વર્લ્ડ ચેમ્પિયનશિપ ઓફ લિજેન્ડ્સ (WCL 2026)ની શનિવારે રમાયેલી મેચમાં ઇન્ડિયા ચેમ્પિયન્સે ઓસ્ટ્રેલિયા ચેમ્પિયન્સને 46 રનથી હરાવ્યું છે. ટોસ હારીને પ્રથમ બેટિંગ કરેલી ભારતીય ટીમે 20 ઓવરમાં 7 વિકેટે 196 રન બનાવ્યા હતા, જવાબમાં ઓસ્ટ્રેલિયાની ટીમ 16.2 ઓવરમાં 150 રનમાં ઓલઆઉટ થઈ ગઈ હતી.
ભારત તરફથી કેપ્ટન યુવરાજ સિંહે સૌથી વધુ 71 રન ફટકાર્યા હતા. તેણે 44 બોલમાં 5 ચોગ્ગા અને 6 છગ્ગા ફટકાર્યા હતા. યુસુફ પઠાણે 20 બોલમાં 1 ચોગ્ગા અને 4 છગ્ગાની મદદથી 37 રન બનાવ્યા હતા, જ્યારે ઋષિ ધવને 12 બોલમાં 1 ચોગ્ગા અને 4 છગ્ગા સાથે 35 રન ફટકાર્યા હતા.
ઇનિંગની શરૂઆત કરનાર નમન ઓઝાએ 26 બોલમાં 3 ચોગ્ગા અને 1 છગ્ગા સાથે 31 રન બનાવ્યા હતા. અંબાતી રાયડુ 4 રને અને સ્ટુઅર્ટ બિન્ની 13 રને આઉટ થયા હતા. ઇરફાન પઠાણ માત્ર 1 રન બનાવી શક્યો હતો.
197 રનના લક્ષ્યાંકનો પીછો કરતી ઓસ્ટ્રેલિયાની શરૂઆત ખરાબ રહી હતી. કેપ્ટન ઉસ્માન ખ્વાજા ખાતું ખોલાવ્યા વગર આઉટ થયો હતો, જ્યારે બેન ડંકે 6 રન બનાવ્યા હતા. ડાર્સી શોર્ટે 28 બોલમાં 4 ચોગ્ગા અને 7 છગ્ગા સાથે 65 રન તથા જો બર્ન્સે 32 બોલમાં 4 છગ્ગા સાથે 45 રન બનાવ્યા હતા. બંનેએ 9મી ઓવરમાં ટીમનો સ્કોર 100 રન પાર પહોંચાડ્યો હતો.
આ બંને બેટ્સમેન આઉટ થયા બાદ ઓસ્ટ્રેલિયાની ઇનિંગ ઝડપથી પડી ભાંગી હતી. કેલમ ફર્ગ્યુસન 0, જોનાથન વેલ્સ 11, નાથન કુલ્ટર-નાઇલ 0, કેન રિચાર્ડસન 4, બેન હેલ્ફેનહાઉસ 1 અને ફવાદ અહેમદ 0 રને આઉટ થયા હતા.
ભારત તરફથી ધવલ કુલકર્ણીએ સૌથી વધુ 4 વિકેટ ઝડપી હતી. મોહિત શર્માએ 3 વિકેટ લીધી હતી, જ્યારે પીયુષ ચાવલાને 2 અને હરભજન સિંહને 1 વિકેટ મળી હતી.
ઉલ્લેખનીય છે કે WCL 2026 એ નિવૃત્ત થયેલા આંતરરાષ્ટ્રીય ખેલાડીઓની ટૂર્નામેન્ટ છે, જેમાં ભારત, ઓસ્ટ્રેલિયા સહિત અનેક દેશોની ટીમો ભાગ લે છે. ગયા વર્ષે રમાયેલી આ ટૂર્નામેન્ટની પ્રથમ આવૃત્તિમાં ભારત ચેમ્પિયન બન્યું હતું.