યુએઈએ ભારતીય પાયલટ કેપ્ટન સ્મિત મચ્છરને મંગળવારે દેશના સર્વોચ્ચ સન્માનોમાંના એક 'ઝાયેદ II - ફર્સ્ટ ક્લાસ'થી સન્માનિત કર્યા છે. આ અવસર પર યુએઈના રાષ્ટ્રપતિ શેખ મોહમ્મદ બિન જાયેદ અલ નાહ્યાને કેપ્ટન મચ્છરને ભેટીને અભિનંદન આપ્યા હતા.
કેપ્ટન મચ્છર ફ્લાયદુબઈની ફ્લાઇટ FZ1073ના પાયલટ હતા, જે 30 સપ્ટેમ્બરે દુબઈથી તેલ અવીવ જઈ રહી હતી. ઉડાન દરમિયાન કો-પાયલટે કોકપિટમાં તેમના પર ઇમરજન્સી કુહાડીથી હુમલો કર્યો હતો. કેપ્ટન મચ્છરે હિંમતથી સામનો કરીને વિમાનને ક્રેશ થતું અટકાવ્યું હતું અને તમામ 180 મુસાફરો તથા ક્રૂને સુરક્ષિત બચાવ્યા હતા.
સન્માન સમારોહમાં યુએઈના ઉપપ્રમુખ, વડાપ્રધાન અને દુબઈના શાસક શેખ મોહમ્મદ બિન રાશિદ અલ મકતૂમ પણ ઉપસ્થિત રહ્યા હતા. યુએઈના નેતાઓએ કેપ્ટન મચ્છર અને ક્રૂની હિંમત તથા જવાબદારીની પ્રશંસા કરી હતી. તેમણે કહ્યું કે મુશ્કેલ પરિસ્થિતિમાં પણ ક્રૂએ મુસાફરોની સુરક્ષાને સર્વોચ્ચ પ્રાધાન્ય આપ્યું હતું.
દુબઈના ક્રાઉન પ્રિન્સ શેખ હમદાને સોશિયલ મીડિયા પ્લેટફોર્મ X પર લખ્યું, 'કેપ્ટન સ્મિત મચ્છરે હિંમત, જવાબદારી અને માનવજીવનની કાળજી રાખવાનું ઉદાહરણ પૂરું પાડ્યું છે. અમને ગર્વ છે કે તેઓ અમારી ટીમનો, અમારા દેશની વાર્તાનો અને યુએઈની ઓળખનો હિસ્સો છે.'
કેપ્ટન મચ્છર જ્યારે ઇજાઓની સારવાર કરાવી રહ્યા હતા, ત્યારે શેખ હમદાન 3 ઑક્ટોબરે હોસ્પિટલમાં તેમને મળવા પહોંચ્યા હતા અને તેમની હિંમતની પ્રશંસા કરી હતી.
હુમલાની ઘટના અંગે કેપ્ટન મચ્છરે યુએઈના સરકારી અખબાર 'ધ નેશનલ'ને આપેલા ઇન્ટરવ્યૂમાં જણાવ્યું કે પહેલો પ્રહાર થતાં તેમને લાગ્યું કે વિમાનનો કોઈ ભાગ તૂટીને માથા પર પડ્યો છે. તેમણે કહ્યું, 'પહેલા પ્રહાર પછી હું મારા કંટ્રોલ કૉલમ પર પડવાનો હતો. ત્યારબાદ સતત પ્રહાર થવા લાગ્યા, ત્યારે સમજાયું કે હુમલો કોઈ અન્ય વ્યક્તિ કરી રહી છે. હું તો તેને મારી ટીમનો જ એક ભાગ માનતો હતો.'
કેપ્ટને જણાવ્યું કે તેમણે સૌથી પહેલાં સીટ બેલ્ટ ખોલીને પોતાને મુક્ત કરવાનો પ્રયાસ કર્યો અને પછી માથા પરના પ્રહારોથી બચવા લાગ્યા. હુમલા દરમિયાન તેમની દૃષ્ટિ પણ ધૂંધળી થઈ ગઈ હતી.
હુમલાખોર કો-પાયલટની ઓળખ હમામ અલ-હમામી તરીકે થઈ છે, જે ઓમાનનો રહેવાસી છે. મીડિયા અહેવાલો અનુસાર, તપાસમાં તેના અલકાયદાની વિચારધારાથી પ્રભાવિત હોવાના પુરાવા મળ્યા છે. પૂછપરછ દરમિયાન અલ-હમામીએ જણાવ્યું કે તે વિમાનને ઇઝરાયેલમાં ક્રેશ કરાવવા માગતો હતો. 2024માં કટ્ટરપંથી વિચારસરણીને કારણે તેને ઓમાનની રાષ્ટ્રીય એરલાઇનની પાયલટ તાલીમમાંથી હટાવી દેવામાં આવ્યો હતો. આશરે 8 મહિના પહેલાં તે ફ્લાયદુબઈ સાથે જોડાયો હતો.
હુમલા દરમિયાન વિમાન લગભગ 17,000 ફૂટ નીચે આવી ગયું હતું. કેપ્ટન મચ્છરે કોઈક રીતે કોકપિટનો દરવાજો ખોલ્યો અને મુસાફરો તથા ક્રૂએ હુમલાખોરને કાબૂમાં લીધો. ત્યારબાદ વિમાનમાં હાજર ઓફ-ડ્યુટી પાયલટોએ માર્ગ બદલીને સાઉદી અરેબિયાના તાબુક શહેરમાં ઇમરજન્સી લેન્ડિંગ કરાવ્યું, જ્યાં તમામ 180 લોકોને સુરક્ષિત રીતે બહાર કાઢવામાં આવ્યા.