જાપાનના આઈચી-નાગોયામાં યોજાયેલી એશિયન ગેમ્સ 2026માં ભારતે 21 ગોલ્ડ, 27 સિલ્વર અને 37 બ્રોન્ઝ સહિત કુલ 85 મેડલ જીત્યા છે. શનિવારે અંતિમ દિવસે ભારતીય ખેલાડીઓએ 9 મેડલ (5 ગોલ્ડ, 2 સિલ્વર, 2 બ્રોન્ઝ) જીત્યા. ભારત મેડલ ટેબલમાં ચોથા સ્થાને રહ્યું છે, જોકે રવિવારે કેટલીક ઇવેન્ટ્સ બાકી હોવાથી ક્રમમાં ફેરફાર થઈ શકે છે.
મેડલ ટેબલમાં ચીન 169 ગોલ્ડ સહિત 341 મેડલ સાથે પ્રથમ, જાપાન 83 ગોલ્ડ સહિત 269 મેડલ સાથે બીજા અને દક્ષિણ કોરિયા 39 ગોલ્ડ સહિત 150 મેડલ સાથે ત્રીજા સ્થાને છે. ઉઝબેકિસ્તાન 21 ગોલ્ડ સહિત 70 મેડલ સાથે પાંચમા સ્થાને છે.
તીરંદાજીમાં 17 વર્ષીય કુમકુમ મોહોડે મહિલા રિકર્વ વ્યક્તિગત ઇવેન્ટમાં દક્ષિણ કોરિયાની ઓ યેજિનને રોમાંચક શૂટ-ઓફમાં હરાવીને પરફેક્ટ 10નો સ્કોર કરીને ગોલ્ડ મેડલ જીત્યો.
ગોલ્ફમાં પ્રણવી શરથ ઉર્સે મહિલા વ્યક્તિગત સ્ટ્રોક પ્લેમાં 15 અંડર પાર સાથે પ્રથમ સ્થાને રહીને ગોલ્ડ મેડલ જીત્યો. પુરુષોની ફ્રીસ્ટાઇલ 57 કિગ્રામાં અમન સેહરાવતે ઉત્તર કોરિયાના કુસ્તીબાજને હરાવીને કુસ્તીમાં ભારતને બીજો ગોલ્ડ મેડલ અપાવ્યો.
પુરુષ હોકી ટીમે ફાઇનલમાં મલેશિયાને 5-1થી હરાવીને સતત બીજો ગોલ્ડ મેડલ જીત્યો. આ સાથે ભારતે એક જ આવૃત્તિમાં પુરુષ અને મહિલા બંને ટીમો માટે ગોલ્ડ જીતવાનો ઐતિહાસિક રેકોર્ડ બનાવ્યો.
પુરુષ ક્રિકેટ ટીમે ફાઇનલમાં પાકિસ્તાનને 19 રનથી હરાવીને ગોલ્ડ મેડલ જીત્યો. ટોસ જીતીને પહેલા બેટિંગ કરતાં ભારતે 20 ઓવરમાં 6 વિકેટે 211 રન બનાવ્યા. જવાબમાં પાકિસ્તાન 20 ઓવરમાં 6 વિકેટે 192 રન જ બનાવી શક્યું.
મહિલા ગોલ્ફ ટીમ ઇવેન્ટમાં ભારતે 3 ઓક્ટોબર, 2026ના રોજ કાસુગાઈ કન્ટ્રી ક્લબ ઈસ્ટ કોર્સ ખાતે 14-અંડર 546નો સ્કોર કરીને ચીન પછી બીજા સ્થાને રહીને સિલ્વર મેડલ જીત્યો.
મહિલા કુસ્તી 53 કિગ્રા ફાઇનલમાં જાપાનની મો કિયોકા સામે હારવા છતાં અંતિમે શાનદાર વાપસી કરીને સિલ્વર મેડલ જીત્યો. તે આ આવૃત્તિમાં મેડલ જીતનારી એકમાત્ર ભારતીય મહિલા કુસ્તીબાજ હતી. દીપકે પુરુષોની ફ્રીસ્ટાઇલ 97 કિગ્રામાં મોંગોલિયન કુસ્તીબાજને 2-1થી હરાવીને બ્રોન્ઝ મેડલ જીત્યો.
તીરંદાજીમાં પુરુષોની રિકર્વ વ્યક્તિગત બ્રોન્ઝ મેડલ મેચમાં નીરજ ચૌહાણે ધીરજ બોમ્મદેવરાને 6-4થી હરાવીને કાંસ્ય ચંદ્રક જીત્યો.
એશિયન ગેમ્સના 14 દિવસ દરમિયાન 495 ભારતીય ખેલાડીઓએ 36 રમતગમતની ઇવેન્ટ્સમાં ભાગ લીધો અને દેશને ગૌરવ અપાવ્યું. હોકીથી લઈને તીરંદાજી, કુસ્તી, ગોલ્ફ અને ક્રિકેટ સુધી ભારતીય ખેલાડીઓએ શાનદાર પ્રદર્શન કર્યું.