સુરતમાં વિશ્વ હિન્દુ પરિષદ દ્વારા આયોજિત સામાજિક ગોષ્ઠી કાર્યક્રમમાં ગૃહ રાજ્યમંત્રી હર્ષ સંઘવીએ ગૌહત્યા મામલે મહત્વનું નિવેદન આપ્યું છે. અશોક સિંઘલજીની જન્મ શતાબ્દી નિમિત્તે યોજાયેલા આ કાર્યક્રમમાં તેમણે જણાવ્યું કે ગુજરાત સરકાર ગૌહત્યા સામે કડક કાર્યવાહી કરી રહી છે અને ભવિષ્યમાં પણ આ કાર્યવાહી ચાલુ રહેશે.
હર્ષ સંઘવીએ કહ્યું કે છેલ્લા એક વર્ષમાં અંદાજે ૧૫ ગૌ હત્યારાઓને ઝડપી પાડવામાં આવ્યા છે. આ આરોપીઓને ૭ વર્ષથી લઈને આજીવન કેદ સુધીની સજા અપાવવામાં રાજ્ય સરકારને સફળતા મળી છે. તેમણે દાવો કર્યો કે ગુજરાતની વિવિધ કોર્ટોએ આ મામલે કડક નિર્ણયો આપ્યા છે.
તેમણે લોકોને આ બાબતે કોઈ વધારાનું જોખમ ન લેવાની સલાહ આપી અને ખાતરી આપી કે તેઓ પોતાની ઓફિસમાંથી અડધી રાત્રે પણ માહિતી મળતાં જ ફોલોઅપ લેશે. તેમણે સરકાર, પોલીસ અને સામાજિક સંગઠનો સાથે મળીને કાર્યને વધુ મજબૂત બનાવવા પર ભાર મૂક્યો. આ નિવેદન બાદ ગૌહત્યા સામેની કાર્યવાહીનો મુદ્દો ફરી ચર્ચામાં આવ્યો છે.