ઓમાનના દરિયાકિનારે હોર્મુઝની સામુદ્રધુનીમાં એક વિદેશી માલવાહક જહાજ પર બે ટોર્પિડો વડે હુમલો થયો હોવાની સત્તાવાર પુષ્ટિ થઈ છે. આ હુમલામાં ઉત્તર પ્રદેશના દેવરિયા જિલ્લાના વતની અને જહાજ પર વાઇપર તરીકે ફરજ બજાવતા સૂરજ યાદવનું મૃત્યુ થયું છે.
એન્ટિગુઆ અને બાર્બુડાના ધ્વજ ધરાવતું માલવાહક જહાજ 'એમવી કેપ દાઓ' બુધવારે ઓમાનના દરિયાકિનારેથી ભારત તરફ આવી રહ્યું હતું. તે દરમિયાન જહાજ પર બે ટોર્પિડો છોડવામાં આવ્યા. પહેલો ટોર્પિડો જહાજના રહેણાક વિસ્તારની ડાબી બાજુએ અથડાયો, જ્યારે બીજો ટોર્પિડો એન્જિન રૂમની ડાબી બાજુએ ફૂટ્યો.
હુમલાને કારણે એન્જિન રૂમમાં અને જહાજના અન્ય ભાગોમાં આગ લાગી. વિસ્ફોટથી જહાજની ઇલેક્ટ્રિકલ સિસ્ટમ અને નેવિગેશન ક્ષમતાને ભારે નુકસાન થયું અને જહાજ ખોડંગાઈ ગયું.
ઓમાનના કોસ્ટ ગાર્ડે તાત્કાલિક ઘટનાસ્થળે પહોંચીને બચાવ કામગીરી હાથ ધરી અને જહાજના અન્ય ક્રૂ સભ્યોને સુરક્ષિત બહાર કાઢ્યા. જહાજ પર કુલ 28 ક્રૂ સભ્યો હતા, જેમાં 20 ભારતીયો સવાર હતા. સૂરજ યાદવને માથાના ભાગે ગંભીર ઈજાઓ થઈ હતી, જેમાં તેમનું મૃત્યુ થયું. અન્ય એક ભારતીય એન્જિનિયરને પણ નાની-મોટી ઈજાઓ થઈ હોવાનું જાણવા મળે છે.
બચાવી લેવાયેલા 19 ભારતીયો સહિતના ક્રૂ સભ્યોને ઓમાનમાં સુરક્ષિત સ્થળે ખસેડવામાં આવ્યા છે. મૃતકના પરિવારને સત્તાવાર જાણ કરી દેવામાં આવી છે.
ઓમાનમાં સ્થિત ભારતીય દૂતાવાસે સોશિયલ મીડિયા પ્લેટફોર્મ 'X' પર જણાવ્યું કે, "અમે ભારત આવતા સમયે 'એમવી કેપ દાઓ' પર થયેલા ટોર્પિડો હુમલાની ઘટના પર બારીકાઈથી નજર રાખી રહ્યા છીએ. અમે જહાજ પર સવાર તમામ ક્રૂ સભ્યો (19 ભારતીયો સહિત)ની સલામતી સુનિશ્ચિત કરવા ઓમાનના સ્થાનિક અધિકારીઓ સાથે સતત સંપર્કમાં છીએ. આ કાયરતાપૂર્ણ હુમલામાં એક ભારતીય નાવિકે જીવ ગુમાવ્યો છે, જેનાથી અમને અત્યંત દુઃખ થયું છે. અમે મૃતકના પરિવારજનો પ્રત્યે ઊંડી સંવેદના વ્યક્ત કરીએ છીએ."
દૂતાવાસે વધુમાં જણાવ્યું કે તે RPSL સાથે મળીને કામ કરી રહ્યું છે અને જહાજના માલિકો તથા મેનેજમેન્ટ સાથે સંકલન સાધીને વિસ્તૃત અહેવાલ અને FIR દાખલ કરવાની પ્રક્રિયા ચલાવી રહ્યું છે.
આ ઘટનાના પ્રત્યાઘાતો ભારતમાં પણ પડ્યા છે. 'ફોરવર્ડ સીમેન યુનિયન ઓફ ઈન્ડિયા'એ આ હુમલા પર ચિંતા અને નારાજગી વ્યક્ત કરી છે. યુનિયને માંગ કરી છે કે આંતરરાષ્ટ્રીય જળસીમામાં ભારતીય ખલાસીઓની સંપૂર્ણ સલામતી સુનિશ્ચિત કરવામાં આવે, હુમલા માટે જવાબદાર તત્વોને શોધીને કડક સજા આપવામાં આવે અને મૃતક સૂરજ યાદવના પરિવારને યોગ્ય ન્યાય તથા વળતર મળે. સંગઠને ચેતવણી આપી છે કે હોર્મુઝની સામુદ્રધુની અને તેની આસપાસના જળમાર્ગો પર કામ કરતા નિર્દોષ નાગરિક ખલાસીઓ સતત જોખમમાં જીવી રહ્યા છે.
આ ઘટનાના વિરોધમાં અને મૃત નાવિકને શ્રદ્ધાંજલિ આપવા માટે યુનિયને આગામી 25 સપ્ટેમ્બરે તમામ ખલાસીઓને કાળી પટ્ટી પહેરીને શાંતિપૂર્ણ વિરોધ પ્રદર્શન કરવાની જાહેરાત કરી છે.
હોર્મુઝની સામુદ્રધુનીમાં 'એમવી કેપ દાઓ' પર ટોર્પિડો હુમલો થયો હતો. આ હુમલામાં ભારતીય નાવિક સૂરજ યાદવનું મૃત્યુ થયું હતું. જહાજ પર કુલ 20 ભારતીય નાગરિકો સવાર હતા. તેમાંથી સૂરજ યાદવનું મૃત્યુ થયું છે, જ્યારે અન્ય 19 ભારતીયોને સુરક્ષિત રીતે બચાવી લેવાયા છે અને તેઓ હાલ ઓમાનમાં છે.
ઓમાન સ્થિત ભારતીય દૂતાવાસ આ ઘટના પર નજર રાખી રહ્યું છે અને ઓમાનના અધિકારીઓ સાથે સતત સંપર્કમાં છે. તેઓ RPSL સાથે મળીને અહેવાલ અને FIR દાખલ કરવાની પ્રક્રિયા ચલાવી રહ્યા છે.