પટનાથી લખનઉ જઈ રહેલી ઈન્ડિગો એરલાઈન્સની ફ્લાઇટ બુધવાર, 7 ઓક્ટોબર, 2026ની સાંજે ખરાબ હવામાન વચ્ચે આકાશી વીજળીની ચપેટમાં આવી ગઈ હતી. લખનઉ નજીક પહોંચતી વખતે વિમાન લગભગ 17 હજાર ફૂટની ઊંચાઈ પર હતું. તે સમયે વિમાન પર વીજળી પડવાની ઘટના બની હતી.
સદનસીબે, વીજળી પડવા છતાં વિમાનનું સંચાલન સામાન્ય રહ્યું અને પાયલોટે કોઈ મુશ્કેલી વિના વિમાનને લખનઉના ચૌધરી ચરણ સિંહ આંતરરાષ્ટ્રીય એરપોર્ટ પર સુરક્ષિત રીતે લેન્ડ કરાવ્યું. જોકે, ઘટના દરમિયાન વિમાનમાં સવાર લગભગ 104 મુસાફરોમાં થોડા સમય માટે ગભરાટ ફેલાયો હતો. એરલાઈન્સ તરફથી જણાવાયું છે કે તમામ મુસાફરો સુરક્ષિત છે.
ઈન્ડિગોની નિર્ધારિત ઘરેલું ફ્લાઇટ 6E925 પટનાથી બપોરે 3:10 વાગ્યે લખનઉ માટે રવાના થઈ હતી. તે સાંજે 4:20 વાગ્યે લખનઉ પહોંચવાની હતી, પરંતુ ખરાબ હવામાનને કારણે વિમાન લગભગ 4:05 વાગ્યે જ લખનઉ એરપોર્ટ પર લેન્ડ થઈ ગયું હતું.
લખનઉ પહોંચ્યા બાદ આ જ વિમાનને ઈન્ડિગોની ફ્લાઇટ 6E6968 તરીકે સાંજે 5:05 વાગ્યે અમદાવાદ માટે રવાના થવાનું હતું. જોકે, વિમાનની તપાસ દરમિયાન તેમાં ટેકનિકલ ખામી સામે આવી હતી. ત્યારબાદ વિમાનને એરપોર્ટ પર જ રોકી દેવામાં આવ્યું હતું.
મુસાફરોને વધુ મુશ્કેલી ન પડે તે માટે ઈન્ડિગો એરલાઈન્સે બીજા વિમાનની વ્યવસ્થા કરી હતી. ત્યારબાદ મુસાફરોને બીજા વિમાન મારફતે સાંજે લગભગ 6:22 વાગ્યે અમદાવાદ માટે રવાના કરવામાં આવ્યા હતા.
પટના-લખનઉ ઈન્ડિગો ફ્લાઈટ સાથે બનેલી આ ઘટના જૂનમાં બનેલી અન્ય એક ઘટના બાદ થોડા મહિના પછી બની છે. 19 જૂને વાવાઝોડા દરમિયાન કોલકાતા એરપોર્ટ પર ઊભેલા ઈન્ડિગોના એક વિમાન પર પણ વીજળી પડી હતી.
આ વિમાન અગરતલા માટે રવાના થવાનું હતું ત્યારે તેના પર આકાશી વીજળી પડી હતી, જેના કારણે તેની પાવર સિસ્ટમને ભારે અસર થઈ હતી. ઘટના બાદ એરલાઈને વિમાનમાં સવાર તમામ 141 મુસાફરો અને 6 ક્રૂ સભ્યોને વિમાનમાંથી ઉતારી દીધા હતા. બાદમાં મુસાફરોને બીજા વિમાન મારફતે અગરતલા પહોંચાડવામાં આવ્યા હતા.