જાપાનના આઇચી શહેરમાં આજે એશિયન ગેમ્સ 2026ની પુરુષ ક્રિકેટ સ્પર્ધાની ગોલ્ડ મેડલ મેચ ભારત અને પાકિસ્તાન વચ્ચે રમાશે. આ મેચ સવારે 10 વાગ્યે શરૂ થશે. બંને ટીમો એશિયન ગેમ્સમાં પહેલીવાર એકબીજા સામે રમશે.
જો વરસાદના કારણે મેચ રદ થાય તો બંને ટીમો વચ્ચે ગોલ્ડ મેડલ શેર થશે. નિશિનમાં શનિવારે વરસાદની શક્યતા માત્ર 10% છે અને તાપમાન 25 ડિગ્રી સેલ્સિયસ સુધી રહી શકે છે.
મેચ પહેલાં સૌથી ચર્ચિત મુદ્દો હેન્ડશેકનો છે. ભારતીય પુરુષ અને મહિલા ક્રિકેટરોએ છેલ્લા 383 દિવસ અને 6 મેચથી પાકિસ્તાની ખેલાડીઓ સાથે હાથ મિલાવ્યો નથી. આ નિર્ણય ગયા વર્ષે એપ્રિલમાં પહેલગામ હુમલા પછી લેવામાં આવ્યો હતો. નો-હેન્ડશેક નીતિ સપ્ટેમ્બર 2025માં પુરુષ એશિયા કપથી શરૂ થઈ હતી.
ભારત અને પાકિસ્તાન વચ્ચે અત્યાર સુધી 17 T20 આંતરરાષ્ટ્રીય મેચ રમાઈ છે, જેમાં ભારતે 14 વાર જીત મેળવી છે જ્યારે પાકિસ્તાનને 3 વાર જ સફળતા મળી છે. છેલ્લી 6 T20માં ભારત જીત્યું છે. પાકિસ્તાને છેલ્લે 2022 એશિયા કપમાં ભારતને હરાવ્યું હતું.
ભારત તરફથી 15 વર્ષના વૈભવ સૂર્યવંશીએ સેમિફાઇનલમાં શ્રીલંકા સામે 21 બોલમાં 38 રન બનાવ્યા હતા, જેમાં 6 ચોગ્ગા અને 2 છગ્ગા સામેલ હતા. ઈશાન કિશને 173.91ની સ્ટ્રાઇક રેટથી અણનમ 80 રન ફટકાર્યા હતા. બોલિંગમાં જસપ્રીત બુમરાહે 2 વિકેટ લીધી હતી, જ્યારે અભિષેક શર્મા અને અક્ષર પટેલે 2-2 વિકેટ ઝડપી હતી.
પાકિસ્તાન માટે 2026માં સાહિબઝાદા ફરહાન સૌથી ભરોસાપાત્ર બેટર રહ્યો છે. તેણે 15 T20I મેચમાં 34.75ની એવરેજથી 417 રન બનાવ્યા છે. ભારત સામે 4 T20માં તેણે 2 ફિફ્ટી ફટકારી છે અને તે ભારત સામે સૌથી વધુ છગ્ગા મારનાર પાકિસ્તાની ક્રિકેટર છે. પાકિસ્તાનના ફાસ્ટ બોલર મોહમ્મદ વસીમ જુનિયરે 2026માં 13 મેચમાં 21 વિકેટ લીધી છે, જ્યારે સ્પિનર અબરાર અહમદે 11 મેચમાં 16 વિકેટ ઝડપી છે.
સેમિફાઇનલમાં પીચ પરથી ટર્ન અને બાઉન્સ મળ્યો હતો, અને ફાઇનલમાં પણ બોલરોને આ જ પ્રકારની મદદ મળવાની શક્યતા છે.
ભારતની સંભવિત ટીમ: વૈભવ સૂર્યવંશી, અભિષેક શર્મા, સંજુ સેમસન (વિકેટકીપર), શ્રેયસ અય્યર (કેપ્ટન), ઈશાન કિશન, તિલક વર્મા, શિવમ દુબે, અક્ષર પટેલ, વોશિંગ્ટન સુંદર, રવિ બિશ્નોઈ, જસપ્રીત બુમરાહ.
પાકિસ્તાનની સંભવિત ટીમ: સાહિબઝાદા ફરહાન (કેપ્ટન), માઝ સદાકત, ઉસ્માન ખાન (વિકેટકીપર), સૈમ અયુબ, હસન નવાઝ, અબ્દુલ સમદ, અરાફાત મિન્હાસ, અહમદ દાનિયાલ, મોહમ્મદ વસીમ, સુફિયાન મુકીમ, અબરાર અહેમદ.