ભારતની પ્રથમ બુલેટ ટ્રેન 2027માં અમદાવાદ અને મુંબઈ વચ્ચે દોડશે. રેલ મંત્રી અશ્વિની વૈષ્ણવે જણાવ્યું છે કે 508 કિલોમીટર લાંબા આ પ્રોજેક્ટમાં મુંબઈના બાંદ્રા-કુર્લા કોમ્પ્લેક્સ (BKC)માં જમીનથી 100 ફૂટ નીચે અંડરગ્રાઉન્ડ સ્ટેશન બની રહ્યું છે. આ ઉપરાંત થાણે ક્રીક નીચે 7 કિલોમીટર લાંબી દેશની પહેલી અંડર-સી ટનલ પણ તૈયાર થઈ રહી છે.
રેલ મંત્રીએ સોશિયલ મીડિયા પર આ પ્રોજેક્ટની વિગતો શેર કરી છે. તેમણે જણાવ્યું કે આ ટ્રેન 320 કિલોમીટર પ્રતિ કલાકની ઝડપે દોડશે અને 12 સ્ટેશનો પર ઉભી રહેશે. પ્રથમ સેવા 2027ના છેલ્લા ક્વાર્ટરમાં શરૂ થવાની ધારણા છે.
મુંબઈના BKCમાં બની રહેલું સ્ટેશન આ કોરિડોરનું એકમાત્ર અંડરગ્રાઉન્ડ સ્ટેશન છે. તે જમીનથી લગભગ 32 મીટર (100 ફૂટ) નીચે બની રહ્યું છે, જે 10 માળની ઈમારત કરતાં પણ વધુ ઊંડું છે. અહીં ત્રણ સ્તરો બનાવવામાં આવી રહ્યા છે, જેમાં પ્લેટફોર્મ, કોન્કોર્સ અને સેવા વિસ્તારનો સમાવેશ થાય છે. કુલ છ પ્લેટફોર્મ બની રહ્યા છે, જેમાંથી દરેકની લંબાઈ 400 મીટરથી વધુ છે.
થાણે ક્રીક નીચે 7 કિલોમીટર લાંબી અંડર-સી ટનલ બનાવવા માટે 3,200 ટન વજનની ટનલ બોરિંગ મશીનોનો ઉપયોગ થઈ રહ્યો છે. જુલાઈ 2026માં વિક્રોલી અને સાવલીથી બે ટનલ બોરિંગ મશીન લોન્ચ કરવામાં આવ્યા હતા. આ મશીનો ભારતમાં અત્યાર સુધીની સૌથી મોટી મશીનોમાંની એક છે. દરેક મશીનમાં 13.6 મીટર વ્યાસનું કટરહેડ છે, જે ચાર માળની ઈમારત જેટલું ઊંચું છે. દરેક મશીનનું વજન 3,000 ટનથી વધુ છે, જે લગભગ 500 હાથીઓના વજન જેટલું છે, અને તેની લંબાઈ 96 મીટર છે, જે લગભગ પાંચ ક્રિકેટ પિચ જેટલી છે.