દિલ્હીમાં વિપક્ષી ગઠબંધન INDIAના નેતાઓએ મંગળવારે લોકસભામાં વિપક્ષના નેતા રાહુલ ગાંધીના સરકારી નિવાસે બેઠક યોજી હતી. આ બેઠકમાં મુખ્ય ચૂંટણી કમિશનર (CEC) જ્ઞાનેશ કુમારના રાજીનામાની માંગ કરવામાં આવી હતી અને લોકશાહી તથા બંધારણને બચાવવા માટેની લડત વધુ તીવ્ર બનાવવાનો સંકલ્પ લેવાયો હતો.
આ બેઠકમાં કોંગ્રેસ અધ્યક્ષ મલ્લિકાર્જુન ખડગે, સોનિયા ગાંધી, પ્રિયંકા ગાંધી વાડ્રા, ડી. રાજા, સુપ્રિયા સુલે અને સાગરિકા ઘોષ સહિતના નેતાઓ ઉપસ્થિત રહ્યા હતા. રાહુલ ગાંધીએ કહ્યું કે, 'આજે મેં INDIA ગઠબંધનના નેતાઓ, વિપક્ષી સાંસદો, વિદ્યાર્થી સંગઠનો અને સિવિલ સોસાયટીના સાથીઓને મારા ઘરે ચા પર બોલાવ્યા છે. લોકતંત્રની રક્ષાના આ જનઆંદોલનમાં આપણે સૌ સાથે છીએ અને આ આંદોલન સતત ચાલુ રહેશે.'
બેઠક બાદ યોજાયેલી પત્રકાર પરિષદમાં રાહુલ ગાંધીએ કહ્યું કે, 'આ વિરોધ પ્રદર્શનનું એક જ લક્ષ્ય છે: ભારતમાં લોકશાહીની પુનઃસ્થાપના. આ દેશમાં લોકશાહી ખતમ થઈ ચૂકી છે. ચૂંટણી વ્યવસ્થા નષ્ટ કરી દેવામાં આવી છે. બંધારણને ફાડીને ફેંકી દેવામાં આવ્યું છે. અમે બધા સાથે મળીને આ દેશમાં વાસ્તવિક લોકતાંત્રિક શાસનને પુનઃસ્થાપિત કરવા માટે લડી રહ્યા છીએ.'
રાહુલ ગાંધીએ વધુમાં જણાવ્યું હતું કે, 'ગઈકાલની પ્રેસ કોન્ફરન્સમાં મેં કહ્યું હતું કે અમારી આ ટીમ કોઈ પણ ભોગે અટકવાની નથી. ભલે કાલે થાય, 3 મહિના પછી થાય કે 1-2 વર્ષ લાગે, પણ અમે લક્ષ્ય સુધી પહોંચીને જ રહીશું. અમે ત્યાં કેવી રીતે પહોંચીશું તેની ચોક્કસ વ્યૂહરચના હું અત્યારે જાહેર નહીં કરું, કારણ કે અમે દેશ માટે આ સરપ્રાઇઝ જાળવી રાખવા માંગીએ છીએ. પણ એટલી ખાતરી ચોક્કસ આપું છું કે જે ઉત્સાહ, ઊર્જા અને એકતા સાથે અમે એકઠા થયા છીએ, તે જ લડાયક મિજાજ સાથે લડત ચાલુ રહેશે. સુપ્રીમ કોર્ટ, મુખ્ય ન્યાયાધીશ (CJI) અને ન્યાયતંત્ર પ્રત્યે અમને પૂરો આદર છે અને તેઓ પોતાની ભૂમિકા ચોક્કસ ભજવશે તેવી અમને આશા છે. જોકે, અમે રાજકીય લોકો છીએ; કોઈ સંસ્થા પોતાની ભૂમિકા ભજવે કે ન ભજવે, જનતાનો અને અમારો આ રાજકીય વિરોધ જારી રહેશે અને અંતે સત્યનો જ વિજય થશે.'
શિવસેના (UBT)ના સાંસદ સંજય રાઉતે જણાવ્યું હતું કે, 'રાહુલજીએ આ બેઠક બોલાવી હતી અને તમામને આમંત્રણ આપ્યું હતું. હાઇ ટી માટે નેતાઓ અને સાંસદો ઉપસ્થિત રહ્યા હતા અને તે ખૂબ જ સારી બેઠક રહી હતી. આગળની રણનીતિ અંગે ચર્ચા કરવામાં આવી હતી અને ભવિષ્યની દિશા નક્કી કરવામાં આવી હતી.'
આ બેઠક એવા સમયે યોજાઈ છે જ્યારે વિશેષ ગહન પુનરીક્ષણ (SIR) અને 'વોટ ચોરી'ના આક્ષેપોને લઈને વિપક્ષે 'માર્ચ ફોર ડેમોક્રેસી' સહિતના વિરોધ પ્રદર્શનો કર્યા છે. INDIA ગઠબંધને સરકાર સામે આક્રમક રણનીતિ અપનાવી છે અને આગામી દિવસોમાં લડત વધુ તેજ કરવાની જાહેરાત કરી છે.