જાપાનમાં શરૂ થયેલી એશિયન પેરા ગેમ્સ 2026ના પ્રથમ દિવસે ભારતીય ખેલાડીઓએ 4 ગોલ્ડ, 5 સિલ્વર અને 2 બ્રોન્ઝ સહિત કુલ 11 મેડલ જીત્યા છે. આ સાથે ભારત મેડલ ટેબલમાં ચોથા ક્રમે પહોંચ્યું છે.
પ્રથમ દિવસે શૂટિંગ, એથ્લેટિક્સ, પેરા-જુડો અને સ્વિમિંગમાં ભારતીય ખેલાડીઓએ શાનદાર પ્રદર્શન કર્યું હતું.
શૂટિંગમાં મહિલાઓની 10 મીટર એર રાઇફલ સ્ટેન્ડિંગ SH1 સ્પર્ધામાં ભારતને ગોલ્ડ અને સિલ્વર બંને મેડલ મળ્યા હતા. મોના અગ્રવાલે 250.0 પોઇન્ટ્સ સાથે ગોલ્ડ મેડલ જીત્યો અને એશિયન પેરા ગેમ્સનો અગાઉનો રેકોર્ડ તોડ્યો હતો. અવની લેખરાએ 249.6 પોઇન્ટ્સ સાથે સિલ્વર મેડલ જીત્યો હતો. બંને વચ્ચે માત્ર 0.4 પોઇન્ટ્સનું અંતર હતું.
એથ્લેટિક્સમાં પુરુષોની T47 લાંબી કૂદમાં નિષાદ કુમારે 7.11 મીટરનો કૂદકો લગાવીને ગોલ્ડ મેડલ જીત્યો હતો. પુરુષોની F46 ભાલા ફેંકમાં રિંકુ હુડ્ડાએ ગોલ્ડ અને અજિત સિંહ યાદવે સિલ્વર મેડલ જીત્યો હતો. મહિલાઓની 1500 મીટર દોડની T12 અને T13 ઇવેન્ટમાં સૌમ્યાએ ગોલ્ડ અને રાધા વેંકટેશે સિલ્વર મેડલ જીત્યો હતો. મહિલાઓની 1500 મીટર T11 રેસમાં રાવની વલાસાનેનીએ બ્રોન્ઝ મેડલ જીત્યો હતો.
પેરા-જુડોમાં મહિલાઓની J2-52 કિલોગ્રામ સ્પર્ધામાં કોકિલા કૌશિકલાટે સિલ્વર મેડલ જીત્યો હતો, જ્યારે પુરુષોની J1-70 કિલોગ્રામ સ્પર્ધામાં કપિલ પરમારે બ્રોન્ઝ મેડલ જીત્યો હતો. પેરા-સ્વિમિંગમાં પુરુષોની 100 મીટર ફ્રીસ્ટાઇલ S13 ઇવેન્ટમાં રવિ કાર્તિક બુડિગીનાએ સિલ્વર મેડલ જીત્યો હતો.
પ્રથમ દિવસની આ સફળતાથી ભારતીય ટુકડાનો મનોબળ ઊંચો છે. આગામી દિવસોમાં ભારત વધુ મેડલ જીતવાની આશા સાથે સ્પર્ધામાં ઉતરશે.