ભારત અને અમેરિકાએ સમુદ્રની નીચે પથરાયેલા સંચાર કેબલોની સુરક્ષા માટે નવી વ્યૂહાત્મક ભાગીદારી શરૂ કરી છે. 'TRUST' પહેલ હેઠળ બંને દેશો આ કેબલ નેટવર્કને સાયબર હુમલા, તોડફોડ અને ભૂ-રાજકીય જોખમોથી બચાવવા માટે સાથે મળીને કામ કરશે.
વિશ્વનો મોટાભાગનો ઇન્ટરનેટ અને આંતરરાષ્ટ્રીય ડેટા ટ્રાફિક આ દરિયાઈ કેબલો દ્વારા જ સંચાલિત થાય છે. તેથી આ પહેલ ડિજિટલ અર્થતંત્ર અને વૈશ્વિક સંચાર વ્યવસ્થા માટે મહત્વપૂર્ણ માનવામાં આવે છે.
TRUST એટલે 'Transforming the Relationship Utilizing Strategic Technologies'. આ પહેલનો હેતુ બંને દેશો વચ્ચે ઉભરતી ટેકનોલોજીના ક્ષેત્રે સહયોગ વધારવાનો છે. તેમાં આર્ટિફિશિયલ ઇન્ટેલિજન્સ (AI), સેમિકન્ડક્ટર, ક્વોન્ટમ કમ્પ્યુટિંગ, બાયોટેકનોલોજી, ઊર્જા અને અંતરિક્ષ જેવા ક્ષેત્રો પર ધ્યાન આપવામાં આવી રહ્યું છે.
અમેરિકી દૂતાવાસના જણાવ્યા અનુસાર, આ દરિયાઈ કેબલ વૈશ્વિક ઇન્ટરનેટ, ક્લાઉડ સેવાઓ, ડેટા સેન્ટર અને AI આધારિત અર્થવ્યવસ્થાની મુખ્ય કરોડરજ્જુ છે. બંને દેશો આ નેટવર્કના સંરક્ષણ અને વિસ્તાર માટે સાથે મળીને કામ કરશે.
અમેરિકાનું માનવું છે કે ભારતની ભૌગોલિક સ્થિતિ, ઝડપથી વિકસતી ડિજિટલ અર્થવ્યવસ્થા અને AI તથા ક્લાઉડ સેવાઓની વધતી માંગ તેને ભવિષ્યમાં વૈશ્વિક સ્તરે 'સબસી કેબલ હબ' બનાવી શકે છે. આ ઉપરાંત, બંને દેશો AI ઇન્ફ્રાસ્ટ્રક્ચર, ડેટા સેન્ટર રોકાણ અને નવી પેઢીની ટેકનોલોજી માટે સપ્લાય ચેઈન મજબૂત કરવા સંયુક્ત રોડમેપ પણ તૈયાર કરી રહ્યા છે.