તહેવારોની સિઝન પહેલા HDFC બેંકે પોતાના ગ્રાહકોને રાહત આપતો નિર્ણય લીધો છે. દેશની અગ્રણી ખાનગી બેંકે વિવિધ મુદતની લોન પરના માર્જિનલ કોસ્ટ ઓફ ફંડ્સ-બેઝ્ડ લેન્ડિંગ રેટ (MCLR) માં 5 થી 10 બેસિસ પોઈન્ટ્સ (bps) નો કાપ મૂક્યો છે. આ નિર્ણય 7 સપ્ટેમ્બર 2026 થી અમલમાં આવ્યો છે, જેનાથી MCLR સાથે જોડાયેલી લોન ધરાવતા ગ્રાહકોના વ્યાજનો બોજ ઘટવાની અપેક્ષા છે.
બેંકે જાહેર કરેલા નવા દરો અનુસાર, ઓવરનાઈટ MCLR 8% થી ઘટીને 7.90% થયો છે, જ્યારે 1 મહિનાનો દર પણ 7.90% પર આવી ગયો છે. 3 મહિનાનો દર 8.15% થી ઘટીને 8.05% થયો છે. 6 મહિનાનો MCLR 8.30% થી ઘટીને 8.25% અને 1 વર્ષનો MCLR 8.40% થી ઘટીને 8.35% થયો છે. 2 વર્ષનો દર 8.55% થી ઘટીને 8.45% અને 3 વર્ષનો દર 8.65% થી ઘટીને 8.60% થયો છે. આમ, હવે MCLR દરો 7.90% થી 8.60% ની વચ્ચે છે.
જોકે, ગ્રાહકોએ નોંધવું જોઈએ કે આ ઘટાડાનો લાભ તરત જ EMI માં દેખાશે નહીં. લોનના દરમાં ફેરફાર લોનની 'રીસેટ તારીખ' પર જ લાગુ થશે. આ ઉપરાંત, બેંકનું માર્જિન અને લોન કરારની શરતો પણ અંતિમ દર નક્કી કરવામાં ભૂમિકા ભજવે છે. જે ગ્રાહકોની લોન MCLR સાથે લિંક નથી, તેમના પર આ ફેરફારની સીધી અસર થશે નહીં. નવી લોન લેનારાઓ માટે અંતિમ વ્યાજ દર તેમની ક્રેડિટ પ્રોફાઇલ અને લોનના પ્રકાર પર નિર્ભર રહેશે.
MCLR એ ભારતીય રિઝર્વ બેંકે 2016 માં રજૂ કરેલી સિસ્ટમ છે, જે બેંકના ભંડોળના ખર્ચ પર આધારિત લઘુત્તમ વ્યાજ દર છે. હાલમાં HDFC બેંકનો બેઝ રેટ 8.70% અને BPLR 17.20% છે. થાપણદારો માટે FD દરોમાં કોઈ ફેરફાર થયો નથી; સામાન્ય ગ્રાહકોને 2.75% થી 6.50% અને વરિષ્ઠ નાગરિકોને 3.25% થી 7% સુધીનું વ્યાજ મળી રહ્યું છે.