ભારત અને અફઘાનિસ્તાન વચ્ચે ત્રણ ટી-20 મેચોની સિરીઝ આજથી શરૂ થઈ રહી છે. ત્રણેય મેચ દિલ્હીના અરુણ જેટલી સ્ટેડિયમમાં રમાશે. મેચ ભારતમાં રમાઈ રહી હોવા છતાં, આ સિરીઝમાં હોમ ટીમ અફઘાનિસ્તાન હશે અને ભારતીય ટીમ વિઝિટર્સ ગણાશે.
આવું એટલા માટે થઈ રહ્યું છે કારણ કે અફઘાનિસ્તાન ક્રિકેટ બોર્ડ આ સિરીઝનું યજમાન છે. સુરક્ષા કારણોસર અફઘાનિસ્તાન પોતાના દેશમાં મેચ રમાડી શકતું નથી, તેથી તેની હોમ મેચો ભારત અથવા UAEમાં યોજાય છે.
ટીમ ઇન્ડિયા માટે આ નવો અનુભવ હશે. ભારતીય ક્રિકેટના 94 વર્ષના ઇતિહાસમાં આ પહેલો પ્રસંગ છે જ્યારે તે ઘરમાં મેચ રમશે પરંતુ હોમ ટીમ નહીં હોય. આ બદલાવની અસર કેટલાક મુદ્દાઓ પર પડશે, તેને સમજીએ.
1. પિચ કોણ નક્કી કરશે?
પિચ અરુણ જેટલી સ્ટેડિયમના ક્યુરેટર્સ બનાવી રહ્યા છે. હોમ ટીમને પિચ પોતાના ફાયદા મુજબ બનાવવાનો અધિકાર હોય છે. અફઘાનિસ્તાન હોમ ટીમ હોવાથી તેનું મેનેજમેન્ટ પિચ અંગે પોતાની માંગણી રાખી શકે છે.
જોકે, આ પહેલો પ્રસંગ નથી જ્યારે અફઘાનિસ્તાનની ટીમ ભારતની કોઈ પિચ પર પોતાની હોમ મેચ રમી હોય. આ પહેલા તે ત્રણ અન્ય સ્ટેડિયમમાં પણ પોતાની ઘરેલું આંતરરાષ્ટ્રીય મેચ રમી ચૂકી છે. આ મેચોમાં અફઘાન ટીમે મોટાભાગે સ્પિનને મદદરૂપ પિચો બનાવી છે. વચ્ચે-વચ્ચે તેણે બેટિંગ ફ્રેન્ડલી પિચો પણ તૈયાર કરાવી છે.
2. ટોસમાં સિક્કો કોણ ઉછાળશે?
હોમ ટીમનો કેપ્ટન સિક્કો ઉછાળે છે અને વિઝિટિંગ ટીમનો કેપ્ટન હેડ કે ટેલ પસંદ કરે છે. તેથી મેચ પહેલા અફઘાનિસ્તાનનો કેપ્ટન સિક્કો ઉછાળશે અને ભારતીય કેપ્ટન હેડ કે ટેલ બોલશે. આ સિરીઝમાં અફઘાનિસ્તાનની કપ્તાની ઇબ્રાહિમ ઝાદરાન કરશે. ભારતની કમાન શ્રેયસ ઐયરના હાથમાં છે.
3. ડ્રેસિંગ રૂમની વહેંચણી કેવી રીતે થશે?
અરુણ જેટલી સ્ટેડિયમમાં હોમ અને વિઝિટિંગ ટીમ માટે અલગ ડ્રેસિંગ રૂમ છે. આ શ્રેણીમાં હોમ ડ્રેસિંગ રૂમ અફઘાનિસ્તાનને અને વિઝિટર્સ ડ્રેસિંગ રૂમ ભારતને મળશે. હોમ ડ્રેસિંગ રૂમ પૂર્વ ભારતીય ક્રિકેટર રમન લાંબાના નામ પર છે. વિઝિટર્સ ડ્રેસિંગ રૂમ પૂર્વ ભારતીય ખેલાડી પ્રકાશ ભંડારીના નામ પર છે.
4. ખેલાડીઓના રોકાણ, જમવાની જવાબદારી કોણ સંભાળશે?
ખેલાડીઓનું હોટલમાં રોકાણ, હોટલમાં જમવું અને હોટલથી સ્ટેડિયમ આવવા-જવા જેવા ખર્ચ અફઘાનિસ્તાન ક્રિકેટ બોર્ડ ઉઠાવશે. જોકે, ખેલાડીઓ હોટલ કે સ્ટેડિયમમાં શું ખાશે તે અફઘાન બોર્ડ નક્કી નહીં કરે. ભારતીય ટીમ પોતાના ખેલાડીઓનો ડાયટ ચાર્ટ હોટલ સાથે શેર કરે છે. હોટલના પસંદગીના શેફ આ મુજબ ભોજન તૈયાર કરે છે. અફઘાનિસ્તાનની ટીમ પણ આ સિસ્ટમ ફોલો કરશે.
5. મેચોમાં થતા ખર્ચ કોણ ઉઠાવશે?
હોટેલ અને કેટરિંગ ઉપરાંત, હોમ ટીમના બોર્ડને અન્ય ઘણા ખર્ચાઓ કરવા પડે છે. તેમાં સ્ટેડિયમનું ભાડું (જો સ્ટેડિયમ પોતાનું ન હોય તો), ગ્રાઉન્ડ સ્ટાફની ફી, વીજળી, સુરક્ષા વ્યવસ્થા, લોજિસ્ટિક્સ વગેરેનો સમાવેશ થાય છે. હોમ બોર્ડ હોવાને કારણે આ તમામ ખર્ચ પણ અફઘાનિસ્તાન ક્રિકેટ બોર્ડ જ કરી રહ્યું છે.
દિલ્હી જિલ્લા ક્રિકેટ સંઘે આ સિરીઝના સ્ટેડિયમનું કોઈ ભાડું અફઘાન બોર્ડ પાસેથી લીધું નથી. DDCAએ કહ્યું છે કે તેણે 'અતિથિ દેવો ભવ:'ની ભાવનાથી અફઘાન ક્રિકેટ બોર્ડને સહયોગ આપવાનો પ્રયાસ કર્યો છે.
6. સિરીઝમાંથી થતી કમાણી કોને મળશે?
કમાણી અફઘાનિસ્તાન ક્રિકેટ બોર્ડને મળશે. તેમાં બ્રોડકાસ્ટ રાઇટ્સ, સ્ટેડિયમ જાહેરાતો અને ટિકિટોના વેચાણથી થતી આવકનો સમાવેશ થાય છે. બધું મળીને અફઘાન બોર્ડ સિરીઝમાંથી 20 કરોડ રૂપિયા સુધીની કમાણી કરી શકે છે.