પાકિસ્તાનના કરાચી બંદર પર છ ભારતીય નાવિકો છેલ્લા સાત મહિનાથી ફસાયેલા છે. જહાજ કંપની અને બંદર અધિકારીઓ વચ્ચેના વિવાદને કારણે તેમની મુશ્કેલીઓ વધી છે. આ નાવિકોમાં ઉત્તર પ્રદેશના પ્રયાગરાજના રહેવાસી વિનીત કિશોર મિશ્રાનો પણ સમાવેશ થાય છે.
પરિવારજનોના જણાવ્યા અનુસાર, આ જહાજ 17 એપ્રિલ, 2026થી કરાચી બંદર પર અટકેલું છે. જહાજમાં વીજળીની સુવિધા બંધ કરી દેવામાં આવી છે અને મોબાઇલ નેટવર્ક પણ યોગ્ય રીતે કામ કરતું નથી. જેના કારણે જહાજમાં હાજર ભારતીય નાવિકો સાથે નિયમિત સંપર્ક કરવો મુશ્કેલ બન્યો છે. પરિવારનો આરોપ છે કે તમામ છ ભારતીય નાવિકોના પાસપોર્ટ અને સી-બુક જપ્ત કરી લેવામાં આવ્યા છે. વિનીતનો નોકરીનો કરાર અને કાર્યકાળ પૂર્ણ થઈ ગયો હોવા છતાં તેને જહાજ છોડીને ભારત પરત ફરવાની મંજૂરી આપવામાં આવી રહી નથી.
વિનીત કિશોર મિશ્રા છેલ્લા દસ વર્ષથી મર્ચન્ટ નેવીમાં ફરજ બજાવે છે. પરિવારના જણાવ્યા મુજબ, તેમણે 25 ફેબ્રુઆરી, 2026ના રોજ એક ઈરાની શિપિંગ કંપનીમાં કામ શરૂ કર્યું હતું. ત્યારબાદ તેઓ કંપનીના જહાજમાં ઓમાનથી રવાના થયા હતા. જોકે, 17 એપ્રિલે જહાજ કરાચી બંદરે પહોંચ્યા બાદ કંપની અને બંદર અધિકારીઓ વચ્ચે વિવાદ સર્જાયો હતો. આ વિવાદના કારણે જહાજને અટકાવી દેવામાં આવ્યું હતું. ત્યારથી વિનીત સહિત છ ભારતીય નાવિકો જહાજમાં જ રહેવા મજબૂર બન્યા છે.
વિનીતના પરિવાર માટે આ સમય ખૂબ જ મુશ્કેલ છે. તેમની પત્ની નેહા મિશ્રા અને પિતા લલિત કિશોર મિશ્રા (નિવૃત્ત સૈન્ય અધિકારી) સતત તેમની સુરક્ષિત વાપસી માટે પ્રયાસ કરી રહ્યા છે. વિનીતના બે નાનાં બાળકો પણ લાંબા સમયથી પિતાની રાહ જોઈ રહ્યાં છે. પરિવારનું કહેવું છે કે જહાજમાં મોબાઇલ નેટવર્કની સમસ્યાને કારણે દરરોજ વાતચીત થઈ શકતી નથી. ક્યારેક લાંબા અંતરાલ બાદ માત્ર થોડી મિનિટો માટે જ સંપર્ક થાય છે. આવી પરિસ્થિતિમાં વિનીતની સુરક્ષા અને સ્વાસ્થ્યને લઈને પરિવારની ચિંતા વધી રહી છે.
છ ભારતીય નાવિકોને સુરક્ષિત રીતે ભારત પરત લાવવા માટે વિનીતના પરિવારજનોએ પાકિસ્તાનમાં ભારતીય રાજદ્વારી મિશનનો સંપર્ક કર્યો છે. પરિવારના જણાવ્યા મુજબ, ભારતીય દૂતાવાસને લેખિત રજૂઆત કર્યા બાદ મદદની ખાતરી આપવામાં આવી હતી, પરંતુ હજુ સુધી કોઈ નક્કર ઉકેલ મળ્યો નથી. હવે પરિવારે વડાપ્રધાન, રાષ્ટ્રપતિ અને વિદેશ મંત્રાલયને આ મામલે તાત્કાલિક હસ્તક્ષેપ કરવાની અપીલ કરી છે. આ ઉપરાંત સ્થાનિક ધારાસભ્ય અને સાંસદ સમક્ષ પણ મદદની રજૂઆત કરવામાં આવી છે.
પરિવારનો સવાલ છે કે એક શિપિંગ કંપની અને બંદર સત્તાધિકારીઓ વચ્ચેના વિવાદની સજા નિર્દોષ ભારતીય નાવિકોએ શા માટે ભોગવવી પડે? સાત મહિનાથી વિદેશી બંદર પર અટવાયેલા આ છ ભારતીયોને ક્યારે મુક્ત કરવામાં આવશે અને તેઓ પોતાના પરિવાર પાસે સુરક્ષિત રીતે ક્યારે પરત ફરશે? હાલ પરિવારજનો સરકાર તરફથી તાત્કાલિક મદદ અને નાવિકોની સુરક્ષિત વાપસીની આશા રાખી રહ્યા છે.