સાઉદી અરબમાં યમનના હુથી વિદ્રોહીઓ તરફથી ડ્રોન અને મિસાઇલ હુમલા ચાલુ રહેવાના સંદર્ભમાં ભારતે ત્યાં રહેતા પોતાના નાગરિકો માટે નવી એડવાઇઝરી જાહેર કરી છે. રિયાધ સ્થિત ભારતીય દૂતાવાસે ભારતીયોને સતર્ક રહેવા અને હવાઈ હુમલાની સ્થિતિમાં ઘરની અંદર જ રહેવાની સલાહ આપી છે.
દૂતાવાસે જણાવ્યું છે કે, સાઉદી અરબમાં રહેતા તમામ ભારતીયોએ શાંતિ જાળવવી અને સતર્કતા રાખવી. જો હવાઈ હુમલો થાય તો ઘરની અંદર જ રહેવું અને સ્થાનિક પ્રશાસન દ્વારા અધિકૃત માધ્યમોથી જાહેર કરાયેલા નિર્દેશોનું પાલન કરવું. બદલાતી સુરક્ષા સ્થિતિ વચ્ચે નાગરિકોએ સત્તાવાર સૂચનાઓ પર જ ધ્યાન આપવું જોઈએ.
સાઉદી અરબમાં સુરક્ષાને લઈને ચિંતાનું મોટું કારણ 10 ઑક્ટોબરે રિયાધના કિંગ ખાલિદ ઇન્ટરનેશનલ ઍરપૉર્ટ પર થયેલો હુમલો છે. આ હુમલામાં એક ભારતીય નાગરિકનું મોત થયું હતું, જ્યારે 10 ભારતીયો સહિત અનેક લોકો ઘાયલ થયા હતા.
દૂતાવાસે સ્પષ્ટ કર્યું છે કે, વર્તમાન પરિસ્થિતિને જોતા ભારતીયોએ ગભરાવાની જરૂર નથી, પરંતુ અત્યંત સાવધાન રહેવાની જરૂર છે. સુરક્ષા સાથે જોડાયેલી માહિતી માટે સત્તાવાર માધ્યમોના દિશા નિર્દેશોનું પાલન કરવું અનિવાર્ય છે.