નાગોયામાં ચાલી રહેલી એશિયન ગેમ્સના છઠ્ઠા દિવસે ભારતના ઓછામાં ઓછા બે મેડલ પાક્કા થઈ ગયા છે. શુક્રવારે સવારે જોશના ચિનપ્પા અને વેલાવન સેન્થિલ કુમારની જોડીએ સ્ક્વોશની મિક્સ્ડ ડબલ્સ ઇવેન્ટની સેમિફાઇનલમાં જગ્યા બનાવી.
આ પહેલાં મનુષ શાહ અને દિયા ચિતલેની જોડીએ ટેબલ ટેનિસની મિક્સ્ડ ડબલ્સ ઇવેન્ટની સેમિફાઇનલમાં જગ્યા બનાવી હતી. આ જોડીએ ક્વાર્ટર ફાઇનલમાં હોંગકોંગની વર્લ્ડ નંબર-4 જોડી વોંગ ચુન ટિંગ અને ડૂ હોઈ કેમને 3-1થી હરાવી હતી. વિશ્વની આઠમા ક્રમાંકની ભારતીય જોડીએ આ મુકાબલો 11-6, 13-15, 11-9, 11-5થી જીત્યો.
ટેબલ ટેનિસની આ કેટેગરીમાં ભારતે બીજી વખત મેડલ જીત્યો છે. પહેલો મેડલ અચંત શરથ કમલ અને મનિકા બત્રાની જોડીએ 2018માં જીત્યો હતો. સેમિફાઇનલમાં દિયા-મનુષનો સામનો ચીનની વાંગ ચુકિન અને સન યિંગશાની જોડી સામે થશે.
હરમીત દેસાઈ અને યશસ્વિની ઘોરપડેની અન્ય એક ભારતીય જોડીને ચીનની લિન શિડૉંગ અને કુઆઈ માનની જોડીએ 3-0 (5-11, 10-12, 9-11)થી હરાવી હતી.
સ્ક્વોશમાં જોશના ચિનપ્પા અને વેલાવન સેંથિલકુમારે મિક્સ્ડ ડબલ્સની સેમિફાઇનલમાં સ્થાન મેળવીને ભારતનો મેડલ પાક્કો કરી દીધો. ભારતીય જોડીએ ફિલિપાઇન્સની જોડીને 11-3, 11-5થી હરાવી. 40 વર્ષની જોશનાએ 16 વર્ષ બાદ એશિયન ગેમ્સમાં વધુ એક મેડલ પાક્કો કર્યો છે. તેમનો અગાઉનો એશિયન ગેમ્સ મેડલ 2010માં આવ્યો હતો. સેમિફાઇનલમાં ભારતીય જોડીનો સામનો આવતીકાલે હોંગકોંગની લી કા યી અને ટાંગ મિંગ હોંગ સામે થશે.
શૂટિંગમાં 10 મીટર એર પિસ્તોલ મિક્સ્ડ ટીમમાં પણ ભારતનો મેડલ પાક્કો થઈ ગયો છે. સુરુચિ અને કમલજીતે ફાઇનલના સ્ટેજ-2માં શાનદાર શરૂઆત કરીને દક્ષિણ કોરિયા સામે ભારતની લીડ 5.8 પોઇન્ટની કરી દીધી હતી. ઇન્ડોનેશિયા બહાર થતાં જ ભારતનો મેડલ પાક્કો થઈ ગયો. ક્વોલિફિકેશનમાં કમલજીત અને સુરુચિએ શરૂઆતના 20 શોટમાં 196 પોઈન્ટ મેળવ્યા હતા અને ટોચ પર રહ્યા હતા. ફાઇનલમાં પહોંચવા માટે ટોચના ચારમાં રહેવું જરૂરી હતું.
સ્વિમિંગમાં સાજન પ્રકાશે 200 મીટર બટરફ્લાયની હીટ-3માં ત્રીજા સ્થાને રહીને ફાઇનલમાં સ્થાન મેળવી લીધું. તેણે 2:00.94નો સમય નોંધાવ્યો. આ ઇવેન્ટની ફાઇનલ આજે બાદમાં યોજાશે.
બેડમિન્ટનની વ્યક્તિગત સ્પર્ધા શરૂ થઈ ગઈ છે. ધ્રુવ કપિલા અને તનીષા ક્રાસ્ટોએ મિક્સ્ડ ડબલ્સની પ્રથમ ગેમમાં માલદીવની અમીનાથ અબ્દુલ રઝ્ઝાક અને નિબાલ અહમદની જોડીને 21-8થી હરાવી.
સ્ક્વોશમાં સવારે 9:15 વાગ્યે અભય સિંહ પુરુષ સિંગલ્સ ક્વાર્ટર ફાઇનલમાં જાપાનના રયૂનોસુકે ત્સુકુએ સામે રમશે. 10 વાગ્યે અનાહત સિંહ મહિલા સિંગલ્સ ક્વાર્ટર ફાઇનલમાં તન્વી ખન્ના સામે રમશે. 10:45 વાગ્યે વીર ચોટરાણી પુરુષ સિંગલ્સ ક્વાર્ટર ફાઇનલમાં મુહમ્મદ ઇરફાન સામે મુકાબલો કરશે. સવારે 7 વાગ્યે જોશના ચિનપ્પા અને વેલાવન સેંથિલકુમારની જોડી મિક્સ્ડ ડબલ્સ ક્વાર્ટર ફાઇનલ રમી હતી.
બોક્સિંગમાં સવારે 10:15 વાગ્યે સચિન સિવાચ રાઉન્ડ ઓફ-16માં UAEના અબુ જાજેહ મોહમ્મદ સામે ટકરાશે. બપોરે 2:15 વાગ્યે પ્રીતિ પવારનો મુકાબલો ઉત્તર કોરિયાની મી ચોલ પાંગ સામે થશે.
ટેબલ ટેનિસમાં સવારે 9 વાગ્યે યશસ્વિની ઘોરપડે, 9:45 વાગ્યે શ્રીજા અકુલા અને 10:30 વાગ્યે માનવ ઠક્કર પોતાના-પોતાના સિંગલ્સ રાઉન્ડ-2 મુકાબલા રમશે. ઍથ્લેટિક્સમાં પણ ભારત માટે મેડલની આશા છે.