નવી દિલ્હી: અમેરિકાના દૂતાવાસે 9 ભારતીય પહેલવાનોને વિઝા આપવાનો ઇનકાર કર્યો છે. આ પહેલવાનો લાસ વેગાસમાં 12થી 18 ઑક્ટોબર દરમિયાન યોજાનારી U23 વર્લ્ડ રેસલિંગ ચેમ્પિયનશિપમાં ભાગ લેવા માંગતા હતા. વિઝા ન મળવાને કારણે તેમની ભાગીદારી પર સવાલો ઊભા થયા છે.
વિઝા માટે બુધવારે નવી દિલ્હી સ્થિત અમેરિકી દૂતાવાસમાં ઇન્ટરવ્યૂ યોજાયો હતો. ઇન્ટરવ્યૂમાં ભાગ લેનારા પહેલવાનોને મૌખિક રીતે જણાવવામાં આવ્યું કે 20 વર્ષથી ઓછી ઉંમર અને રોજગાર ન હોવાને કારણે તેમની અરજીઓ નામંજૂર કરવામાં આવી છે. ઇન્ટરવ્યૂ બાદ તેમના પાસપોર્ટ પણ પરત કરી દેવામાં આવ્યા હતા.
વિઝા ન મળનારાઓમાં 2024ની U17 વર્લ્ડ ચેમ્પિયન નેહા સાંગવાન પણ સામેલ છે. ઉપરાંત સમર્થ ગજાનન મ્હાકાવે, ધીરજ કુમાર મલિક, સચિન કુમાર, નિખિલ, હરદીપ, પરવીન, અહિલ્યા શત્રુઘ્ન શિંદે, નેહા શર્મા અને નેહા સાંગવાનનો સમાવેશ થાય છે. નેહા શર્મા U23ની 55 કિગ્રા અને 57 કિગ્રા કેટેગરીમાં કુસ્તી કરે છે.
રેસલિંગ ફેડરેશન ઑફ ઇન્ડિયા (WFI)એ અમેરિકી દૂતાવાસને પત્ર લખીને નિર્ણય પર ફરીથી વિચાર કરવાની અપીલ કરી છે. ફેડરેશને જણાવ્યું કે આ ચેમ્પિયનશિપ U23 વયજૂથ માટે છે, જેમાં ભાગ લેનારા પહેલવાનોની ઉંમર 18થી 23 વર્ષની વચ્ચે હોય છે. ઘણા યુવા ખેલાડીઓ હાલમાં સંપૂર્ણપણે પોતાની રમતગમતની કારકિર્દી પર ધ્યાન કેન્દ્રિત કરી રહ્યા છે, તેથી તેમના માટે ઔપચારિક રીતે નોકરીમાં હોવું જરૂરી નથી.
WFIએ અમેરિકન દૂતાવાસને મોકલેલા પત્રમાં જણાવ્યું કે બુધવારે કુલ 24 પ્રતિભાગીઓ વિઝા એપોઇન્ટમેન્ટ માટે પહોંચ્યા હતા. તેમાં 16 રેસલર્સ હતા અને તેમાંથી નવના વિઝા અરજીઓ ફગાવી દેવામાં આવી હતી.
ફેડરેશને ગુરુવારે ઇન્ટરવ્યૂ આપનારા પહેલવાનોને લઈને પણ ચિંતા વ્યક્ત કરી છે. ફેડરેશનના જણાવ્યા મુજબ, ગુરુવારે ઇન્ટરવ્યૂ આપનારા મોટાભાગના પહેલવાનો પણ 20 વર્ષથી ઓછી ઉંમરના અને હાલમાં બેરોજગાર છે. તેથી WFIને આશંકા છે કે તેમની અરજીઓ સાથે પણ આવી જ સ્થિતિ ઊભી થઈ શકે છે.