તિરુવનંતપુરમના ગ્રીનફિલ્ડ ઇન્ટરનેશનલ સ્ટેડિયમ ખાતે ભારત અને વેસ્ટઇન્ડિઝ વચ્ચે રમાઈ રહેલી વનડે શ્રેણીની પ્રથમ મેચમાં કેરેબિયન ઓપનિંગ જોડીએ ઇતિહાસ રચ્યો છે. ભારતીય કેપ્ટન શુભમન ગિલે ટોસ જીતીને પહેલા બોલિંગ કરવાનો નિર્ણય લીધો હતો, પણ વેસ્ટઇન્ડિઝના ઓપનર જસ્ટિન ગ્રીવ્સ અને જોન કેમ્પબેલે આ નિર્ણયને ખોટો સાબિત કરી દીધો.
બંને ઓપનરોએ માત્ર 13.3 ઓવરમાં 100 રનની ભાગીદારી પૂરી કરી. ભારતીય ધરતી પર 24 વર્ષ પછી વેસ્ટઇન્ડિઝની કોઈ ઓપનિંગ જોડીએ ભારત સામે વનડેમાં 100 રનની ભાગીદારી કરી છે. 2025થી અત્યાર સુધીમાં વેસ્ટઇન્ડિઝે 20થી વધુ વનડે રમી હતી, પણ તેની કોઈ ઓપનિંગ જોડી પ્રથમ વિકેટ માટે 65 રન પણ નહોતી કરી શકી.
ખાસ વાત એ છે કે જોન કેમ્પબેલ અને જસ્ટિન ગ્રીવ્સ વનડેમાં ઓપનર તરીકે માત્ર બીજી વખત સાથે ક્રિઝ પર ઉતર્યા હતા. જ્યાં કેરેબિયન ટીમ મજબૂત ઓપનિંગ સ્ટેન્ડ માટે ઝઝૂમી રહી હતી, ત્યાં આ જોડીએ આક્રમક અભિગમ અપનાવી માત્ર 81 બોલમાં 100 રન જોડી દીધા.
ગ્રીવ્સ અને કેમ્પબેલે પ્રથમ ઓવરથી જ ભારતીય ફાસ્ટ બોલરોની લાઇન-લેન્થ બગાડી. પાવરપ્લેની 10 ઓવર પૂરી થઈ ત્યાં સુધીમાં વેસ્ટઇન્ડિઝે એક પણ વિકેટ ગુમાવ્યા વિના 85 રન જોડ્યા. ભારત સામે પ્રથમ 10 ઓવરમાં વેસ્ટઇન્ડિઝનો આ ત્રીજો સૌથી મોટો સ્કોર છે.
ભારત સામે પાવરપ્લેમાં વેસ્ટઇન્ડિઝના સૌથી મોટા સ્કોર: 114/0 – પોર્ટ ઓફ સ્પેન (2019), 86/0 – વડોદરા (2002), 85/0 – તિરુવનંતપુરમ (2026), 82/1 – ઢાકા (1998), 81/1 – અમદાવાદ (2002).