પાકિસ્તાનના પૂર્વ વડાપ્રધાન ઇમરાન ખાનની જેલમાં હાલત બગડતી જાય છે. તેમને લઈને ઓસ્ટ્રેલિયાના સાત ભૂતપૂર્વ ક્રિકેટ કેપ્ટનોએ ચિંતા વ્યક્ત કરી છે અને ઓસ્ટ્રેલિયન વિદેશ મંત્રી પેની વોંગને રાજદ્વારી હસ્તક્ષેપ કરવા અપીલ કરી છે. તેમણે આ માટે એક પત્ર લખ્યો છે.
ઇમરાન ખાન હાલમાં 73 વર્ષના છે. તેમને 2023થી રાવલપિંડીની અદિયાલા જેલમાં રાખવામાં આવ્યા છે. તેમના પર ભ્રષ્ટાચાર સહિતના ઘણા આરોપો છે, જેમાં તેમને 14 વર્ષની સજા થઈ છે.
પત્ર પર જેમણે હસ્તાક્ષર કર્યા છે તેમાં ગ્રેગ ચેપલ, એલન બોર્ડર, ઇયાન ચેપલ, બેલિન્ડા ક્લાર્ક, કિમ હ્યુજીસ, માર્ક ટેલર અને સ્ટીવ વોનો સમાવેશ થાય છે. ગ્રેગ ચેપલે ઓસ્ટ્રેલિયા માટે 87 ટેસ્ટ મેચ રમી છે અને ભારતીય પુરુષ ટીમના કોચ પણ રહ્યા છે.
તેમણે કહ્યું, 'અમને ચિંતા છે કે તેઓ જેલમાં મૃત્યુ પામશે.' ગ્રેગ ચેપલે 2022માં ઇસ્લામાબાદમાં ઇમરાન ખાનને મળ્યા હતા. તે સમયે ખાન વડાપ્રધાન હતા અને તેમના મતે સંપૂર્ણ સ્વસ્થ હતા. હવે તેમની અટકાયતમાંથી આવતા સમાચારોથી તેઓ ચોંકી ગયા છે.
પત્રમાં કહેવામાં આવ્યું છે કે ઇમરાન ખાને પાકિસ્તાનને તેનો એકમાત્ર વિશ્વ કપ જીતાડ્યો છે અને વડાપ્રધાન તરીકે પણ દેશનું નેતૃત્વ કર્યું છે. ઓસ્ટ્રેલિયન લોકો તેમને ખૂબ માન આપે છે. તેમણે કેન્સરની હોસ્પિટલ પણ બનાવી છે, જેથી લોકોને સારવાર મળે.
ઇમરાન ખાનના પરિવારે પણ તેમના સ્વાસ્થ્ય અંગે ચિંતા વ્યક્ત કરી છે. પત્રમાં કહેવાયું છે કે તેમને પૂરતી તબીબી સુવિધા મળતી નથી, પરિવારને મળવા પર પ્રતિબંધ છે અને વકીલો સુધી પહોંચ પણ મર્યાદિત છે.
કેપ્ટનોએ કહ્યું છે, 'અમે તેમની સામે ચાલી રહેલા કાનૂની કે રાજકીય મામલાં પર કોઈ વલણ અપનાવતા નથી. તે પાકિસ્તાનનો આંતરિક મામલો છે. પરંતુ કસ્ટડીમાં વ્યક્તિ સાથે કેવો વ્યવહાર કરવામાં આવે છે તે મૂળભૂત માનવતાનો પ્રશ્ન છે.'
આ પહેલીવાર નથી થયું. આ વર્ષની શરૂઆતમાં સુનીલ ગાવસ્કર, કપિલ દેવ, દિલીપ વેંગસરકર સહિત 21 આંતરરાષ્ટ્રીય કેપ્ટનોએ પાકિસ્તાનના વડાપ્રધાન શાહબાઝ શરીફને પત્ર લખીને ઇમરાન ખાનની હાલત અંગે ચિંતા વ્યક્ત કરી હતી. છેલ્લા છ મહિનામાં બે વાર આ મુદ્દો ઉઠાવવામાં આવ્યો છે, પણ સ્થિતિમાં સુધારો થયો નથી.
કેપ્ટનોએ ઓસ્ટ્રેલિયન સરકારને અપીલ કરી છે કે તે પાકિસ્તાની અધિકારીઓ સમક્ષ આ મુદ્દો ઉઠાવે. ગ્રેગ ચેપલે તાજેતરના અઠવાડિયામાં પેની વોંગને મળવાની વિનંતી કરી છે, જેથી તેઓ સાતેય કેપ્ટનો વતી વાત કરી શકે.
ઇમરાન ખાન પર વડાપ્રધાન પદ પરથી હટ્યા બાદ 100થી વધુ કેસ નોંધાયા છે. તેમાં ભ્રષ્ટાચાર, લાંચ, સરકારી ગુપ્ત માહિતી લીક કરવા અને સરકારી ભેટોના ગેરકાયદેસર વેચાણના આરોપો છે. ઇમરાન ખાને આ બધા આરોપોને નકાર્યા છે. તેમની પાર્ટી પાકિસ્તાન તહરીક-એ-ઇન્સાફ (PTI) કહે છે કે આ કેસો રાજકીય બદલાની કાર્યવાહી છે.