઈ. ધુમાડો નીકળતો જોઈને અન્ય મુસાફરોએ ક્રૂને તેની જાણ કરી. ત્યારબાદ પ્લેનને હૈદરાબાદ ડાયવર્ટ કરવામાં આવ્યું. ઈન્ડિગોએ નિવેદનમાં જણાવ્યું કે આગ લાગ્યાની જાણ થતાં જ કેબિન ક્રૂએ તાત્કાલિક કાર્યવાહી કરી અને સ્થિતિને કાબૂમાં લઈ લીધી. ત્યારબાદ પાઇલટે વિમાનને હૈદરાબાદ ડાયવર્ટ કર્યું. ઈન્ડિગોએ જણાવ્યું કે મુસાફરોને ચેન્નઈ પહોંચાડવા માટે બીજા વિમાનની વ્યવસ્થા કરવામાં આવી છે.
વીડિયો વાઇરલ, મુસાફરો ફાયર-ફાયર બૂમો પાડતા જોવા મળ્યા
આ ઘટનાનો એક વીડિયો સોશિયલ મીડિયા પર સામે આવ્યો છે, જેમાં મુસાફરો ફાયર-ફાયર બૂમો પાડતા નજરે પડી રહ્યા છે. ત્યારબાદ ત્યાં બેઠેલા અન્ય મુસાફરો ઓવરહેડ બિનમાંથી સામાન હટાવતા દેખાઈ રહ્યા છે. જોકે, થોડીવારમાં જ આગ બુઝાવી દેવામાં આવી હતી.
ગયા અઠવાડિયે પણ ઇન્ડિગોની ફ્લાઇટ પર વીજળી પડી હતી
આ પહેલાં બુધવારે સાંજે પટનાથી લખનઉ આવી રહેલી ઇન્ડિગોની એક ફ્લાઇટ ખરાબ હવામાન દરમિયાન આકાશીય વીજળીની ઝપેટમાં આવી ગઈ હતી. જેના કારણે વિમાનનો આગળનો ભાગ એટલે કે નોઝ ક્ષતિગ્રસ્ત થયો હતો. જે સમયે વિમાન વીજળીની ઝપેટમાં આવ્યું, તે સમયે તે લગભગ 17 હજાર ફૂટની ઊંચાઈ પર હતું. જોકે, પાયલટે પોતાની સમજદારીથી વિમાનનું લખનૌ એરપોર્ટ પર સુરક્ષિત લેન્ડિંગ કરાવ્યું. વિમાનમાં 150 મુસાફરો સવાર હતા અને તમામ સુરક્ષિત છે.
પટનાથી અમદાવાદ જવાનું હતું, લખનઉમાં જ રોકવામાં આવ્યું વિમાન
ઇન્ડિગો વિમાને બુધવારે બપોરે 3:10 વાગ્યે પટના એરપોર્ટ પરથી ઉડાન ભરી હતી. આ જ વિમાનને સાંજે 5:05 વાગ્યે લખનૌથી અમદાવાદ જવાનું હતું. એરપોર્ટના સૂત્રો અનુસાર, 17 હજાર ફૂટની ઊંચાઈએ વીજળીની ચપેટમાં આવ્યા બાદ વિમાન સાંજે 4:05 વાગ્યે લખનઉ એરપોર્ટ પર ઉતર્યું. જ્યારે તેને સાંજે 4:20 વાગ્યે પહોંચવાનું હતું. તકનીકી સમસ્યા સર્જાયા બાદ વિમાનને લખનઉ એરપોર્ટ પર જ રોકી દેવામાં આવ્યું. મુસાફરો માટે ઇન્ડિગોએ બીજા વિમાનની વ્યવસ્થા કરી. તમામ મુસાફરોને સાંજે 6:22 વાગ્યે અમદાવાદ માટે રવાના કરવામાં આવ્યા. એન્જિનિયરોની ટીમ ક્ષતિગ્રસ્ત વિમાનની તપાસ કરી રહી છે.
19 જૂને પણ ઇન્ડિગોની ફ્લાઇટ પર વીજળી પડી હતી
વાવાઝોડાને કારણે 19 જૂન, 2026ના રોજ કોલકાતા એરપોર્ટ પર ઊભેલા ઇન્ડિગોના એક વિમાન (6E6068) પર વીજળી પડી હતી. જોકે, આ ઘટનામાં કોઈ મુસાફર ઘાયલ થયો નહોતો. વિમાનમાં સવાર તમામ 141 મુસાફરો અને 6 ક્રૂ સભ્યોને ઉતારી લેવામાં આવ્યા હતા. બાદમાં તેમને બીજા વિમાન દ્વારા અગરતલા મોકલવામાં આવ્યા હતા.
ઉડાન દરમિયાન પ્લેન પર વીજળી પડવી કેટલું ખતરનાક
વિમાન પર વીજળી કેવી રીતે પડે છે: આકાશીય વીજળી સામાન્ય રીતે વિમાનના નોઝ અથવા વિંગટિપ જેવા આગળના અણીદાર ભાગ સાથે જ અથડાય છે. ત્યારબાદ કરંટ વિમાનની બાહ્ય સપાટી પરથી પસાર થાય છે. આ કરંટ વિમાનના પાછળના ભાગ એટલે કે ટેલમાંથી બહાર નીકળી જાય છે.
વીજળીથી વિમાનને વધારે નુકસાન થતું નથી: સામાન્ય રીતે આકાશીય વીજળીની ઝપેટમાં આવવાથી વિમાનને ખૂબ ઓછું નુકસાન થાય છે. હકીકતમાં, વિમાનની બાહ્ય સપાટી એવી રીતે બનાવવામાં આવે છે કે કરંટ બહારથી જ પસાર થઈ જાય. ઘણા કિસ્સાઓમાં માત્ર નાના નિશાન અથવા નાના છિદ્રો દેખાય છે. જોકે, વીજળીની ઝપેટમાં આવ્યા બાદ વિમાનની તકનીકી તપાસ કરવામાં આવે છે.
મુસાફરોને વીજળીનો ઝટકો લાગતો નથી: વિમાનની બાહ્ય રચના વીજળીને મુસાફરોથી દૂર રાખવાનું કામ કરે છે. તેથી અંદર બેઠેલા મુસાફરોને વીજળીનો ઝટકો લાગતો નથી. વીજળી પડતી વખતે મુસાફરોને તેજ ચમક અને જોરદાર અવાજ જરૂર સંભળાઈ શકે છે. જો વિમાનની સિસ્ટમ સામાન્ય હોય, તો તે પોતાની ઉડાન ચાલુ રાખી શકે છે. પરંતુ લેન્ડિંગ બાદ વિમાનની તકનીકી તપાસ જરૂરી હોય છે. નુકસાન જણાય તો વિમાનને આગળ ઉડાવવાની મંજૂરી આપવામાં આવતી નથી.