ન્યૂઝીલેન્ડ સામેની ચોથી વનડેમાં ભારતીય ટીમ 334 રનના લક્ષ્યાંકનો પીછો કરતા માત્ર 89 રનમાં ઓલઆઉટ થઈ ગઈ, જેના કારણે ટીમને 244 રનની કારમી હારનો સામનો કરવો પડ્યો. આ હાર બાદ હેડ કોચ ગૌતમ ગંભીરે બેટિંગ પ્રદર્શન અંગે ચિંતા વ્યક્ત કરી છે.
મેચ પછીની પ્રેસ કોન્ફરન્સમાં ગંભીરે કહ્યું કે, બેટ્સમેનોએ મુશ્કેલ પરિસ્થિતિઓનો સામનો કરવાના રસ્તા જાતે શોધવા પડશે. તેમણે ટેકનિકલ બાબતોમાં ઊંડા ઉતરવાનો ઇનકાર કર્યો અને જવાબદારી બેટ્સમેનો પર છોડી દીધી. ગંભીરે જણાવ્યું કે, સીમ મુવમેન્ટને રોકવી એ બેટ્સમેનનું કામ છે. આ મેચમાં એરિયા અને લેન્થે પણ મુશ્કેલી ઊભી કરી, અને ટીમ ક્રીઝ પર ફસાઈ ગઈ હતી.
ભારતીય બેટિંગ લાઇનઅપનું વારંવાર ધરાશાયી થવું ચિંતાનો વિષય બન્યું છે. અગાઉની મેચમાં પણ ભારતે 111 રનમાં 7 વિકેટ ગુમાવી હતી. ગંભીરે કહ્યું કે, આવી પરિસ્થિતિઓમાં 35-40 રન પર 0 વિકેટ રહેવી ઠીક છે, પરંતુ ટીમે માનસિક અને કૌશલ્યની દૃષ્ટિએ તૈયાર રહેવું પડશે. તેમણે આશા વ્યક્ત કરી કે ટીમ છેલ્લી મેચમાં સારું પ્રદર્શન કરશે.
મેટ હેનરીની બોલિંગને 'અનપ્લેએબલ' ગણાવવાનો ઇનકાર કરતાં ગંભીરે કહ્યું કે, આંતરરાષ્ટ્રીય ક્રિકેટમાં કોઈપણ બોલ અનપ્લેએબલ હોતો નથી. હેનરીએ સારા એરિયામાં બોલિંગ કરી, પરંતુ અનુભવી ભારતીય બેટિંગ લાઇનઅપે તેનો સામનો કરવો જોઈતો હતો. 90 રનમાં ઓલઆઉટ થવું ચિંતાજનક છે, કારણ કે વર્લ્ડ કપ નજીક છે.
આ મેચમાં મેટ હેનરીની પ્રથમ ઓવરે જ ભારતની હારની સ્ક્રિપ્ટ લખાઈ ગઈ હતી. હેનરીએ રોહિત શર્મા, વિરાટ કોહલી અને શ્રેયસ અય્યરને શૂન્ય રનમાં આઉટ કર્યા. ત્યારબાદ કાઇલ જેમીસને ઋતુરાજ ગાયકવાડને પેવેલિયન મોકલ્યો અને ભારતનો સ્કોર 9 રનમાં 4 વિકેટ થઈ ગયો. ઈશાન કિશન અને અક્ષર પટેલે 44 રનની ભાગીદારી કરી થોડો સમય ટકવાનો પ્રયાસ કર્યો, પરંતુ હેનરીએ ફરી બોલિંગ કરીને કિશનને આઉટ કર્યો અને 27 રન આપીને 6 વિકેટ ઝડપી. ભારતીય ટીમ આખરે 89 રનમાં ઢેર થઈ ગઈ.