ગુજરાતમાં શિયાળાની શરૂઆત થઈ રહી છે. હવામાન વિભાગના જણાવ્યા અનુસાર આગામી ત્રણ દિવસ દરમિયાન રાજ્યમાં લઘુતમ તાપમાનમાં 3 ડિગ્રી સુધીનો ઘટાડો થઈ શકે છે. જેના કારણે વહેલી સવારે અને મોડી રાત્રે ઠંડીનો અહેસાસ વધુ થશે.
હાલ અમદાવાદ સહિત રાજ્યનાં અનેક શહેરોમાં લઘુતમ તાપમાન 20 ડિગ્રીની આસપાસ અથવા તેનાથી નીચે નોંધાઈ રહ્યું છે. અમદાવાદમાં હાલ લઘુતમ તાપમાન 19.6 ડિગ્રી નોંધાયું છે, જે આગામી ત્રણ દિવસમાં ઘટીને 17 ડિગ્રી સુધી પહોંચી શકે છે.
રાજ્યનાં અન્ય શહેરોમાં પણ ઠંડીનો ચમકારો જોવા મળી રહ્યો છે. મહુવામાં સૌથી ઓછું 16.9 ડિગ્રી લઘુતમ તાપમાન નોંધાયું છે, જ્યારે વડોદરામાં 18 ડિગ્રી અને ગાંધીનગરમાં 18.5 ડિગ્રી તાપમાન નોંધાયું છે.
નવેમ્બર મહિનામાં સામાન્ય રીતે તાપમાનમાં ઘટાડો થવાની સાથે શિયાળાની ઠંડીનો અનુભવ થતો હોય છે. આ મહિનામાં રાજ્યનાં કેટલાંક શહેરોમાં લઘુતમ તાપમાન 15 ડિગ્રીથી પણ નીચે નોંધાતું હોય છે.
તાપમાનમાં વધુ ઘટાડો થવાની શક્યતાને પગલે વહેલી સવારે કામકાજ માટે બહાર નીકળતા લોકો અને રાત્રિના સમયે મુસાફરી કરતા લોકોને ઠંડીનો વધુ અનુભવ થઈ શકે છે. આમ, આગામી ત્રણ દિવસમાં ગુજરાતમાં શિયાળાની જમાવટ થવાના સંકેતો મળી રહ્યા છે.