દેશના ઉત્તર અને દક્ષિણ ભાગોમાં ચોમાસું સક્રિય બન્યું છે. જેના કારણે ક્યાંક ભારે વરસાદથી રાહત મળી છે, તો ક્યાંક તબાહી સર્જાઈ છે. ઉત્તરાખંડના દહેરાદૂનમાં જળબંબાકાર જેવી સ્થિતિ છે, તો તમિલનાડુના તિરુવલ્લુરમાં પણ ભારે વરસાદ પડ્યો છે. ઉત્તર પ્રદેશમાં કાનપુરમાં મકાન ધરાશાયી થતાં બે બાળકોના મોત થયા છે અને પશ્ચિમ બંગાળમાં પૂરની સ્થિતિ ગંભીર બની છે.
ઉત્તરાખંડની રાજધાની દહેરાદૂનમાં સતત વરસી રહેલા ભારે વરસાદને કારણે અનેક વિસ્તારોમાં પાણી ભરાઈ ગયા છે. રસ્તાઓ પાણીમાં ગરકાવ થતાં વાહનવ્યવહાર ખોરવાઈ ગયો છે. હવામાન વિભાગે આગામી દિવસોમાં પણ ગાજવીજ સાથે ભારે વરસાદની ચેતવણી આપી છે. વહીવટીતંત્રે લોકોને બિનજરૂરી મુસાફરી ન કરવા અને સાવચેત રહેવા સલાહ આપી છે.
તમિલનાડુના તિરુવલ્લુર જિલ્લામાં પણ ભારે પવન અને ગાજવીજ સાથે ધોધમાર વરસાદ પડ્યો છે. અવાડી, પટ્ટાભિરામ અને થિરુનિનરાવુર સહિતના વિસ્તારોમાં નીચાણવાળા ભાગોમાં પાણી ભરાઈ ગયું છે.
આ દરમિયાન હરિયાણાના કરનાલમાં વરસાદથી લોકોને ગરમીથી રાહત મળી છે, પણ પ્રયાગરાજમાં ગંગા અને યમુના નદીના જળસ્તરમાં વધારો નોંધાયો છે. જોકે, અધિકારીઓએ જણાવ્યું કે બંને નદીઓ હજુ જોખમી નિશાનથી નીચે વહી રહી છે અને પાણી રહેણાંક વિસ્તારો સુધી પહોંચ્યું નથી.
પશ્ચિમ બંગાળના ઘાટલમાં પૂરની સ્થિતિ વણસી છે. સતત વરસાદ અને જળાશયોમાંથી પાણી છોડવામાં આવતાં અનેક વોર્ડ અને ગ્રામીણ વિસ્તારો જળમગ્ન થઈ ગયા છે. લોકો હોડી અને ડીંગીના સહારે જીવન ગુજારવા મજબૂર છે. સ્થાનિક લોકોએ આગામી ૭ થી ૧૦ દિવસ માટે અનાજ અને કરિયાણાનો સંગ્રહ કરવાનું શરૂ કરી દીધું છે.
ઉત્તર પ્રદેશના કાનપુર દેહાતમાં ભારે વરસાદને કારણે એક કાચું મકાન ધરાશાયી થયું હતું. આ ઘટનામાં બે બાળકોના મોત થયા છે, જ્યારે તેમના પિતા ગંભીર રીતે ઇજાગ્રસ્ત થયા છે. તેમને સારવાર માટે હોસ્પિટલમાં દાખલ કરવામાં આવ્યા છે.
મથુરા-વૃંદાવનમાં પણ ધોધમાર વરસાદથી અનેક વિસ્તારો પાણીમાં ગરકાવ થયા છે. યાત્રાધામમાં ભક્તોને પણ પરેશાનીનો સામનો કરવો પડી રહ્યો છે.