દેશમાં હવામાનનો મિજાજ ફરી બદલાઈ રહ્યો છે. હવામાન વિભાગ (IMD)ની નવી આગાહી મુજબ 1 નવેમ્બરે દેશના 13 રાજ્યોમાં ભારે વરસાદ પડવાની શક્યતા છે. આ ફેરફાર બંગાળની ખાડી અને આંદામાન સમુદ્રમાં સક્રિય થયેલી નવી હવામાન સિસ્ટમને કારણે થશે, જેની અસરથી દક્ષિણ અને ઉત્તર ભારતના ઘણા વિસ્તારોમાં વરસાદ ફરી તેજ બનશે.
આ સમયગાળા દરમિયાન 60 થી 80 કિલોમીટર પ્રતિ કલાકની ઝડપે પવન ફૂંકાવાની પણ આગાહી છે. ઉત્તર પ્રદેશ, બિહાર, ઝારખંડ અને હિમાચલ પ્રદેશ જેવા રાજ્યોમાં ગાજવીજ સાથે વરસાદ પડી શકે છે, જ્યારે ઉત્તરાખંડમાં કરા પડવાની પણ શક્યતા છે.
હવામાન વિભાગના સત્તાવાર અહેવાલ પ્રમાણે, દક્ષિણ આંદામાન સમુદ્ર પર સર્જાયેલું નીચું દબાણ (લો પ્રેશર) ધીમે ધીમે પશ્ચિમ-ઉત્તરપશ્ચિમ દિશામાં આગળ વધી રહ્યું છે. 31 ઓક્ટોબરની આસપાસ આ સિસ્ટમ દક્ષિણપૂર્વ બંગાળની ખાડીમાં વધુ મજબૂત બનીને ડિપ્રેશનમાં ફેરવાઈ શકે છે. ત્યારબાદ તે આંધ્રપ્રદેશના દરિયાકાંઠા તરફ આગળ વધશે.
આને ધ્યાનમાં રાખીને 2 અને 3 નવેમ્બરે આંધ્રપ્રદેશના દરિયાકાંઠાના વિસ્તારોમાં ભારેથી અતિ ભારે વરસાદની ચેતવણી જારી કરવામાં આવી છે. આ વિસ્તારોમાં પ્રવાસનું આયોજન કરી રહેલા લોકોએ હવામાનની તાજી માહિતી મેળવી લેવી જોઈએ.
1 થી 5 નવેમ્બર દરમિયાન ક્યાં કેવું હવામાન રહેશે?
1 નવેમ્બરે ઉત્તર પ્રદેશ, બિહાર, ઝારખંડ, ઓડિશા, છત્તીસગઢ, મધ્યપ્રદેશ અને હિમાચલ પ્રદેશમાં હળવાથી ભારે વરસાદની ચેતવણી છે. ઉપરાંત ઉત્તરાખંડ, જમ્મુ-કાશ્મીર, તમિલનાડુ અને કેરળમાં પણ 60 થી 80 કિલોમીટરની ઝડપે પવન સાથે વરસાદ પડી શકે છે.
2 નવેમ્બરે આંધ્રપ્રદેશના દરિયાકાંઠાના વિસ્તારો, છત્તીસગઢ, ઓડિશા, તેલંગાણા, રાયલસીમા અને મધ્યપ્રદેશમાં વરસાદની આગાહી છે. આ દિવસે આંધ્રપ્રદેશ અને યાનમમાં સૌથી વધુ નુકસાનકારક વરસાદનું જોખમ છે.
3 થી 5 નવેમ્બર દરમિયાન તમિલનાડુ, પુડુચેરી, કેરળ, કર્ણાટક, લક્ષદ્વીપ અને ઓડિશાના કેટલાક ભાગોમાં છૂટોછવાયો વરસાદ ચાલુ રહેશે. આ દિવસોમાં બિહાર અને ઝારખંડમાં પણ વાતાવરણમાં ફેરફાર જોવા મળી શકે છે.
દિલ્હી, યુપી અને બિહારમાં હાલની સ્થિતિ
રાજધાની દિલ્હીમાં 1 નવેમ્બરે આકાશમાં આંશિક વાદળો રહેશે. અહીં મહત્તમ તાપમાન 29 ડિગ્રી અને લઘુત્તમ 16 ડિગ્રી સેલ્સિયસની આસપાસ રહેવાની સંભાવના છે. 2 નવેમ્બરથી રાજધાનીનું આકાશ સ્વચ્છ થવા લાગશે.
ઉત્તર પ્રદેશમાં છેલ્લા કેટલાક દિવસોથી પડી રહેલા કમોસમી વરસાદથી 1 નવેમ્બર પછી થોડી રાહત મળવાની આશા છે. 1 થી 2 નવેમ્બર દરમિયાન માત્ર પૂર્વી યુપીમાં હળવો વરસાદ પડી શકે છે, પશ્ચિમી યુપી માટે કોઈ ખાસ ચેતવણી નથી.
બિહારમાં 1 થી 5 નવેમ્બર દરમિયાન છૂટોછવાયો વરસાદ થવાની આગાહી છે. પૂર્વી ચંપારણ અને સીતામઢી જેવા વિસ્તારોમાં અચાનક પૂર આવવાના જોખમ અંગે પણ હવામાન વિભાગે એલર્ટ આપ્યું છે.
મધ્યપ્રદેશ, છત્તીસગઢ અને પહાડી રાજ્યોની સ્થિતિ
મધ્યપ્રદેશ અને છત્તીસગઢમાં 1 થી 4 નવેમ્બર સુધી વાતાવરણ વાદળછાયું રહેશે. 2 નવેમ્બરે છત્તીસગઢમાં વીજળીના કડાકા અને 40 થી 60 કિલોમીટરની ઝડપે તોફાની પવન ફૂંકાવા સાથે ભારે વરસાદનું એલર્ટ આપવામાં આવ્યું છે.
પહાડી રાજ્યો હિમાચલ પ્રદેશ અને ઉત્તરાખંડમાં 1 અને 2 નવેમ્બરે હળવો છૂટોછવાયો વરસાદ પડી શકે છે. 31 ઓક્ટોબરે કેટલાક ભાગોમાં ગાજવીજ અને વીજળી પડવાની શક્યતા છે.