ભારત સરકારે રશિયન સેનામાં ફસાયેલા 140 ભારતીય નાગરિકોને મુક્ત કરાવ્યા છે. જોકે, હજુ 55 ભારતીયો રશિયન સેનામાં હોવાની આશંકા છે. તેમને પરત લાવવા માટે ભારત અને રશિયા વચ્ચે ઉચ્ચ સ્તરે વાતચીત ચાલી રહી છે.
ભારત-રશિયા કન્સલ્ટેટિવ કમિટીની બેઠક બાદ આ માહિતી સામે આવી છે. ભારત સરકારે રશિયન સૈન્યમાં ફસાયેલા તમામ ભારતીય નાગરિકોને ઝડપથી મુક્ત કરાવવા માટે રશિયાના ઉચ્ચ અધિકારીઓ સાથે સતત સંપર્ક જાળવી રાખ્યો છે. અત્યાર સુધીમાં આશરે 140 ભારતીયોને સેનામાંથી મુક્ત કરાવવામાં આવ્યા છે. હાલમાં ભારતીય પક્ષ રશિયન સેનામાં હોવાની આશંકા ધરાવતા બાકીના 55 ભારતીયો વિશે ચોક્કસ માહિતી મેળવવા માટે રશિયન તંત્ર સાથે સંકલન કરી રહ્યું છે.
આ દરમિયાન ભારતીય તપાસ એજન્સીઓ ગેરકાયદેસર રીતે લોકોને વિદેશ મોકલતા છેતરપિંડી કરતા એજન્ટો સામે કડક કાનૂની કાર્યવાહી કરી રહી છે.
આ આંકડા અગાઉ વિદેશ સચિવ વિક્રમ મિસરી દ્વારા આપવામાં આવેલી માહિતીને અનુરૂપ છે. વિદેશ સચિવે જણાવ્યું હતું કે રશિયન સૈન્યમાં સામેલ થયેલા 227 ભારતીય નાગરિકોમાંથી 139 લોકોને સેવામાંથી મુક્ત કરાયા હતા, જ્યારે કમનસીબે 51 ભારતીયોના મોત થયા હતા. ભારત સરકારે આ ગંભીર મુદ્દો રશિયા સમક્ષ વિવિધ તબક્કે અને વિવિધ સ્તરે મજબૂતીથી ઉઠાવ્યો છે.
હજુ પણ રશિયન સૈન્યમાં ફરજ બજાવી રહેલા તમામ ભારતીયોને વહેલી તકે મુક્ત કરાવવા અને તેમને સુરક્ષિત રીતે ભારત પાછા લાવવા માટે નવી દિલ્હી મોસ્કો સાથે સતત વાતચીત કરી રહ્યું છે. વિદેશ મંત્રાલય દ્વારા સમગ્ર પરિસ્થિતિ પર સતત નજર રાખવામાં આવી રહી છે જેથી કોઈ પણ ભારતીય નાગરિક ત્યાં જોખમમાં ન રહે.