ભારત અને ન્યૂઝીલેન્ડ વચ્ચેની પાંચ વનડે મેચોની સિરીઝની ત્રીજી મેચ હેમિલ્ટનના સેડન પાર્કમાં સવારે 7:30 વાગ્યે શરૂ થશે. ભારત સિરીઝમાં 2-0થી આગળ છે. ટીમે ઓકલૅન્ડમાં પ્રથમ વનડે 5 વિકેટે અને વેલિંગ્ટનમાં બીજી મેચ 6 વિકેટે જીતી હતી.
વિરાટ કોહલી ન્યૂઝીલેન્ડ સામે વનડેમાં 2000 રન પૂરા કરવા માટે 22 રન દૂર છે. જ્યારે રોહિત શર્માને કારકિર્દીના 1000 છગ્ગા પૂરા કરવા માટે માત્ર એક છગ્ગાની જરૂર છે. રોહિતે ટેસ્ટમાં 88, વનડેમાં 383, T-20 ઈન્ટરનેશનલમાં 205 અને IPLમાં 323 છગ્ગા ફટકાર્યા છે. આ સિદ્ધિ સાથે રોહિત 1000 છગ્ગા ફટકારનાર પ્રથમ ભારતીય અને વિશ્વના ત્રીજા બેટર બનશે. તેમના પહેલાં ક્રિસ ગેલ અને કીરોન પોલાર્ડ આ સિદ્ધિ હાંસલ કરી ચૂક્યા છે.
ન્યૂઝીલેન્ડે 2019માં ભારત સામે સિરીઝ હાર્યા બાદથી પોતાના ઘરમાં સતત 11 દ્વિપક્ષીય વનડે સિરીઝ જીતી છે. સેડન પાર્કમાં પણ ન્યૂઝીલેન્ડનો રેકોર્ડ મજબૂત છે. અહીં બંને ટીમો વચ્ચે 8 વનડે રમાઈ છે. ન્યૂઝીલેન્ડે 6 અને ભારતે 1 મેચ જીતી છે, જ્યારે એક મુકાબલો વરસાદને કારણે રદ થયો હતો. ન્યૂઝીલેન્ડે આ મેદાન પર પોતાની છેલ્લી 12 પૂર્ણ થયેલી વનડે મેચો પણ જીતી છે. તેને અહીં છેલ્લી હાર ફેબ્રુઆરી 2017માં સાઉથ આફ્રિકા સામે વરસાદથી પ્રભાવિત મેચમાં મળી હતી.
રોહિતે દક્ષિણ આફ્રિકા, ઇંગ્લેન્ડ, ન્યૂઝીલેન્ડ અને ઓસ્ટ્રેલિયામાં 4987 રન બનાવ્યા છે. તેમાં 17 સદી અને 23 અડધી સદી સામેલ છે. 13 રન બનાવતાની સાથે જ તેઓ આ ચારેય દેશોમાં 5000 ઈન્ટરનેશનલ રન બનાવનાર પ્રથમ ભારતીય ઓપનર બનશે.
બીજી વનડેમાં ન્યૂઝીલેન્ડના ઝડપી બોલર કાઇલ જેમિસને શુભમન ગિલને પહેલા જ બોલે આઉટ કરી દીધો હતો. હેમિલ્ટનમાં ગિલ પાસે આ બોલિંગનો જવાબ આપવાની તક હશે. આ સિરીઝમાં આ તેમની છેલ્લી વનડે પણ હોઈ શકે છે. ત્યાર બાદ તેઓ ટેસ્ટ સિરીઝની તૈયારી માટે વનડે ટીમથી અલગ થઈ જશે. તેમની જગ્યાએ વાઇસ કેપ્ટન શ્રેયસ અય્યર ટીમની કમાન સંભાળશે.
આ સિરીઝમાં વિરાટ કોહલીએ ભારત માટે સૌથી વધુ રન બનાવ્યા છે, જ્યારે ગુરનુર બરાર ટોચના વિકેટટેકર છે.
ન્યૂઝીલેન્ડના શરૂઆતના 4 બેટરોનું પ્રદર્શન અત્યાર સુધી નિરાશાજનક રહ્યું છે. વિલ યંગ, ટિમ સીફર્ટ, હેનરી નિકોલ્સ અને ટોમ લાથમ સામે પોતાની જગ્યા સાબિત કરવાનો પડકાર છે. યંગ છેલ્લી 10 ઘરેલુ વનડે ઇનિંગ્સમાં માત્ર એક જ વખત બે આંકડા સુધી પહોંચી શક્યા છે. ન્યૂઝીલેન્ડને ડેરિલ મિચેલ પાસેથી પણ આશાઓ રહેશે. તેઓ સિરીઝની બે મેચોમાં 83 રન બનાવી ચૂક્યા છે. પ્રથમ વનડેમાં તેમણે 55 રન બનાવ્યા હતા.
સિરીઝની શરૂઆતની બંને મેચોમાં બોલરોનું વર્ચસ્વ રહ્યું છે. ઑકલૅન્ડ અને વેલિંગ્ટનમાં ભેજને કારણે બોલ સ્વિંગ અને સીમ થયો હતો. બીજી વનડેમાં ન્યૂઝીલેન્ડની ટીમ 134 રન પર ઓલઆઉટ થઈ ગઈ હતી. ન્યૂઝીલેન્ડમાં ભારત સામે તેનો આ સૌથી ઓછો વનડે સ્કોર છે. વેલિંગ્ટનમાં ભારતે પોતાના 113 રનમાં 78 રન ચોગ્ગા-છગ્ગાથી બનાવ્યા હતા. ન્યૂઝીલેન્ડના 134 રનમાં 60 રન બાઉન્ડરીથી આવ્યા હતા. પિચ પર બોલ અટકીને આવી રહ્યો હતો, તેથી બેટર્સને રન બનાવવા માટે આક્રમક બનવું પડ્યું હતું. હેમિલ્ટનમાં પણ ઝડપી બોલરોને મદદ મળવાની આશા છે. ગયા વર્ષે આ મેદાન પર ઇંગ્લૅન્ડ અને વેસ્ટ ઇન્ડિઝની ટીમો અનુક્રમે 175 અને 161 રન પર ઓલઆઉટ થઈ ગઈ હતી.
મંગળવારે વરસાદની શક્યતા વ્યક્ત કરવામાં આવી છે. સતત વરસાદને કારણે ભારતીય ટીમને મેચના એક દિવસ પહેલાં ઇન્ડોર અભ્યાસ કરવો પડ્યો હતો. પિચ તૈયાર કરવા માટે ગ્રાઉન્ડ સ્ટાફને પણ માત્ર અડધો દિવસ મળ્યો હતો. આવી સ્થિતિમાં મેદાન પર ભેજ રહેવાની અને ઝડપી બોલરોને મદદ મળવાની આશા છે. વરસાદને કારણે ટોસ પણ મહત્વપૂર્ણ બની શકે છે.
ન્યૂઝીલેન્ડના ઝડપી બોલર મેટ હેનરી હજુ સુધી કન્કશનમાંથી સાજા થઈને રમવા માટે ફિટ જાહેર થયા નથી. જ્યારે બેટિંગ દરમિયાન માથાના પાછળના ભાગમાં ઈજા થતાં બ્લેર ટિકનર આગામી બે મેચમાં નહીં રમે. ટિકનરની જગ્યાએ બીજી વનડેમાં કન્કશન સબ્સ્ટિટ્યુટ તરીકે રમેલા મેટ ફિશર ત્રીજી વનડેમાં રમે તેવી અપેક્ષા છે. ક્રિસ્ટિયન ક્લાર્કને કવર તરીકે ટીમમાં સામેલ કરવામાં આવ્યો છે.
ભારતની સંભવિત પ્લેઇંગ-11: રોહિત શર્મા, શુભમન ગિલ (કેપ્ટન), વિરાટ કોહલી, શ્રેયસ અય્યર, અક્ષર પટેલ, કેએલ રાહુલ (વિકેટકીપર), નમન ધીર, અંશુલ કંબોજ, આકીબ નબી, અર્શદીપ સિંહ, ગુરનૂર બરાર.