લગ્ન પછી પતિ અને પત્ની બંનેની પોતાની અંગત અને પારિવારિક જવાબદારીઓ વધી જાય છે. ખાસ કરીને જ્યારે બંને નોકરી કરતા હોય ત્યારે દિવસનો મોટો ભાગ કામ અને દોડધામમાં જ વીતી જાય છે. આવા સમયમાં પતિ ઑફિસેથી ઘરે પાછો ફરે ત્યારે એ સમય માત્ર ઔપચારિક વાતચીતનો નહીં, પણ એકબીજા સાથે શાંતિથી સારો સમય વિતાવવાનો બનવો જોઈએ.
ઑફિસનું કામ, ટ્રાફિક, મીટિંગ્સ અને દિવસભરની ભાગદોડ પછી ઘરનું હૂંફાળું વાતાવરણ વ્યક્તિને મોટી રાહત આપી શકે છે. પતિ ઘરે આવ્યા પછી પત્ની કેટલીક નાની-નાની બાબતોનું ધ્યાન રાખે તો બંને વચ્ચે પ્રેમ અને નિકટતા વધી શકે છે. આવો જાણીએ એ બાબતો કઈ છે.
ઘરે આવતાં જ ફરિયાદોની લાંબી યાદી ન શરૂ કરો: પતિ ઘરે પહોંચે કે તરત જ દિવસભરની ફરિયાદો કે બાકી કામોનું લાંબું લિસ્ટ સામે મૂકી દેવામાં આવે તો વાતચીત શરૂ થાય તે પહેલાં જ વાતાવરણ તણાવપૂર્ણ બની જાય છે. જો કોઈ મહત્વની વાત કરવી હોય તો તે થોડીવાર પછી આરામથી પણ કરી શકાય. પહેલાં પાણી આપવું, થોડીવાર આરામથી બેસવા દેવું કે 'આજનો દિવસ કેવો રહ્યો?' તેવું પૂછવું એ વાતચીતની સારી શરૂઆત છે. આ જ રીતે, પતિએ પણ પત્નીના આખા દિવસના ઘર કે ઑફિસના કામ અને થાકને સમજવો જોઈએ. બંને એકબીજાને થોડો સમય આપે તો નાની-નાની વાતો પરની તકરાર આપોઆપ ટળી જાય છે.
થોડી મિનિટો ફક્ત એકબીજા માટે કાઢો: સંબંધ ગાઢ બનાવવા માટે હંમેશાં મોંઘી ભેટ કે બહાર ફરવા જવાની જરૂર નથી. રોજ ઘરે સાથે બેસીને થોડી મિનિટો શાંતિથી વાત કરવી પણ ઘણી અસરકારક સાબિત થાય છે. ઑફિસમાં શું બન્યું, દિવસ કેવો રહ્યો, કોઈ ટેન્શન તો નથી ને — આવી નાની વાતો એકબીજાને પૂછી શકાય. ઘણીવાર વ્યક્તિને સલાહ કરતાં પણ એવી વ્યક્તિની જરૂર હોય છે જે તેની વાત શાંતિથી સાંભળી શકે. તેથી પતિ-પત્ની બંનેએ એકબીજાની વાત ધ્યાનપૂર્વક સાંભળવાની આદત કેળવવી જોઈએ.
સાથીનો મૂડ સમજવાનો પ્રયત્ન કરો: રોજ ઑફિસેથી પાછા ફરતી વખતે દરેક વ્યક્તિનો મૂડ એક સરખો હોતો નથી. ક્યારેક કામ સારું થયું હોય તો ઉત્સાહ હોય, તો ક્યારેક કોઈ ટેન્શન કે થાક હોઈ શકે. આવી સ્થિતિમાં પતિ શાંત બેઠા હોય તો તરત એવું માની ન લેવું કે તેઓ નારાજ છે. તેમને થોડો સમય અને અવકાશ આપવો વધુ યોગ્ય રહે છે. જો તેઓ વાત કરવા માંગતા હોય તો સાંભળવું. તે જ રીતે, પતિએ પણ પત્નીના મૂડ અને થાકનું ધ્યાન રાખવું જોઈએ. એકબીજાના મૂડનું સન્માન કરવાથી બિનજરૂરી મતભેદો દૂર થાય છે.
સાથે બેસીને જમવાનો પ્રયત્ન કરો: આજની વ્યસ્ત જીવનશૈલીમાં ઘણીવાર બંને અલગ-અલગ સમયે જમતા હોય છે. જો શક્ય હોય તો દિવસમાં ઓછામાં ઓછું એક વખત સાથે બેસીને ભોજન લેવાનો નિયમ બનાવો. જમતી વખતે મોબાઈલ દૂર રાખીને એકબીજા સાથે વાતો કરવી સંબંધ માટે ઉત્તમ સાબિત થાય છે. આ દરમિયાન દિવસભરના અનુભવો, ભવિષ્યનું આયોજન કે કોઈ હળવી-મજાકની વાતો કરી શકાય. આ નાની આદત બંનેને એકબીજાની નજીક લાવે છે.
પ્રેમ અને આદર વ્યક્ત કરવામાં કંજૂસી ન કરો: કોઈપણ સંબંધનો પાયો પ્રેમ અને પરસ્પર સન્માન પર ટકેલો છે. પતિ ઘરે આવે ત્યારે ચહેરા પર સ્મિત રાખવું, પ્રેમથી વાત કરવી કે થોડીવાર સાથે બેસવું પણ ઘણું મહત્વ ધરાવે છે. પરંતુ આ જ બાબત પતિને પણ એટલી જ લાગુ પડે છે. પત્નીએ આખો દિવસ ઘર સંભાળ્યું હોય કે નોકરી કરી હોય, તેની મહેનતની કદર કરવી અને વખાણ કરવા ખૂબ જરૂરી છે. જ્યારે બંને એકબીજાની મહેનત અને લાગણીઓની કદર કરે છે, ત્યારે વિશ્વાસ વધુ દ્રઢ બને છે અને દાંપત્ય જીવન સુખી બને છે.