ભારતીય ક્રિકેટ કંટ્રોલ બોર્ડ (BCCI)એ 2 નવેમ્બરે રાઇઝિંગ સ્ટાર એશિયા કપ માટે 15 સભ્યોની ઇન્ડિયા-A ટીમની જાહેરાત કરી છે. તિલક વર્માને કેપ્ટન અને રજત પાટીદારને વાઇસ કેપ્ટન બનાવવામાં આવ્યા છે. ટીમમાં 15 વર્ષીય વૈભવ સૂર્યવંશી, અભિષેક શર્મા અને રિંકુ સિંહ જેવા ખેલાડીઓનો સમાવેશ થાય છે.
આ ટુર્નામેન્ટ 19થી 29 નવેમ્બર સુધી કતારની રાજધાની દોહામાં રમાશે. ભારત પોતાની પ્રથમ મેચ 20 નવેમ્બરે નેપાળ સામે રમશે. ત્યારબાદ 22 નવેમ્બરે પાકિસ્તાન-A સામે અને 24 નવેમ્બરે UAE સામે મુકાબલો થશે.
રાઇઝિંગ સ્ટાર એશિયા કપ એ એશિયન ક્રિકેટ કાઉન્સિલ (ACC)ની ટુર્નામેન્ટ છે, જેને પહેલાં ઇમર્જિંગ ટીમ એશિયા કપ તરીકે ઓળખવામાં આવતી હતી. તેનો હેતુ એશિયાની ઊભરતી ક્રિકેટ પ્રતિભાઓને આંતરરાષ્ટ્રીય સ્તરે રમવાનો અનુભવ આપવાનો છે. આમાં ભારત, પાકિસ્તાન, શ્રીલંકા, બાંગ્લાદેશ અને અફઘાનિસ્તાન જેવા દેશોની A ટીમો ભાગ લે છે. સરળ શબ્દોમાં કહીએ તો A ટીમ સિનિયર નેશનલ ટીમથી એક સ્તર નીચેની ટીમ છે. આ વખતે ટુર્નામેન્ટ 50 ઓવરના ફોર્મેટમાં રમાશે, જ્યારે ગયા વર્ષે તે T20 ફોર્મેટમાં રમાઈ હતી.
તિલક વર્માની કેપ્ટનશિપ હેઠળ વૈભવ સૂર્યવંશી અગાઉ પણ ઇન્ડિયા-A માટે રમી ચૂક્યા છે. શ્રીલંકામાં 2026ની વનડે ટ્રાઈ-નેશન A સિરીઝમાં વૈભવે 5 મેચમાં 211 રન બનાવ્યા હતા, જેમાં તેમનો સ્ટ્રાઈક રેટ 200.95 રહ્યો હતો. ટ્રાઈ સિરીઝની ફાઈનલમાં શ્રીલંકા સામે તેમણે 29 બોલમાં 94 રનની ઇનિંગ રમી હતી.
વૈભવ સૂર્યવંશીએ 12 વર્ષની ઉંમરે રણજી ટ્રોફીમાં ડેબ્યૂ કર્યું હતું. રાજસ્થાન રોયલ્સે તેમને 2025માં IPL રમવાની તક આપી. 14 વર્ષની ઉંમરે તેમણે ગુજરાત ટાઇટન્સ સામે 38 બોલમાં 101 રન બનાવીને IPL ઇતિહાસમાં સૌથી નાની ઉંમરે સદી ફટકારવાનો રેકોર્ડ બનાવ્યો. IPL 2026માં વૈભવે 16 મેચોમાં 776 રન બનાવ્યા અને 72 છગ્ગા ફટકાર્યા, જેના કારણે તેમને ઓરેન્જ કેપ મળી. આ જ વર્ષે અંડર-19 વર્લ્ડ કપની ફાઇનલમાં તેમણે 80 બોલમાં 175 રનની ઇનિંગ રમી હતી. રાઇઝિંગ સ્ટાર એશિયા કપની છેલ્લી સિઝનમાં તેઓ બીજા સૌથી વધુ રન બનાવનાર બેટર હતા, તેમણે 4 મેચમાં 239 રન બનાવ્યા હતા, જેમાં એક સદી અને 22 છગ્ગાનો સમાવેશ થાય છે. તેમનો સર્વશ્રેષ્ઠ સ્કોર 144 રન હતો. ટુર્નામેન્ટમાં તેમના કરતાં વધુ રન માત્ર પાકિસ્તાનના શાહીનના માજ સદાકતે બનાવ્યા હતા, જેમના નામે 258 રન હતા. વૈભવે 10 T20 ઇન્ટરનેશનલ મેચોમાં 295 રન બનાવ્યા છે.
તિલક વર્માને કેપ્ટન બનાવવાનું કારણ તેમનો આંતરરાષ્ટ્રીય અને સ્થાનિક ક્રિકેટનો અનુભવ છે. તેઓ IPLમાં મુંબઈ ઇન્ડિયન્સ માટે સતત સારું પ્રદર્શન કરતા રહ્યા છે. આ ઉપરાંત, તેઓ હૈદરાબાદની રણજી ટીમની કેપ્ટનશિપ પણ કરી ચૂક્યા છે. 2024માં તેમની કેપ્ટનશિપ હેઠળ હૈદરાબાદે રણજી ટ્રોફીનો પ્લેટ ડિવિઝન જીત્યો હતો. 2025 એશિયા કપની ફાઇનલમાં તેમણે અણનમ 69 રન બનાવીને પાકિસ્તાન સામે જીત અપાવી હતી. તિલક વર્મા ભારતીય T20 ટીમના વાઇસ કેપ્ટન પણ છે.
રજત પાટીદારને વાઇસ કેપ્ટન બનાવવામાં આવ્યા છે. તેઓ મધ્ય પ્રદેશના બેટર છે અને IPLમાં રોયલ ચેલેન્જર્સ બેંગલુરુની કેપ્ટનશિપ કરે છે. તેમની કેપ્ટનશિપ હેઠળ RCBએ 2025 અને 2026માં સતત બે IPL ખિતાબ જીત્યા. IPL 2026માં પાટીદારે 501 રન બનાવ્યા હતા. તેઓ સ્થાનિક ક્રિકેટમાં મધ્ય પ્રદેશ અને સેન્ટ્રલ ઝોનની કેપ્ટનશિપ પણ કરી ચૂક્યા છે.
ટીમમાં અભિષેક શર્મા દુનિયાના નંબર-1 T20 બેટર છે. T20 ઇન્ટરનેશનલ ક્રિકેટમાં તેમનો શ્રેષ્ઠ સ્કોર 135 રન છે અને તેમણે 4 T20 ઇન્ટરનેશનલ સદી ફટકારી છે. રિંકુ સિંહ મિડલ ઓર્ડરમાં બેટિંગ કરે છે. IPL 2023માં ગુજરાત ટાઇટન્સ સામે તેમણે સતત 5 છગ્ગા ફટકારીને કોલકાતા નાઇટ રાઇડર્સને જીત અપાવી હતી.
વિકેટકીપર-બેટર તરીકે પ્રભસિમરન સિંહ અને કુમાર કુશાગ્રને ટીમમાં સ્થાન મળ્યું છે. પ્રભસિમરન પંજાબ માટે ડોમેસ્ટિક ક્રિકેટ રમે છે અને IPLમાં પંજાબ કિંગ્સનો ભાગ છે. IPL 2026માં તેમણે 14 મેચોમાં 510 રન બનાવ્યા હતા. કુમાર કુશાગ્ર ઝારખંડથી આવે છે.
ઝડપી બોલિંગની જવાબદારી હર્ષિત રાણા અને પ્રિન્સ યાદવ જેવા ખેલાડીઓ પર રહેશે. હર્ષિતે IPL 2024માં કોલકાતા નાઇટ રાઇડર્સ માટે શાનદાર પ્રદર્શન કર્યું હતું.