કેન્દ્ર સરકારના શ્રમ અને રોજગાર મંત્રાલયે બે નવા નોટિફિકેશન જારી કર્યા છે. આ નોટિફિકેશન મુજબ, હવે 21,000 રૂપિયા પ્રતિ માસ સુધીનો પગાર મેળવતા કર્મચારીઓ માટે બોનસ ફરજિયાત બનાવવામાં આવ્યું છે. આ પગાર કરતાં વધુ કમાતા કર્મચારીઓ માટે બોનસ ફરજિયાત રહેશે નહીં.
વેતન સંહિતા, 2019ની કલમ 26(1) અનુસાર, જે કર્મચારીનું માસિક વેતન 21,000 રૂપિયાથી ઓછું હોય અને તેણે વર્ષમાં ઓછામાં ઓછા 30 દિવસ કામ કર્યું હોય, તે બોનસ માટે પાત્ર ગણાશે. બોનસની ગણતરી માટે પાયો 7,000 રૂપિયા અથવા રાજ્યની ન્યૂનતમ મજૂરી હશે, જે પણ વધુ હોય તે મુજબ ગણતરી કરવામાં આવશે.
નવા નિયમો અનુસાર, કર્મચારીનું વાર્ષિક બોનસ ઓછામાં ઓછું 8.33 ટકા અને વધુમાં વધુ 20 ટકા હશે. ઉદાહરણ તરીકે, જો કોઈ કર્મચારીની ન્યૂનતમ મજૂરી 12,000 રૂપિયા છે, તો તેનું વાર્ષિક બોનસ લગભગ 11,995 રૂપિયા થાય છે.
બોનસ ચુકવણી સમયમર્યાદા કોડ ઓન વેજેસ, 2019ની કલમ 39(1) માં સ્પષ્ટ કરવામાં આવી છે. તે મુજબ, એકાઉન્ટિંગ વર્ષ સમાપ્ત થયા પછી આઠ મહિનાની અંદર બોનસની રકમ કર્મચારીના બેંક ખાતામાં જમા કરવી આવશ્યક છે. જો એમ્પ્લોયર સમય વધારવા માટે કારણસહિત અરજી કરે, તો આ સમયમર્યાદા વધારીને બે વર્ષ કરી શકાય છે.
આ નોટિફિકેશનથી દેશભરના લાખો મજૂરો અને કર્મચારીઓને લાભ થવાની અપેક્ષા છે, કારણ કે તેમને સમયસર અને નિશ્ચિત રકમનું બોનસ મળશે.