ઇંગ્લેન્ડના કેપ્ટન અને બાયર્ન મ્યુનિખના સ્ટાર સ્ટ્રાઇકર હેરી કેને 2026નો બેલન ડી'ઓર એવોર્ડ જીતી લીધો છે. તે 25 વર્ષ બાદ આ એવોર્ડ મેળવનાર પ્રથમ ઇંગ્લિશ ફૂટબોલર બન્યો છે. તેના પહેલાં 2001માં માઇકલ ઓવેને આ એવોર્ડ જીત્યો હતો. આ એવોર્ડ સમારંભ સોમવારે લંડનમાં યોજાયો હતો.
કેને ગત સીઝનમાં ક્લબ અને દેશ માટે 73 ગોલ કર્યા હતા. તે યુરોપનો ટોપ સ્કોરર રહ્યો. વોટિંગમાં તેણે ફ્રાન્સના કિલિયન એમ્બાપે, સ્પેનના લેમિન યામલ, 2024ના વિજેતા રોડ્રી અને રેકોર્ડ 8 વખતના વિજેતા લિયોનેલ મેસ્સીને પાછળ છોડી દીધા. યામલ સતત ત્રીજા વર્ષે બેસ્ટ યંગ પ્લેયર તરીકે પસંદ થયો.
કેને બાયર્ન મ્યુનિખને બુન્ડેસલિગા અને જર્મન કપનું ખિતાબ અપાવવામાં મહત્વની ભૂમિકા ભજવી. તેણે જર્મન કપની ફાઇનલમાં સ્ટુટગાર્ટ સામે હેટ્રિક ફટકારી.
વર્લ્ડ કપમાં પણ કેનનું પ્રદર્શન શાનદાર રહ્યું. તેણે 6 ગોલ કર્યા અને ઇંગ્લેન્ડ માટે વર્લ્ડ કપમાં સૌથી વધુ ગોલ કરનાર ખેલાડી બનવાના મામલે ગેરી લિનેકરને પાછળ છોડી દીધા. તેની આગેવાનીમાં ઇંગ્લેન્ડે સેમિફાઇનલમાં આર્જેન્ટિના સામે હાર્યા બાદ ત્રીજા સ્થાનની મેચમાં ફ્રાન્સને હરાવ્યું.
એવોર્ડ જીત્યા બાદ કેન ભાવુક જોવા મળ્યો. તેણે યુવા ખેલાડીઓને સંદેશ આપતાં કહ્યું કે મહેનત, દૃઢ સંકલ્પ અને પોતાના પર વિશ્વાસથી કોઈપણ લક્ષ્ય હાંસલ કરી શકાય છે.
કેને કહ્યું, ‘મારો સફર સીધો અને સરળ નહોતો. હું એવો ખેલાડી નહોતો, જે સીધો ટોચ પર પહોંચી ગયો હોય. મારે મુશ્કેલ સમયમાંથી પસાર થવું પડ્યું. સતત મહેનત કરીને મારે પોતાને શ્રેષ્ઠ સાબિત કરવું પડ્યું. આશા છે કે મારો સફર બાળકોને પ્રેરણા આપશે.’
કેને પોતાની સફળતાનો શ્રેય ટીમના સાથીદારો, કોચ, માતા-પિતા અને પત્ની કેટને આપ્યો. તેણે પત્નીને પોતાની સૌથી સારી મિત્ર અને સૌથી મોટી સમર્થક ગણાવી.
ઇંગ્લેન્ડના કોચ થોમસ ટ્યુશેલે પણ કેનને અભિનંદન આપ્યા. તેમણે કહ્યું કે ઇંગ્લેન્ડની ટીમ નસીબદાર છે કે તેની પાસે કેન જેવો કેપ્ટન છે.
બેલન ડી'ઓર સમારોહ પ્રથમ વખત લંડનમાં યોજાયો. આ પ્રસંગે 1956માં આ એવોર્ડના પ્રથમ વિજેતા બનેલા ઇંગ્લેન્ડના સ્ટેનલી મેથ્યુઝને પણ સન્માનિત કરવામાં આવ્યા.
મહિલા કેટેગરીમાં સ્પેનની મિડફિલ્ડર એલેક્સિયા પુતેલાસે વિમન્સ બેલન ડી'ઓરનો ખિતાબ ત્રીજી વખત પોતાના નામે કર્યો. તેણે આ પહેલાં 2021 અને 2022માં સતત બે વખત આ એવોર્ડ જીત્યો હતો.
પુતેલાસે ગયા સીઝનમાં પોતાની પૂર્વ ટીમ બાર્સેલોનાને વુમન્સ ચેમ્પિયન્સ લીગ સહિત અનેક ખિતાબો અપાવવામાં મહત્વની ભૂમિકા ભજવી. તેણે ડિસેમ્બરમાં સ્પેનને વુમન્સ નેશન્સ લીગનો ખિતાબ જીતાડવામાં પણ યોગદાન આપ્યું.
32 વર્ષની પુતેલાસે સ્પેનની પોતાની સાથી એતાના બોનમાતીના સતત ત્રણ વર્ષના વર્ચસ્વનો અંત આણ્યો. બોનમાતીએ 2023, 2024 અને 2025માં આ એવોર્ડ જીત્યો હતો, પરંતુ પગમાં ફ્રેક્ચર થવાને કારણે આ વખતે શોર્ટલિસ્ટમાં સ્થાન મેળવી શકી નહોતી.