ચોમાસું પૂરું થવાની તૈયારીમાં છે ત્યારે ભારતીય હવામાન વિભાગ (IMD)એ 19 ઓક્ટોબર માટે નવી ચેતવણી બહાર પાડી છે. વિભાગની આગાહી મુજબ આવતીકાલે દેશના 9 રાજ્યોમાં ભારે વરસાદ પડી શકે છે અને કેટલાક વિસ્તારોમાં તોફાની પવનની પણ શક્યતા છે.
આ રાજ્યોમાં દિલ્હી, ઉત્તર પ્રદેશ, બિહાર, પશ્ચિમ બંગાળ, ઝારખંડ, ઓડિશા, કર્ણાટક, આંધ્રપ્રદેશ અને તમિલનાડુનો સમાવેશ થાય છે. આ વિસ્તારોમાં પવનની ઝડપ કલાકના 80 કિલોમીટર સુધી પહોંચી શકે છે, જે સામાન્ય જનજીવન પર અસર કરી શકે છે. પશ્ચિમ બંગાળ, ઓડિશા અને છત્તીસગઢમાં ભારે પવન ફૂંકાવાની શક્યતા ખાસ નોંધવામાં આવી છે.
ગુજરાતમાં હળવા વરસાદની આગાહી
ગુજરાતમાં સાયક્લોનિક સર્ક્યુલેશન સક્રિય થવાને કારણે આજથી આગામી બે દિવસ રાજ્યના છૂટાછવાયા વિસ્તારોમાં હળવા વરસાદનું અનુમાન છે. ખાસ કરીને દક્ષિણ ગુજરાત અને દક્ષિણ સૌરાષ્ટ્રમાં હળવા ઝાપટાં પડી શકે છે.
આજે રાજકોટ, જૂનાગઢ, દાહોદ, છોટાઉદેપુર અને નર્મદા જિલ્લામાં હળવો વરસાદ થઈ શકે છે. આવતીકાલે ભાવનગર, અમરેલી, નવસારી, વલસાડ, તાપી તેમજ દાદરા અને નગર હવેલીમાં હળવો વરસાદ થવાની શક્યતા છે. અમદાવાદમાં આજે દિવસ દરમિયાન વાદળછાયું વાતાવરણ રહી શકે છે. રાજ્યમાં તાપમાન સામાન્ય કરતાં ઊંચું રહેતાં ગરમી અને બફારો યથાવત્ રહેશે.
પર્વતીય વિસ્તારોમાં કરા અને હિમવર્ષાની શક્યતા
દિલ્હીમાં વરસાદની મોટી આગાહી નથી, પરંતુ પર્વતીય રાજ્યોમાં હવામાન ઝડપથી બગડી શકે છે. ઊંચાઈવાળા વિસ્તારોમાં ભારે વરસાદ સાથે કરા પડવાની ચેતવણી અપાઈ છે. બે રાજ્યોમાં હિમવર્ષા થવાની શક્યતા છે, જેનાથી સ્થાનિક રહેવાસીઓને મુશ્કેલી પડી શકે છે. પૂર્વી ભારતના કેટલાક જિલ્લાઓમાં વીજળીના કડાકા-ભડાકા સાથે વરસાદ પડી શકે છે.
દરિયાકાંઠે રહેતા માછીમારોને પણ સૂચના આપવામાં આવી છે કે તેઓ સલામત સ્થળે ખસી જાય અને હાલ દરિયો ન ખેડે.
હવામાનના પલટાનું કારણ
આ પલટા પાછળ બંગાળની ખાડીમાં સર્જાયેલું હળવા દબાણનું ક્ષેત્ર (લો-પ્રેશર) મુખ્ય કારણ છે. આ સિસ્ટમને કારણે આસપાસના મોટાભાગના વિસ્તારોમાં વરસાદનું જોર વધી શકે છે. ઉત્તર તમિલનાડુ અને અડીને આવેલા દક્ષિણ આંધ્રપ્રદેશના કાંઠે પણ સાયક્લોનિક સર્ક્યુલેશન સર્જાયું છે, જ્યારે દક્ષિણ-પૂર્વ રાજસ્થાન અને દક્ષિણ મધ્યપ્રદેશ પર પણ સમાન સિસ્ટમ સક્રિય છે.
દિલ્હી, યુપી અને બિહારની આગાહી
દિલ્હીમાં 19 ઓક્ટોબરે હળવો વરસાદ પડી શકે છે અને 20 થી 30 કિલોમીટરની ઝડપે પવન ફૂંકાશે. મહત્તમ તાપમાન 32 ડિગ્રી અને લઘુત્તમ 18 ડિગ્રી રહેવાની ધારણા છે.
ઉત્તર પ્રદેશમાં મેરઠ, આગ્રા, ગાઝિયાબાદ, મથુરા, પ્રયાગરાજ, કાનપુર અને ઝાંસીમાં મધ્યમથી ભારે વરસાદની ચેતવણી છે. અહીં પવનની ગતિ 30 થી 40 કિલોમીટર રહી શકે છે અને લખનૌમાં તાપમાન 32 થી 18 ડિગ્રી વચ્ચે રહેવાનો અંદાજ છે.
બિહારમાં પટના, ગયા, ભોજપુર, મુઝફ્ફરપુર, ભાગલપુર અને પૂર્ણિયા સહિતના જિલ્લાઓમાં 30 થી 40 કિલોમીટરની ઝડપે પવન ફૂંકાશે. પટનામાં મહત્તમ તાપમાન 32 ડિગ્રી અને લઘુત્તમ 20 ડિગ્રી રહેવાનો અંદાજ છે.
ઝારખંડ, ઉત્તરાખંડ અને હિમાચલ
ઝારખંડના રાંચી, ધનબાદ, હજારીબાગ અને જમશેદપુરમાં 30 થી 35 કિલોમીટરની ઝડપે પવન ફૂંકાશે અને ભારે વરસાદ પડશે. રાંચીમાં તાપમાન 29 થી 17 ડિગ્રી વચ્ચે રહી શકે છે.
ઉત્તરાખંડના દેહરાદૂન, નૈનિતાલ, ચમોલી અને અલ્મોરામાં 40 કિલોમીટરની ઝડપે તોફાની પવન ફૂંકાઈ શકે છે. દેહરાદૂનમાં મહત્તમ 27 ડિગ્રી અને લઘુત્તમ 15 ડિગ્રી તાપમાન નોંધાવાની ધારણા છે.