અમેરિકા જવાની લાલચમાં ડંકી રૂટ પર નીકળેલા ત્રણ ગુજરાતીઓનું ઈથોપિયામાં અપહરણ થયું છે. અપહરણકર્તાઓએ પરિવાર પાસેથી 70 લાખ રૂપિયા લીધા બાદ પણ ત્રણ દિવસથી તેમનો કોઈ સંપર્ક નથી, જેથી પરિવારજનો ચિંતામાં છે.
મહેસાણાના ઋત્વિક જન્સારી અને મમતા ચાવડા તથા ગાંધીનગરની એક યુવતી, એમ ત્રણેયને મહેસાણાના અલ્પેશ પટેલ નામના એજન્ટે વિદેશ મોકલ્યા હતા. અમેરિકા મોકલવાના બહાને તેમને ઈથોપિયા રૂટ પર લઈ જવાયા હતા. ઈથોપિયા પહોંચતાં જ ગઠિયાઓએ ત્રણેયનું અપહરણ કરી લીધું.
અપહરણકર્તાઓએ ભારતમાં રહેતા પરિવારજનોને ફોન કરીને કહ્યું કે તેઓ કેનેડા પહોંચી ગયા છે અને તેમને છોડવા માટે 70-70 લાખ રૂપિયા માંગ્યા. પરિવારે રકમ ચૂકવી દીધી, છતાં યુવક-યુવતીઓનો સંપર્ક ન થતાં પરિવારે સ્થાનિક પોલીસ અને વિદેશ મંત્રાલયની મદદ માંગી છે.
ડંકી રૂટ પર એજન્ટો પરિવારને 60થી 80 લાખ રૂપિયામાં અમેરિકામાં 100 ટકા એન્ટ્રીની ખોટી ગેરંટી આપે છે. પછી ફેક પાસપોર્ટ કે થર્ડ કન્ટ્રી વિઝા બનાવીને યુવાનોને નિકારાગુઆ, હોન્ડુરાસ, મેક્સિકો કે ઈથોપિયા જેવા દેશોમાંથી જંગલ, નદી અને પહાડી વિસ્તારોમાંથી પસાર કરાવાય છે. બોર્ડર નજીકના સેફ હાઉસમાં પહોંચાડીને કાંગારૂ કોર્ટ જેવી સ્થિતિ ઊભી કરી પરિવારો પાસેથી વધારાના કરોડો રૂપિયા ખંખેરવામાં આવે છે.
છેલ્લા ત્રણ વર્ષમાં ડઝનબંધ પરિવારોએ ડંકી રૂટથી અમેરિકા પહોંચવાનો પ્રયાસ કર્યો છે. આ રૂટ પર 12 કરતાં વધુ લોકોના મોત થયા છે, તેમ છતાં ગેરકાયદે રીતે વિદેશ જવાનો ક્રેઝ ઘટ્યો નથી.