ભારતીય રેલવેએ ટ્રેનમાં અને સ્ટેશન પર મોબાઈલ ફોન સ્પીકર મોડ પર વાપરવા, મોટેથી ગીતો સાંભળવા કે મોડે સુધી ઊંચા અવાજે વાત કરવા પર પ્રતિબંધ મૂક્યો છે. હવે આ નિયમનો ભંગ ‘જન વિશ્વાસ સુધારા અધિનિયમ’ હેઠળ ગુનો ગણાશે.
નિયમ ભંગ કરનાર મુસાફરને પ્રથમ વખત ₹1,000નો દંડ થઈ શકે છે અને તેને ટ્રેનમાંથી ઉતારી પણ શકાય છે. વારંવાર ભૂલ કરનારને ₹5,000 સુધીનો દંડ અથવા 6 મહિના સુધીની જેલ અથવા બંને સજા થઈ શકે છે. ખાસ કરીને રાત્રે 10 થી સવારે 6 વાગ્યા સુધી આ નિયમનો કડક અમલ કરાશે.
રેલવે બોર્ડે તમામ ઝોનને જાહેર ઘોષણાઓ અને સ્ટેશનો પર નોટિસ બોર્ડ લગાવીને મુસાફરોને જાગૃત કરવાના નિર્દેશ આપ્યા છે. ટિકિટ ચેકર્સને ઓન-ધ-સ્પોટ કાર્યવાહી કરવાની સત્તા આપવામાં આવી છે.
મુસાફરોને સલાહ આપવામાં આવી છે કે તેઓ સંગીત સાંભળવા, રીલ્સ કે સિરિયલ જોવા માટે ઇયરફોનનો જ ઉપયોગ કરે. ફોન પર ધીમા અવાજે વાત કરે અને રિંગટોનને પણ ધીમા વોલ્યુમ કે વાઇબ્રેશન મોડ પર રાખે, ખાસ કરીને રાત્રે 10 થી સવારે 6 વાગ્યા દરમિયાન.
રેલવેની એડવાઈઝરીમાં જણાવાયું છે કે બંધ AC ડબ્બા અને વંદે ભારત એક્સપ્રેસ જેવી શાંત ટ્રેનોમાં લાઉડ ફોન કૉલ, સોશિયલ મીડિયા રીલ્સ અને બાળકોના કાર્ટૂનના મોટા અવાજથી સહ-મુસાફરોને માનસિક પરેશાની થાય છે. નિયમિત મુસાફરોનું કહેવું છે કે સ્લીપર ક્લાસ કરતાં AC કોચમાં બહારનો અવાજ ઓછો હોવાથી મોબાઈલનો અવાજ વધુ પરેશાન કરે છે. મુસાફરોએ આ પગલાનું સ્વાગત કર્યું છે, પરંતુ TTE અને RPF દ્વારા તેનું કડક પાલન કરાવવાની માંગ પણ કરી છે, કારણ કે રાત્રે વારંવાર ફરિયાદ નોંધાવવી મુશ્કેલ બને છે.
જો તમારી બોગીમાં કોઈ મુસાફર ના પાડવા છતાં મોટેથી સ્પીકર ચલાવી રહ્યો છે અથવા ઉપદ્રવ મચાવી રહ્યો છે, તો તમે તુરંત ફરિયાદ નોંધાવી શકો છો. રેલ મદદ એપ દ્વારા PNR અને કોચ નંબર નાખીને ફરિયાદ કરો, રેલવે હેલ્પલાઇન નંબર 139 પર ફોન કરો અથવા ઓન-બોર્ડ TTE, RPF જવાનો કે કોચ અટેન્ડન્ટને તુરંત જાણ કરો.