નાગોયામાં યોજાયેલી 2026 એશિયન ગેમ્સમાં ભારતીય મહિલા હોકી ટીમે ઇતિહાસ રચ્યો છે. ટીમે ફાઇનલમાં ચીનને 1-0થી હરાવીને 44 વર્ષ બાદ ગોલ્ડ મેડલ જીત્યો છે. આ જીત સાથે ટીમે 2028 લોસ એન્જલસ ઓલિમ્પિક માટે સીધો સ્થાન પણ મેળવી લીધો છે.
ભારતીય મહિલા હોકી ટીમે 1982માં નવી દિલ્હીમાં યોજાયેલી એશિયન ગેમ્સમાં પ્રથમ વખત ગોલ્ડ મેડલ જીત્યો હતો. ત્યાર બાદ ટીમ ઘણી વખત ફાઇનલમાં પહોંચી, પરંતુ સિલ્વર મેડલથી સંતોષ માનવો પડ્યો હતો. આ વખતે ટીમે ચીનની મજબૂત ટીમને હરાવીને સુવર્ણ ચંદ્રક જીત્યો છે.
આ ઐતિહાસિક સિદ્ધિને બિરદાવતા હોકી ઇન્ડિયાએ ટીમના દરેક ખેલાડીને 11 લાખ રૂપિયાની ઇનામી રકમ જાહેર કરી છે. સોશિયલ મીડિયા પર આ જાહેરાત કરતાં હોકી ઇન્ડિયાએ લખ્યું, 'મહિલાઓને એશિયામાં ટોચ પર પહોંચાડનારી સખત મહેનત, સમર્પણ અને અવિરત પ્રયાસોને સન્માન.'
ફક્ત ખેલાડીઓ જ નહીં, પડદા પાછળ કામ કરતા સપોર્ટ સ્ટાફના યોગદાનને પણ માન્યતા આપવામાં આવી છે. સપોર્ટ સ્ટાફના દરેક સભ્યને 5.5 લાખ રૂપિયાની ઇનામી રકમ આપવામાં આવશે.
આ જીત ભારતીય રમતગમતના ઇતિહાસમાં સૌથી ભવ્ય ક્ષણોમાંની એક ગણાય છે. હોકી ઇન્ડિયાના આ પગલાથી આગામી આંતરરાષ્ટ્રીય ટુર્નામેન્ટો માટે ખેલાડીઓનો આત્મવિશ્વાસ વધશે તેવી આશા છે.