ભારત અને જાપાન વચ્ચે મંગળવાર, 22 સપ્ટેમ્બરના રોજ ઐતિહાસિક ટી-20 આંતરરાષ્ટ્રીય મેચ રમાશે. આંતરરાષ્ટ્રીય ક્રિકેટમાં ભારત અને જાપાન પ્રથમ વખત એકબીજા સામે ટકરાશે. મેચ જાપાનના સાનો ઇન્ટરનેશનલ ક્રિકેટ ગ્રાઉન્ડ પર રમાશે અને તે ભારત-જાપાન રાજદ્વારી સંબંધોની 75મી વર્ષગાંઠ નિમિત્તે યોજાઈ રહી છે.
આ મેચમાં ટીમ ઇન્ડિયાના 15 વર્ષીય બેટ્સમેન વૈભવ સૂર્યવંશી પર તમામની નજર રહેશે. નાની ઉંમરે મોટા મંચ પર છાપ છોડી ચૂકેલા વૈભવ પાસેથી ફરી એકવાર વિસ્ફોટક બેટિંગની અપેક્ષા છે. તેની આક્રમક બેટિંગથી તે ક્રિકેટ જગતમાં પહેલેથી ચર્ચામાં છે. પાવરપ્લેમાં ઝડપથી સ્કોર કરવાની તેની ક્ષમતા તેને ભારતીય ટીમ માટે મહત્ત્વનો ખેલાડી બનાવે છે. જો તેને જાપાન સામે ઇનિંગ ઓપન કરવાની તક મળે તો તે ટીમને મજબૂત શરૂઆત આપી શકે છે.
ટીમ મેનેજમેન્ટ વૈભવ સાથે ઇનિંગ ઓપનિંગ માટે અભિષેક શર્માને પસંદ કરી શકે છે, જ્યારે સંજુ સેમસનને આરામ આપવામાં આવી શકે છે. વૈભવ અને અભિષેક બંને તેમના આક્રમક ક્રિકેટ માટે જાણીતા છે. અફઘાનિસ્તાન સામેની તાજેતરની ટી-20 શ્રેણીની ત્રણેય મેચમાં વૈભવને પ્લેઇંગ ઇલેવનમાં સામેલ કરવામાં આવ્યો ન હતો. જ્યારે જુલાઈ 2026માં ઝિમ્બાબ્વે પ્રવાસ દરમિયાન તેને પ્લેયર ઓફ ધ સીરિઝ જાહેર કરવામાં આવ્યો હતો. તે પ્રવાસમાં તેણે ત્રણ ઇનિંગ્સમાં કુલ 151 રન બનાવ્યા હતા.
ભારતની ઓપનિંગ જોડી શરૂઆતથી જ જાપાની બોલરો પર દબાણ લાવવાનો પ્રયાસ કરશે. અંતિમ પ્લેઇંગ ઇલેવનમાં વૈભવનો સમાવેશ થશે કે નહીં તે જોવાનું રહેશે.
ભારતની સંભવિત પ્લેઇંગ ઇલેવન: શ્રેયસ ઐયર (કેપ્ટન), વૈભવ સૂર્યવંશી, અભિષેક શર્મા, તિલક વર્મા, ઇશાન કિશન (વિકેટકીપર), શિવમ દુબે, રવિ બિશ્નોઈ, વોશિંગ્ટન સુંદર, જસપ્રિત બુમરાહ, અર્શદીપ સિંહ અને યશ ઠાકુર.