આંતરરાષ્ટ્રીય ક્રિકેટ પરિષદ (ICC) ક્રિકેટમાં આવક વધારવા માટે નવી ટુર્નામેન્ટ શરૂ કરવાની યોજના બનાવી રહી હતી, પરંતુ ભારત, ઓસ્ટ્રેલિયા અને ઇંગ્લેન્ડના ભારે વિરોધ બાદ આ યોજના હાલ પૂરતી સ્થગિત કરવામાં આવી છે. અહેવાલો અનુસાર, ICCએ ઓછામાં ઓછા 2031 સુધી કોઈપણ નવી ટુર્નામેન્ટ શરૂ ન કરવાનો નિર્ણય લીધો છે.
દુબઈમાં યોજાયેલા ICC ક્રિકેટ ઓપરેશન્સ વર્કશોપમાં મહિનાઓ સુધી ચાલેલી ચર્ચા બાદ, આ બેઠક કોઈપણ નવા ટુર્નામેન્ટ પ્રસ્તાવ પર સહમતિ વગર પૂરી થઈ હતી.
અમેરિકન કન્સલ્ટન્સી ફર્મ મેકકિન્સી એન્ડ કંપનીના વ્યૂહાત્મક અહેવાલના આધારે ICCએ વધુ આવક માટે ઘણા નવા વિચારો રજૂ કર્યા હતા. જેમાં T20 ફ્રેન્ચાઇઝ ટીમો વચ્ચે વર્લ્ડ ક્લબ ચેમ્પિયનશિપ અને ખાલી વિન્ડોમાં ચાર દેશોની T20 ટુર્નામેન્ટ યોજવાની યોજના સામેલ હતી.
જોકે, ભારત, ઓસ્ટ્રેલિયા અને ઇંગ્લેન્ડે સ્પષ્ટ કર્યું કે ખેલાડીઓના પહેલેથી જ વ્યસ્ત શેડ્યૂલમાં નવી ટુર્નામેન્ટ માટે કોઈ જગ્યા નથી. તેમણે જણાવ્યું કે નવી ટુર્નામેન્ટ ઉમેરવા માટે ICCને વર્તમાન ODI વર્લ્ડ કપ, T20 વર્લ્ડ કપ કે ચેમ્પિયન્સ ટ્રોફી જેવી મોટી ઇવેન્ટ્સમાં ઘટાડો કરવો પડે, જે શક્ય નથી.
આગામી ફ્યુચર ટુર્સ પ્રોગ્રામ (FTP)માં એકમાત્ર મોટો સંભવિત ફેરફાર વર્લ્ડ ટેસ્ટ ચેમ્પિયનશિપ (WTC)નું વિસ્તરણ હોઈ શકે છે. આવતા વર્ષથી WTCમાં ટીમોની સંખ્યા નવથી વધારીને 12 કરવામાં આવી શકે છે. અફઘાનિસ્તાન, આયર્લેન્ડ અને ઝિમ્બાબ્વેને પણ ટેસ્ટ ચેમ્પિયનશિપ ચક્રમાં સામેલ કરવામાં આવે તેવી શક્યતા છે. જોકે, ICCએ હજુ સુધી સભ્ય બોર્ડને તેની સત્તાવાર યોજના મોકલી નથી.
ICCની યોજનાઓને નકારી કાઢતા, ત્રણ મુખ્ય બોર્ડે 2031 સુધીના તેમના દ્વિપક્ષીય શેડ્યૂલને અંતિમ સ્વરૂપ આપ્યું છે. આગામી WTCની શરૂઆત એશિઝથી થશે, ત્યારબાદ 2029-30માં ઇંગ્લેન્ડનો ઓસ્ટ્રેલિયા પ્રવાસ યોજાશે. ઇંગ્લેન્ડ 2028ની શરૂઆતમાં ભારતમાં પાંચ ટેસ્ટની શ્રેણી રમશે, ત્યારબાદ 2029માં પાંચ ટેસ્ટ મેચ રમવા ભારત ઇંગ્લેન્ડનો પ્રવાસ કરશે.